1 Timoteo 3 - ŊMALƐ KRƆŊKRƆŊ LƐ

Asafonɔkwɛlɔi

¹ Anɔkwa wiemɔ nɛ: kɛ mɔ ko miitao nɔkwɛmɔ nitsumɔ lɛ, eetao nitsumɔ kpakpa.

² Shi esa akɛ nɔkwɛlɔ lɛ afee mɔ ni anaŋ ehe sane ko atã, mɔ ni yɔɔ ŋa kome, hiɛshikãlɔ, mɔ ni jwɛŋmɔ mli tse, mɔ ni baa ejeŋ jogbaŋŋ, gbɔfeelɔ, mɔ ni le nitsɔɔmɔ,

³ jeee dãanulɔ, jeee ninekpokpookpotsɛ, shi moŋ mɔ ni he jɔ, mɔ ni beee, mɔ ni hiɛ ekɔ̃ɔɔ shika nɔ,

⁴ mɔ ni yeɔ lɛ diɛŋtsɛ ewe nɔ jogbaŋŋ, ni ebii boɔ lɛ toi kɛ woo fɛɛ.

⁵ Shi kɛ mɔ ko leee lɛ diɛŋtsɛ ewe nɔ yeli lɛ, te eeefee tɛŋŋ ekwɛ Nyɔŋmɔ asafo lɛ hu?

⁶ Asaŋ jeee mɔ ni bote Nyɔŋmɔjamɔ mli etsɛko, koni ekawo ehe nɔ ni egbee kojomɔ ni abonsam gbee mli lɛ mli.

⁷ Shi sa akɛ mɛi ni yɔɔ sɛɛ lɛ hu aye ehe odase kpakpa, koni ehe guɔ akagbo ni ekagbee abonsam tsɔne mli.

Asafoŋ sɔ̃ɔlɔi

⁸ Asafo mli sɔ̃ɔlɔi lɛ hu esa akɛ amɛfee gbɔmɛi ni hiɛ tsii, jeee lilɛintatsɛmɛi, jeee mɛi ni sumɔɔ dãa, jeee hiɛjoolɔi,

⁹ shi mɛi ni hiɛɔ hemɔkɛyeli lɛ teemɔ sane lɛ yɛ henilee ni he tse mli.

¹⁰ Shi mɛnɛɛmɛi hu aka amɛ akwɛ fɛɛ dã; no sɛɛ lɛ, kɛ sane ko bɛ amɛhe lɛ, amɛsɔ̃mɔ.

¹¹ Yei lɛ hu nakai nɔŋŋ; amɛfee mɛi ni hiɛ tsii, jeee oshekuyelɔi shi mɛi ni hiɛ kã shi, ni amɛyeɔ anɔkwa yɛ nii fɛɛ mli.

¹² Asafo mli sɔ̃ɔlɔi lɛ amɛfee ŋa komekome tsɛmɛi, mɛi ni yeɔ amɛbii kɛ amɛ diɛŋtsɛ amɛshĩai anɔ jogbaŋŋ.

¹³ Ejaakɛ mɛi ni sɔ̃mɔɔ jogbaŋŋ lɛ amɛnaa gbɛnaa kpakpa amɛhãa amɛhe, ni amɛnaa ekãa babaoo yɛ Kristo Yesu nɔ hemɔkɛyeli lɛ mli.

Teemɔ sane wulu lɛ

¹⁴ Mihiɛ kã nɔ akɛ etsɛŋ ni maba oŋɔɔ; shi miiŋma bo enɛɛmɛi

¹⁵ koni kɛ mitsɛ lɛ, ni ole bɔ ni sa akɛ oba ojeŋ ohã yɛ Nyɔŋmɔ we ni ji Nyɔŋmɔ hiɛkãalɔ lɛ asafo lɛ, anɔkwale lɛ akulashiŋ kɛ nɔdaamɔnɔ lɛ mli.

¹⁶ Ni nɔ ko ni ŋwanejee ko bɛ he akɛ eda kpeteŋkple ji Nyɔŋmɔjamɔ teemɔ sane lɛ: Nyɔŋmɔ jie ehe shi faŋŋ yɛ gbɔmɔtso mli, abu lɛ bem yɛ mumɔ mli, bɔfoi na lɛ, ashiɛ lɛ yɛ jeŋmaji ateŋ, ahe enɔ aye yɛ jeŋ, aŋɔ lɛ kɛtee ŋwɛi yɛ anunyam mli.