1 Samuel 7 - ŊMALƐ KRƆŊKRƆŊ LƐ

¹ No hewɔ lɛ, Kiriat-Yearimbii lɛ bawo Yehowa Kpãŋmɔ Adeka lɛ, ni amɛkɛtee Abinadab we lɛ ni ma Kiriat-Yearim gɔŋ lɛ nɔ lɛ mli; ni amɛwo Abinadab bi Eleazar osɔfo koni ebu Yehowa Kpãŋmɔ Adeka lɛ he.

Samuel kwɛ Israel nɔ

² Kpãŋmɔ Adeka lɛ tsɛ yɛ Kiriat-Yearim, ejaakɛ eye afii nyɔŋmai enyɔ sɔŋŋ yɛ jɛi, kɛjɛ gbi nɔ ni akɛ lɛ yashɛ jɛi lɛ, ni Israel fɛɛ ye Yehowa he kumai.

³ Kɛkɛ ni Samuel kɛɛ Israelbii lɛ akɛ, “Kɛji nyɛmiikpale kɛba Yehowa ŋɔɔ kɛ nyɛtsui fɛɛ lɛ, no lɛ nyɛjiea maŋsɛɛ jemawɔji lɛ kɛ Astarte amãgãi lɛ hu ni nyɛyɔɔ yɛ nyɛteŋ lɛ nyɛsherɛa nyɛshwiea koni nyɛkɛ nyɛhe ahãa Yehowa kwraa; asaŋ koni nyɛsɔmɔ ekome too; ni lɛ hu eeejie nyɛ yɛ Filistibii lɛ adɛŋ.”

⁴ Israelbii lɛ damɔ wiemɔ nɛɛ nɔ ni amɛ jie Baal kɛ Astarte amãgãi ni amɛyɔɔ lɛ fɛɛ yɛ amɛteŋ lɛ amɛsherɛ amɛshwie, ni amɛsɔmɔ Yehowa kome pɛ.

⁵ Samuel kɛɛ Israelbii lɛ akɛ, “Nyɛyabuaa nyɛhe naa yɛ Mizpa, ni masɔle makpa Yehowa fai mahã nyɛ.”

⁶ Israelbii lɛ bua amɛhe naa yɛ Mizpa. Amɛyɛ nu amɛshwie shi yɛ Yehowa hiɛ, ni amɛhi ŋmãa nakai gbi lɛ, ni amɛkɛɛ akɛ, “Wɔtɔ̃ Yehowa nɔ.” Ni Samuel hi Mizpa, ni ekojo Israelbii lɛ ateŋ saji yɛ jɛi.

⁷ Be ni Filistibii lɛ nu akɛ Israelbii lɛ ebabua amɛhe naa yɛ Mizpa lɛ, Filistibii amaŋtsɛmɛi lɛ fã ta koni amɛbatua Israelbii lɛ. Be ni Israelbii lɛ nu ta ni Filistibii lɛ efã lɛ he lɛ, amɛshe gbeyei,

⁸ ni amɛkɛɛ Samuel akɛ, “Yaa nɔ ni otsɛ Yehowa, wɔNyɔŋmɔ lɛ, ohã wɔ koni ehere wɔ yɛ Filistibii lɛ adɛŋ.”

⁹ Kɛkɛ ni Samuel ŋɔ too gwantɛŋbi ni atseko lɛ fufɔ, ni eshã lɛ emuu akɛ shãa afɔle ekɛhã Yehowa. Ni Samuel sɔle ekpa Yehowa fai ehã Israelbii lɛ, ni Yehowa here lɛ nɔ.

¹⁰ Be ni Samuel shãa afɔle lɛ, Filistibii lɛ tsi bɛŋkɛ koni amɛbatua Israelbii lɛ. Shi Yehowa hã ŋwɛi shimɔ gbeyeigbeyei wo Filistibii lɛ nakai gbi lɛ, ni ehã amɛhiɛ bɔ, ni amɛnyɛɛɛ Israelbii lɛ ahiɛ amɛdamɔ.

¹¹ Israelbii lɛ fã kɛjɛ Mizpa ni amɛnyiɛ Filistibii lɛ asɛɛ ni amɛtswia amɛ nii aahu kɛyashɛ Bet-Kar jɔɔŋgbɛ.

¹² Kɛkɛ ni Samuel wo tɛ ekɛma shi yɛ Mizpa kɛ Shem teŋ, ni ewo lɛ gbɛi akɛ “Ebenezer” ejaakɛ ekɛɛ, “Biɛ Yehowa eye ebua wɔ kɛbashi.”

¹³ Aye Filistibii lɛ anɔ bɔ sɔŋŋ ni kɛjɛ no sɛɛ lɛ amɛnaji enyɔ nɛkɛ yiii Israelbii lɛ akpokpai lɛ anɔ dɔŋŋ. Ni Samuel yinɔ fɛɛ lɛ Yehowa eŋmɛɛɛ Filistibii lɛ agbɛ koni amɛbatua Israel.

¹⁴ Maji fɛɛ ni Filistibii lɛ eshɔ̃ yɛ Israelbii lɛ adeŋ lɛ, amɛkpale fɛɛ amɛhã Israel ekoŋŋ, kɛjɛ Ekron aahu kɛyashwie Gat. Israel nine shɛ eshikpɔji fɛɛ hu ni yaje Filistibii lɛ adɛŋ lɛ anɔ. Kɛkɛ ni toiŋjɔlɛ ba Israelbii lɛ kɛ Amorbii lɛ hu ateŋ.

¹⁵ Samuel kwɛ Israel nɔ ewala gbii abɔ fɛɛ.

¹⁶ Ni daa afi lɛ efãa gbɛ eyasaraa Betel kɛ Gilgal kɛ Mizpa, ni ekojoɔ sajisaji ni eba hei nɛɛ,

¹⁷ ni ekuɔ esɛɛ kɛbaa Rama, ejaakɛ jɛi ewe yɔɔ; ni jɛi hu ekwɛɔ maŋbii lɛ ateŋ saji yɛ. Samuel ma afɔleshãa latɛ yɛ Rama ehã Yehowa.