1 Tesalonikabii 3 - ŊMALƐ KRƆŊKRƆŊ LƐ

Atsu Timoteo kɛtee Tesalonika

¹ No hewɔ lɛ, be ni wɔnyɛɛɛ dɔŋŋ lɛ, wɔkpɛ mli akɛ ashi wɔ kome yɛ Atene,

² ni wɔtsu Timoteo ni ji wɔnyɛmi kɛ Nyɔŋmɔ sɔ̃ɔlɔ kɛ wɔnaanyo nitsulɔ yɛ Kristo Sanekpakpa lɛ mli lɛ. Wɔtsu lɛ ni ebawo nyɛ hewalɛ ni eshɛje nyɛmii yɛ nyɛhemɔkɛyeli lɛ gbɛfaŋ,

³ koni nɛkɛ amanehului nɛɛ akahã mɔ ko mɔ ko miigbugbãa. Ejaakɛ nyɛ diɛŋtsɛ nyɛle akɛ nɔ ni kã shi hã wɔ nɔŋŋ ji no.

⁴ Ejaakɛ be ni wɔkɛ nyɛ yɔɔ lɛ, wɔkɛɛ nyɛ wɔto akɛ wɔbaana amanehulu, tamɔ bɔ ni eba mli ni nyɛle lɛ.

⁵ Enɛ hewɔ ni mi hu, be ni minyɛɛɛ dɔŋŋ lɛ, mitsu Timoteo ni mikɛle nyɛhemɔkɛyeli lɛ, akɛ aleenɔ kalɔ lɛ ebaka nyɛ, ni ehã wɔdeŋme ni wɔgbo lɛ efee yaka lo.

⁶ Shi agbɛnɛ ni Timoteo jɛ nyɛŋɔɔ ba wɔŋɔɔ ni ebagba wɔ nyɛhemɔkɛyeli lɛ kɛ nyɛsuɔmɔ lɛ he sane kɛ kaimɔ kpakpa ni nyɛkɛkaiɔ wɔ daa lɛ kɛ nyɛshwee ni nyɛshweɔ akɛ nyɛaana wɔ tamɔ bɔ ni wɔ hu wɔshweɔ ni wɔna nyɛ lɛ

⁷ hewɔ lɛ, anyɛmimɛi, wɔmanehulu kɛ wɔhejaramɔ lɛ fɛɛ mli lɛ, nyɛhemɔkɛyeli lɛ ehã wɔmii eshɛ yɛ nyɛhe;

⁸ ejaakɛ kɛji nyɛfi shi yɛ Nuŋtsɔ lɛ mli lɛ, no lɛ agbɛnɛ wɔna wala hee.

Paulo da Nyɔŋmɔ shi yɛ Tesalonikabii lɛ ahewɔ

⁹ Ejaakɛ mɛɛ shidaa po wɔɔnyɛ wɔkɛda Nyɔŋmɔ yɛ nyɛ hewɔ yɛ miishɛɛ fɛɛ ni wɔna yɛ nyɛhe yɛ wɔNyɔŋmɔ lɛ hiɛ lɛ hewɔ?

¹⁰ Nyɔɔŋ kɛ shwane fɛɛ wɔkpaa fai babaoo, koni wɔna nyɛhiɛ ni wɔhã nyɛhemɔkɛyeli lɛ aye emuu.

¹¹ Shi Nyɔŋmɔ ni ji wɔTsɛ lɛ diɛŋtsɛ kɛ wɔNuŋtsɔ Yesu Kristo lɛ aaahã wɔgbɛ aja kɛba nyɛŋɔɔ.

¹² Ni Nuŋtsɔ lɛ awo nyɛ obɔ̃bɔ̃ ni ehã nyɛteke nɔ kɛ suɔmɔ ni nyɛkɛsumɔsumɔɔ nyɛhe kɛ mɛi fɛɛ, tamɔ bɔ ni wɔ hu wɔsumɔɔ nyɛ lɛ.

¹³ Bɔ ni afee ni ehã nyɛtsui afi shi ni shwamɔ ko akahi nyɛhe yɛ krɔŋkrɔŋfeemɔ mli, yɛ Nyɔŋmɔ ni ji wɔTsɛ lɛ hiɛ, yɛ wɔNuŋtsɔ Yesu Kristo kɛ emɛi krɔŋkrɔŋi lɛ fɛɛ abaa be lɛ mli.