1 Timoteo 1 - ŊMALƐ KRƆŊKRƆŊ LƐ

Ŋamɔ

¹ Paulo ni ji Yesu Kristo bɔfo yɛ Nyɔŋmɔ, wɔyiwalaherelɔ lɛ, kɛ Nuŋtsɔ Yesu Kristo, wɔhiɛnɔkãmɔ lɛ, famɔ naa lɛ,

² ŋma yahã Timoteo ni ji ebi krɔŋŋ yɛ hemɔkɛyeli mli lɛ. Dromɔ, mɔbɔnalɛ kɛ hejɔlɛ ni jɛ Nyɔŋmɔ, wɔTsɛ lɛ, kɛ Yesu Kristo, wɔNuŋtsɔ lɛ, dɛŋ ahã bo!

Amale tsɔ̃ɔmɔ he kɔkɔbɔɔ

³ Tamɔ bɔ ni be ni miyaa Makedonia ni mikpa bo fai akɛ ohi shi yɛ Efeso, koni obɔ mɛi komɛi akɔkɔ akɛ amɛkatsɔ̃ɔ tsɔ̃ɔmɔi krokomɛi.

⁴ Ni asaŋ obɔ kɔkɔ akɛ amɛkadi adesãi kɛ wekukpãa tsɔ̃ɔmɔ tsralaa lɛ sɛɛ, ejaakɛ enɛɛmɛi kɛ yaka hiɛklamɔ baa fe akɛ eeewa wɔ ni wɔle Nyɔŋmɔ yiwalaheremɔ he yiŋtoo, ni hemɔkɛyeli sane ni lɛ, nakai fai mikpaa bo ekoŋŋ.

⁵ Shi ŋaawoo lɛ oti ji suɔmɔ ni jɛ tsui ni mli tse kɛ henilee kpakpa kɛ hemɔkɛyeli ni osato ko bɛ mli lɛ mli.

⁶ Enɛɛmɛi ji nii ni mɛi komɛi eje sɛɛ, ni amɛkpale kɛtee yaka wiemɔ he.

⁷ Amɛmiitao amɛtsɔ̃mɔ mlatsɔɔlɔi, tsɛ amɛnaaa nii ni amɛkɛɔ lɛ loo nii ni amɛwieɔ kɛ nɔmimaa lɛ shishi.

⁸ Wɔle akɛ Mla lɛ hi kɛji mɔ ko kɛtsu nii bɔ ni Mla lɛ taoɔ lɛ.

⁹ Ejaakɛ ale enɛ faŋŋ akɛ Mla lɛ, jeee jalɔ hewɔ awo, shi mɛi ahewɔ ni awo moŋ ji mlatɔ̃lɔi kɛ toigbolɔi, mɛi ni he tseee kɛ hebulelɔi, tsɛgbelɔi kɛ nyɛgbelɔi, gbɔmɔgbelɔi,

¹⁰ ajwamãŋbɔlɔi, hii ni kɛ hii wɔɔ, gbɔmɔ julɔi, amalelɔi, kitãmlikulɔi, kɛ nɔ fɛɛ nɔ ni kɛ tsɔ̃ɔmɔ kpakpa lɛ yeee lɛ,

¹¹ yɛ Nyɔŋmɔ ni ajɔɔ lɛ lɛ anunyam Sanekpakpa ni atu awo midɛŋ lɛ naa.

Paulo daa Nyɔŋmɔ shi yɛ etsɛmɔ hewɔ

¹² Miida wɔNuŋtsɔ Kristo Yesu ni wo mi hewalɛ lɛ shi, akɛ ebu mi anɔkwafo, ni eŋɔ mi ewo sɔ̃ɔmɔ lɛ mli,

¹³ mi ni tsutsu lɛ mi ji musubɔlɔ kɛ mɛi ayiwalɔ kɛ mɛi aniseniianifeelɔ lɛ; shi kɛ̃lɛ ana mi mɔbɔ, ejaakɛ mileee ni mifee, yɛ he ni miheee miyeee hewɔ.

¹⁴ Shi wɔNuŋtsɔ lɛ dromɔ lɛ fa hã mi aahu kɛteke nɔ, ni nɔ ni fata he kɛba ji hemɔkɛyeli kɛ suɔmɔ ni yɔɔ Kristo Yesu mli lɛ.

¹⁵ Eji anɔkwa wiemɔ ni sa akɛ amɔ mli kwraa, akɛ Kristo Yesu ba je nɛɛŋ eba eshafeelɔi ayiwalaheremɔ, mɛi ateŋ ni mi mi ji oti lɛ;

¹⁶ shi kɛ̃lɛ enɛ hewɔ ni ana mi mɔbɔ lɛ, koni mi tsutsu mimli Yesu Kristo ajie etsuishitoo lɛ fɛɛ kpo yɛ, ni akɛto mɛi ni baahe enɔ aye ni amɛna naanɔ wala lɛ okadi.

¹⁷ Shi naanɔi aMaŋtsɛ lɛ, mɔ ni gbooo, mɔ ni anaaa, mɔ ni ji Nyɔŋmɔ kome lɛ, aŋɔ woo kɛ anunyam ahã kɛyashi naanɔi anaanɔ. Amen!

Timoteo gbɛnaa nitsumɔ

¹⁸ Kitã ni miwoɔ bo nɛ, mibi Timoteo, yɛ gbalɛi ni agba kɛtsɔ̃ hiɛ yɛ ohe lɛ anaa, koni okɛwu ta kpakpa lɛ,

¹⁹ ni ohiɛ hemɔkɛyeli kɛ henilee kpakpa. Nɔ ni mɛi komɛi shɛrɛ shwie ni amɛyasha shi yɛ hemɔkɛyeli lɛ gbɛfaŋ lɛ.

²⁰ Amɛteŋ mɛi komɛi ji Himeneo kɛ Aleksandro, mɛi ni mitu miwo Satan dɛŋ, koni atsɔse amɛ ni amɛkawie musubɔɔ wiemɔi dɔŋŋ lɛ.