1 Tesalonikabii 5 - ŊMALƐ KRƆŊKRƆŊ LƐ

Nyɛsaa nyɛhe nyɛtoa Nuŋtsɔ lɛ baa lɛ

¹ Shi anyɛmimɛi, nɔ ni kɔɔ gbii lɛ kɛ bei lɛ ahe lɛ, ehe ehĩaaa akɛ aŋma nyɛ.

² Ejaakɛ nyɛ diɛŋtsɛ nyɛle krɛdɛɛ akɛ Nuŋtsɔ lɛ Gbi lɛ baaba tamɔ julɔ baa nyɔɔŋ lɛ.

³ Ejaakɛ be mli ni amɛaakɛɛ akɛ, “Wɔyɛ hejɔlɛ ni wɔyɛ shweshweeshwe!” lɛ, no mli nɔŋŋ hiɛkpãtãmɔ aaabatua amɛ trukaa, tamɔ kɔ̃ɔmɔ tuaa yoo ni hiɛ musu lɛ, ni amɛjeŋ mli kɔkɔɔkɔ.

⁴ Shi, anyɛmimɛi, nyɛ lɛ nyɛbɛ duŋ mli ni Gbi lɛ aaabati nyɛ shi tamɔ julɔ.

⁵ Ejaakɛ nyɛ fɛɛ lɛ, labii ji nyɛ kɛ shwanebii hu, wɔjeee nyɔɔŋ loo duŋ bii.

⁶ Belɛ no hewɔ lɛ, nyɛkahãa wɔwɔa tamɔ mɛi ni eshwɛ lɛ, shi moŋ nyɛhãa wɔshia kpe ni wɔhiɛ akãa shi.

⁷ Ejaakɛ mɛi ni wɔɔ lɛ, nyɔɔŋ mli amɛwɔɔ, ni mɛi ni tɔrɔɔ dãa lɛ, nyɔɔŋ mli amɛtɔrɔɔ.

⁸ Shi wɔ lɛ, akɛni shwanebii ji wɔ hewɔ lɛ, nyɛhãa wɔhiɛ akãa shi ni wɔwo hemɔkɛyeli kɛ suɔmɔ dama lɛ ni wɔbumɔ dade fai ni ji yiwalaheremɔ hiɛnɔkãmɔ lɛ.

⁹ Ejaakɛ Nyɔŋmɔ etooo wɔ ehãaa mlifu, shi moŋ hã yiwalaheremɔnamɔ kɛtsɔ̃ wɔNuŋtsɔ Yesu Kristo nɔ,

¹⁰ mɔ ni gbo wɔyi gbele, koni wɔhiɛ kãmɔ jio, wɔwɔ jio, wɔkɛ lɛ ahi shi lɛ.

¹¹ Hewɔ lɛ nyɛshɛjeshɛjea nyɛhe mii, ni mɔ fɛɛ mɔ ahã enaanyo nane amɔ shi, tamɔ bɔ ni nyɛfeɔ lɛ.

Naagbee ŋaawoi kɛ ŋamɔi

¹² Shi, anyɛmimɛi, wɔmiikpa nyɛ fai akɛ nyɛle mɛi ni tsuɔ nii yɛ nyɛteŋ ni amɛyeɔ nyɛnɔ onukpa yɛ Nuŋtsɔ lɛ mli ni amɛwieɔ amɛtsɔ̃ɔ nyɛ lɛ.

¹³ Nyɛbua amɛ naakpa diɛŋtsɛ yɛ suɔmɔ mli, yɛ amɛnitsumɔ lɛ hewɔ. Nyɛhãa hejɔlɛ ahĩa nyɛteŋ.

¹⁴ Ni wɔmiikpa nyɛ fai, anyɛmimɛi, nyɛwiea nyɛtsɔ̃a hejɔ̃lɔi lɛ, nyɛwoa gbeyelɔi lɛ ekãa; nyɛwaa mɛi ni yɔɔ gbedee lɛ; nyɛtoa nyɛtsui shi nyɛhãa mɛi fɛɛ.

¹⁵ Nyɛkwɛa ni ahĩa koni mɔ ko kɛ efɔŋ akato efɔŋ najiaŋ, shi moŋ daa nɛɛ nyɛnyiɛa ekpakpafeemɔ sɛɛ nyɛhãhãa nyɛhe kɛ mɛi fɛɛ.

¹⁶ Nyɛnaa miishɛɛ daa,

¹⁷ nyɛsɔlea ni nyɛkafɔa;

¹⁸ nyɛdaa shi yɛ nɔ fɛɛ nɔ mli. Ejaakɛ enɛ ji Nyɔŋmɔ suɔmɔnaanii yɛ Kristo Yesu mli yɛ nyɛgbɛfaŋ.

¹⁹ Nyɛkagbea Mumɔ lɛ;

²⁰ nyɛkagbea gbalɛi lɛ ahe guɔ.

²¹ Nyɛkaa nii fiaa nyɛkwɛa, ni nɔ ni hi lɛ nyɛmɔa no mli.

²² Nyɛtsia nyɛhe kɛjɛa nɔ fɛɛ nɔ ni hiɛ efɔŋ su lɛ he.

²³ Shi hejɔlɛ Nyɔŋmɔ lɛ diɛŋtsɛ atsuu nyɛhe kwraa kɛmɔ shi, ni eto nyɛmumɔ kɛ nyɛsusuma kɛ nyɛgbɔmɔtso muu lɛ fɛɛ ni shwamɔ ko akahi he yɛ wɔNuŋtsɔ Yesu Kristo baa be lɛ mli.

²⁴ Anɔkwafo ji mɔ ni tsɛɔ nyɛ lɛ, ni eeefee hu.

²⁵ Anyɛmimɛi, nyɛsɔlea nyɛhãa wɔ hu.

²⁶ Nyɛŋaa nyɛmimɛi lɛ fɛɛ kɛ naashwɔmɔ krɔŋkrɔŋ.

²⁷ Miikã nyɛ Nuŋtsɔ lɛ kitã akɛ nyɛhãa akanea nɛkɛ wolo nɛɛ atsɔ̃a nyɛmimɛi lɛ fɛɛ!

²⁸ WɔNuŋtsɔ Yesu Kristo dromɔ lɛ kɛ nyɛ ahi shi!