1 Tesalonikabii 1 - ŊMALƐ KRƆŊKRƆŊ LƐ

Ŋamɔ

¹ Paulo kɛ Silvano kɛ Timoteo ŋma yahã Tesalonikabii asafo ni yɔɔ Nyɔŋmɔ, Tsɛ lɛ, kɛ Nuŋtsɔ Yesu Kristo mli lɛ: Dromɔ kɛ hejɔlɛ ahã nyɛ!

Tesalonikabii ashihilɛ kɛ amɛhemɔkɛyeli

² Wɔdaa Nyɔŋmɔ shi daa yɛ nyɛ fɛɛ nyɛhewɔ, ni wɔfɔ̃ɔɔ nyɛtãtsii yɛ wɔsɔlemɔi amli.

³ Ni wɔkaiɔ nyɛhemɔkɛyeli nitsumɔ lɛ kɛ nyɛsuɔmɔ mɔdɛŋbɔɔ lɛ kɛ nyɛhiɛ ni kã wɔNuŋtsɔ Yesu Kristo nɔ lɛ mli hiɛmiamɔ lɛ yɛ Nyɔŋmɔ ni ji wɔTsɛ lɛ hiɛ.

⁴ Ejaakɛ, anyɛmimɛi ni Nyɔŋmɔ sumɔɔ, wɔle halamɔ ni ahala nyɛ lɛ,

⁵ akɛ wɔSanekpakpa lɛ baaa nyɛŋɔɔ yɛ wiemɔ mli kɛkɛ, shi moŋ yɛ Mumɔ Krɔŋkrɔŋ lɛ hewalɛ kɛ nɔmimaa babaoo mli, tamɔ bɔ ni nyɛle lɛ, no ji bɔ ni wɔtsɔ̃ wɔba wɔjeŋ yɛ nyɛteŋ yɛ nyɛhewɔ lɛ.

⁶ Ni nyɛ lɛ, nyɛtsɔ̃mɔ mɛi ni kaseɔ wɔ kɛ Nuŋtsɔ lɛ, akɛni nyɛkɛ Mumɔ Krɔŋkrɔŋ mli miishɛɛ mɔ wiemɔ lɛ mli yɛ amanehulu babaoo mli lɛ.

⁷ Ni no ehã nyɛtsɔ̃mɔ nɔkwɛmɔnɔ nyɛhã mɛi fɛɛ ni heɔ yeɔ yɛ Makedonia kɛ Akaia lɛ.

⁸ Ejaakɛ nyɛŋɔɔ Nuŋtsɔ lɛ wiemɔ lɛ jɛ ni egbɛ eshwã, jeee yɛ Makedonia kɛ Akaia kɛkɛ, shi moŋ nyɛhe ni nyɛheɔ Nyɔŋmɔ nɔ nyɛyeɔ lɛ ejije kɛtee he fɛɛ he, ni ehĩaaa wɔ nɔ ko kɛɛmɔ tete.

⁹ Ejaakɛ amɛ diɛŋtsɛ amɛgbaa wɔhe sane bɔ ni wɔba nyɛŋɔɔ kɛ bɔ ni nyɛkpale kɛjɛ amãgãi ahe kɛba Nyɔŋmɔ ŋɔɔ ni nyɛbasɔ̃mɔ anɔkwa Nyɔŋmɔ hiɛkãalɔ lɛ

¹⁰ ni nyɛkwɛ eBi lɛ ni etee lɛ shi kɛjɛ gbohii ateŋ lɛ gbɛ kɛjɛ ŋwɛi, Yesu ni jie wɔ kɛjɛ mlifu ni baaba lɛ mli lɛ.