1 Tesalonikabii 4 - ŊMALƐ KRƆŊKRƆŊ LƐ

Nyɛhĩa shi yɛ krɔŋkrɔŋfeemɔ kɛ suɔmɔ mli

¹ Naagbee lɛ, anyɛmimɛi, nyɛkase yɛ wɔŋɔɔ bɔ ni sa akɛ nyɛba nyɛjeŋ ni esa Nyɔŋmɔ hiɛ. Nyɛmiifee nakai, shi wɔmiikpa nyɛ fai ni wɔmiiwo nyɛ ŋaa yɛ Nuŋtsɔ Yesu mli akɛ nyɛfee ni ateke nɔ fe tsutsu lɛ.

² Ejaakɛ nyɛle kitãi ni wɔwo nyɛ yɛ Nuŋtsɔ Yesu mli lɛ.

³ Ejaakɛ enɛ ji Nyɔŋmɔ suɔmɔnaanii, no ji, nyɛhetsemɔ akɛ nyɛtsi nyɛhe kɛjɛ ajwamãŋbɔɔ he;

⁴ ni nyɛteŋ mɔ fɛɛ mɔ ale lɛ diɛŋtsɛ eŋa lɛ hiɛmɔ yɛ hetsemɔ kɛ woo mli,

⁵ jeee yɛ akɔnɔ hiɛdɔɔ mli, tamɔ bɔ ni jeŋmajiaŋbii ni leee Nyɔŋmɔ lɛ feɔ lɛ.

⁶ Ni mɔ ko akatɔ̃ enyɛmi nɔ ni eye lɛ amim yɛ sane nɛɛ mli, ejaakɛ enɛɛmɛi fɛɛ ahe oweletɔlɔ ji Nuŋtsɔ lɛ, tamɔ bɔ ni wɔkɛɛ nyɛ wɔto ni wɔye he odase lɛ.

⁷ Ejaakɛ Nyɔŋmɔ tsɛɛɛ wɔ ehãaa nyaŋemɔ nitsumɔ, shi moŋ hã hetsemɔ.

⁸ Hewɔ lɛ agbɛnɛ, mɔ ni kwaa tsɔ̃ɔmɔ nɛɛ lɛ, jeee gbɔmɔ ko ekwaa, shi moŋ Nyɔŋmɔ ni kɛ eMumɔ Krɔŋkrɔŋ lɛ hãa nyɛ lɛ.

⁹ Shi nɔ ni kɔɔ nyɛmimɛi asuɔmɔ he lɛ, ehĩaaa akɛ aŋma nyɛ; ejaakɛ nyɛ diɛŋtsɛ lɛ, Nyɔŋmɔ etsɔ̃ɔ nyɛ akɛ nyɛsumɔsumɔɔ nyɛhe;

¹⁰ ejaakɛ nyɛfeɔ nakai hu nyɛhãa nyɛmimɛi fɛɛ ni yɔɔ Makedonia muu lɛ fɛɛ lɛ. Shi wɔmiikpa nyɛ fai, anyɛmimɛi, akɛ nyɛfee kɛteke nɔ fe tsutsu lɛ.

¹¹ Ni nyɛkɛfea nyɛ oti akɛ nyɛaahi shi dioo ni nyɛkɛ nyɛhe akawo mɛi asaji amli ni nyɛkɛ nyɛniji atsu nii, bɔ ni wɔwo nyɛ kitã lɛ,

¹² koni nyɛjeŋba afee mɛi ni yɔɔ sɛɛ lɛ fɛo, ni nɔ ko nɔ ko akahĩa nyɛ.

Gbohii kɛ hiɛkãalɔi yɛ Nuŋtsɔ lɛ baa be lɛ mli

¹³ Shi, anyɛmimɛi, wɔmiisumɔ akɛ nyɛle mɛi ni ewɔ lɛ ahe sane, koni nyɛkaye ŋkɔmɔ tamɔ mɛi ni eshwɛ ni bɛ hiɛnɔkãmɔ ko lɛ.

¹⁴ Ejaakɛ kɛ wɔheɔ wɔyeɔ akɛ Yesu gbo ni ete shi lɛ, belɛ nakai nɔŋŋ Nyɔŋmɔ baatsɔ̃ Yesu nɔ aŋɔ mɛi ni ewɔ lɛ hu afata ehe kɛba.

¹⁵ Ejaakɛ wɔmiikɛɛ nyɛ enɛ yɛ Nuŋtsɔ lɛ wiemɔ naa akɛ wɔ mɛi ni wɔhiɛ kãmɔ ni wɔbaashwɛ yɛ Nuŋtsɔ lɛ baa be lɛ mli lɛ, wɔtsɔ̃ŋ mɛi ni ewɔ lɛ ahiɛ.

¹⁶ Ejaakɛ lɛ Nuŋtsɔ lɛ diɛŋtsɛ baakpleke shi kɛjɛ ŋwɛi yɛ oshebɔɔ mli ni ŋwɛi bɔfonukpa gbee kɛ Nyɔŋmɔ tɛtɛrɛmantɛrɛ baagbɛɛ, ni gbohii ni yɔɔ Kristo mli lɛ tsutsu baate shi,

¹⁷ no sɛɛ lɛ wɔ mɛi ni wɔhiɛ kãmɔ ni eshwɛ lɛ, aaasha wɔ kɛ amɛ fɛɛ yɛ atatui amli kɛaatee Nuŋtsɔ lɛ kpeemɔ yɛ kɔɔyɔɔ mli, ni nakai wɔkɛ Nuŋtsɔ lɛ aaayahi shi daa.

¹⁸ No hewɔ lɛ, nyɛkɛ wiemɔi nɛɛ ashɛjeshɛjea nyɛhe mii.