1 Timoteo 2 - ŊMALƐ KRƆŊKRƆŊ LƐ

Asafo mli jamɔ

¹ Agbɛnɛ nɔ klɛŋklɛŋ ni miwoɔ he ŋaa ji akɛ ahiɛ faikpamɔi, sɔlemɔi, mlidaamɔi, shidai amli, ahã gbɔmɛi fɛɛ,

² ahã maŋtsɛmɛi kɛ mɛi fɛɛ ni yeɔ onukpa lɛ, koni wɔhi shi kpoo yɛ hejɔlɛ mli, yɛ Nyɔŋmɔjamɔ kɛ jeŋba ni hiɛ sɔɔ fɛɛ mli.

³ Ejaakɛ enɛ hi ni esa Nyɔŋmɔ ni ji wɔyiwalaherelɔ lɛ hiɛ.

⁴ Esumɔɔ akɛ ehere gbɔmɛi fɛɛ ayiwala, koni amɛshɛ anɔkwale lɛ lee mli.

⁵ Ejaakɛ Nyɔŋmɔ kome yɔɔ, kɛ Nyɔŋmɔ kɛ gbɔmɛi ateŋdamɔlɔ kome hu ni ji gbɔmɔ Kristo Yesu lɛ,

⁶ mɔ ni ŋɔ ehe ehã akɛ kpɔmɔ nɔ ehã mɛi fɛɛ. Enɛ ji odase ni aye yɛ be ni sa mli lɛ;

⁷ ni no hewɔ awo mi shiɛlɔ kɛ bɔfo (anɔkwale miwieɔ yɛ Kristo mli, mimaleee), jeŋmaji atsɔ̃ɔlɔ yɛ hemɔkɛyeli kɛ anɔkwale mli lɛ.

⁸ No hewɔ lɛ, miitao akɛ hii asɔle yɛ he fɛɛ he ni amɛhole niji ni he tse nɔ ni mlifu loo naataamɔ akaba mli.

⁹ Nakai nɔŋŋ yei hu, amɛkɛ atade ni sa kɛ hiɛ ni gboɔ nɔ kɛ heshibaa jwɛŋmɔ awula amɛhe, jeee kɛ yigbɔɔ loo shika loo adiagbai loo atade ni jara wa,

¹⁰ shi moŋ kɛ nitsumɔi kpakpai ni sa yei ni tsɛɔ amɛhe akɛ Nyɔŋmɔ jalɔi lɛ.

¹¹ Yoo afee dioo ni ekɛ heshibaa fɛɛ akase nii.

¹² Shi mihãaa yoo hegbɛ akɛ etsɔ̃ɔ nii aloo eye nuu nɔ, shi moŋ efee dioo.

¹³ Ejaakɛ Adam tsutsu abɔ, no sɛɛ lɛ Hawa.

¹⁴ Ni jeee Adam alaka lɛ, shi yoo lɛ alaka lɛ, ni ebote nɔtɔmɔ mli.

¹⁵ Shi aaahere eyiwala kɛaatsɔ̃ bifɔmɔ nɔ, kɛji ehi shi kɛ hemɔkɛyeli kɛ suɔmɔ kɛ hetsemɔ kɛ heshibaa jwɛŋmɔ.