1 Tesalonikabii 2 - ŊMALƐ KRƆŊKRƆŊ LƐ

Paulo nitsumɔ yɛ Tesalonika

¹ Ejaakɛ anyɛmimɛi, nyɛ diɛŋtsɛ nyɛle akɛ nyɛŋɔɔ ni wɔba lɛ efeee yaka.

² Wɔna nɔ momo, ni afee wɔ niseniianii hu yɛ Filipi, tamɔ bɔ ni nyɛle lɛ, kɛ̃lɛ wɔna ekãa yɛ wɔNyɔŋmɔ lɛ mli ni wɔkɛjaje Nyɔŋmɔ Sanekpakpa lɛ wɔtsɔ̃ɔ nyɛ, tsɛbelɛ ate shi ashi wɔ babaoo.

³ Ejaakɛ wɔwiemɔ kɛ tsɔ̃ɔmɔ lɛ, jeee shishiumɔ loo nyaŋemɔ nitsumɔ loo kutumpɔo mli ejɛ;

⁴ shi moŋ tamɔ bɔ ni Nyɔŋmɔ ebu wɔ akɛ wɔsa akɛ atu Sanekpakpa lɛ awo wɔdɛŋ lɛ, nakai wɔwieɔ, jeee tamɔ mɛi ni taoɔ asa gbɔmɛi ahiɛ, shi moŋ tamɔ mɛi ni taoɔ asa Nyɔŋmɔ ni kaa wɔtsuii kwɛɔ lɛ hiɛ.

⁵ Ejaakɛ wɔwieko naadɔkɔmɔ wiemɔ ko pɛŋ, tamɔ bɔ ni nyɛle lɛ, ni wɔtoko hiɛjoomɔ he abla ko hu, Nyɔŋmɔ ji odasefonyo,

⁶ asaŋ wɔtaooo gbɔmɛi ahiɛ nyam yɛ nyɛŋɔɔ loo mɛi krokomɛi aŋɔɔ.

⁷ Tsɛ wɔyɛ hegbɛ akɛ wɔfeɔ wɔhe agboi yɛ nyɛnɔ, akɛni Kristo bɔfoi ji wɔ lɛ; shi moŋ wɔhe jɔ yɛ nyɛteŋ, tamɔ bɔ ni bii anyɛ hiɛɔ lɛ diɛŋtsɛ ebii dɔdɔɔdɔ lɛ.

⁸ Ni akɛni wɔsumɔɔ nyɛ jogbaŋŋ nɛkɛ hewɔ lɛ, wɔna he tsui akɛ jeee Nyɔŋmɔ Sanekpakpa lɛ kɛkɛ wɔkɛaahã nyɛ, shi moŋ wɔ diɛŋtsɛ wɔwala tete, ejaakɛ wɔmiisumɔ nyɛ naakpa.

⁹ Ejaakɛ, anyɛmimɛi, nyɛkaiɔ wɔtɔlɛ kɛ wɔdeŋmegbomɔ lɛ, akɛ bɔ ni afee ni wɔkatsɔ̃ jatsu wɔmiihã nyɛteŋ mɔ ko hewɔ lɛ nyɔɔŋ kɛ shwane fɛɛ wɔmiitsu nii, ni wɔsaa wɔmiijaje Nyɔŋmɔ Sanekpakpa lɛ wɔmiitsɔ̃ɔ nyɛ.

¹⁰ Nyɛ diɛŋtsɛ kɛ Nyɔŋmɔ ji odasefoi akɛ wɔjeŋ ni wɔba yɛ nyɛ mɛi ni nyɛheɔ nyɛyeɔ lɛ ateŋ lɛ eyɛ krɔŋkrɔŋ, eja, ni shwamɔ ko bɛ he.

¹¹ Tamɔ bɔ nɔŋŋ ni nyɛle akɛ wɔhiɛ nyɛteŋ mɔ fɛɛ mɔ tamɔ tsɛ hiɛɔ ebii.

¹² Ni wɔwieɔ wɔtsɔ̃ɔ nyɛ, ni wɔshɛjeɔ nyɛmii hu, ni wɔkpaa nyɛ fai akɛ nyɛnyiɛ bɔ ni sa Nyɔŋmɔ ni tsɛɔ nyɛ kɛbaa lɛ diɛŋtsɛ emaŋtsɛyeli kɛ enunyam lɛ mli lɛ.

¹³ Enɛ hewɔ ni wɔ hu wɔdaa Nyɔŋmɔ shi ni wɔfɔ̃ɔɔ lɛ, ejaakɛ be ni nyɛnine shɛ Nyɔŋmɔ wiemɔ ni nyɛnu yɛ wɔnaa lɛ nɔ lɛ, nyɛmɔ mli akɛ Nyɔŋmɔ wiemɔ, tamɔ bɔ ni eji hu lɛɛlɛŋ lɛ, shi jeee akɛ gbɔmɛi awiemɔ ko. Wiemɔ nɛɛ tsuɔ hewalɛ nii yɛ nyɛ ni nyɛheɔ nyɛyeɔ lɛ nyɛmli.

¹⁴ Ejaakɛ nyɛ lɛ, anyɛmimɛi, nyɛtsɔ̃mɔ mɛi ni kaseɔ Nyɔŋmɔ asafoi ni yɔɔ Yudea yɛ Kristo Yesu mli lɛ, ejaakɛ amanehului ni nyɛna yɛ nyɛ diɛŋtsɛ nyɛmaŋbii lɛ adɛŋ lɛ, no nɔŋŋ amɛ hu amɛna yɛ Yudafoi lɛ adɛŋ;

¹⁵ amɛgbe Nuŋtsɔ Yesu kɛ gbalɔi lɛ hu, ni amɛwa wɔ yi. Amɛsaaa Nyɔŋmɔ hiɛ, ni amɛkɛ gbɔmɛi fɛɛ yeee.

¹⁶ Amɛtsĩɔ wɔ gbɛ hu akɛ wɔkawie wɔtsɔ̃ɔ jeŋmaji lɛ ni ahere amɛyiwala. Ni amɛkɛwoɔ amɛhe eshai lɛ obɔ̃ daa, shi mlifu lɛ enina amɛ kɛmɔ shi.

Paulo shwe akɛ eyasara asafo lɛ ekoŋŋ

¹⁷ Shi wɔ lɛ, anyɛmimɛi, akɛni wɔkɛ nyɛ mli egbala be kukuoo ko yɛ na ni wɔnaaa wɔhe yɛ heloo mli gbɛfaŋ, shi jeee yɛ wɔmumɔ mli hewɔ lɛ, wɔkɛ shwee pii tao akɛ wɔna nyɛhiɛ ekoŋŋ.

¹⁸ Hewɔ lɛ wɔtao akɛ wɔba nyɛŋɔɔ, mi Paulo, mitao akɛ maba shi kome kɛ shii enyɔ fɛɛ shi Satan tsĩ wɔ gbɛ.

¹⁹ Ejaakɛ namɔ ji wɔhiɛnɔkãmɔ loo wɔmiishɛɛ loo wɔshwãa akekre yɛ wɔNuŋtsɔ Yesu Kristo hiɛ, yɛ ebaa be lɛ mli lɛ? Ani jeee nyɛ ni?

²⁰ Ejaakɛ nyɛ nyɛ ji wɔnunyam kɛ wɔmiishɛɛ.