1 Samuel 4 - ŊMALƐ KRƆŊKRƆŊ LƐ

Ashɔ̃ Kpãŋmɔ Adeka lɛ

¹ Filistibii lɛ fã ta koni amɛkɛ Israelbii lɛ ayawu. Israelbii lɛ yagba ta yɛ Ebenezer, ni Filistibii lɛ hu gba ta yɛ Afek.

² Filistibii lɛ gba wo Israelbii lɛ, ni be ni akɛ ta lɛ lɛɛ shi lɛ, Filistibii lɛ anine tsɔ̃ Israelbii lɛ anɔ, ni Israel tabilɔi aaafee akpei ejwɛ nyɔ yɛ ta lɛ mli yɛ ŋa lɛ nɔ.

³ Be ni Israel tabilɔi lɛ ku amɛsɛɛ kɛjɛ ta lɛ naa kɛba amɛshitoohe lɛ, Israel maŋ onukpai lɛ kɛɛ akɛ, “Mɛɛ hewɔ ni Yehowa ŋmɛ gbɛ ni Filistibii lɛ anine tsɔ̃ wɔnɔ ŋmɛnɛ nɛkɛ? Nyɛhãa ni wɔyaŋɔa Yehowa Kpãŋmɔ Adeka lɛ yɛ Shilo kɛbaa biɛ koni ebahi wɔteŋ, koni ehere wɔyiwala yɛ wɔhenyɛlɔi lɛ adɛŋ.”

⁴ No hewɔ lɛ, atsu atee Shilo, ni ayawo Yehowa Kpãŋmɔ Adeka lɛ kɛ enɔ kerubim lɛ, ni ji Yehowa sɛ̃i lɛ, kɛba. Hofni kɛ Finehas, ni ji Eli bihii enyɔ lɛ, fata he ni akɛ Nyɔŋmɔ Kpãŋmɔ Adeka lɛ ba lɛ.

⁵ Be ni Yehowa Kpãŋmɔ Adeka lɛ bashɛ shitoohe lɛ mli lɛ, Israelbii lɛ fɛɛ bɔ oshe waa bɔ ni ehã shikpɔŋ hoso.

⁶ Be ni Filistibii lɛ nu oshebɔɔ lɛ, amɛbi akɛ, “Mɛɛ oshe abɔɔ waa yɛ Hebribii lɛ ashitoohe lɛ mli nɛkɛ nɛɛ?” Be ni amɛbana amɛle akɛ Yehowa Kpãŋmɔ Adeka lɛ ebashɛ Israelbii lɛ ata lɛ mli lɛ,

⁷ Filistibii lɛ she gbeyei, ni amɛkɛɛ, “Jemawɔŋ ko eba amɛta lɛ mli. Sane eye wɔ ei! Nɛkɛ nɔ ko bako dã.

⁸ Sane eye wɔ! Namɔ po aaajie wɔ yɛ jemawɔji ni ahe yɔɔ gbeyei nɛɛ adɛŋ? Jemawɔji nɛɛ ni hã haomɔ ba Ijiptbii lɛ anɔ yɛ shiaŋa lɛ nɔ lɛ.

⁹ Nyɛwajea nyɛhe, Filistibii, ni nyɛfea hii koni nyɛkatsɔmɔ Hebribii lɛ anyɔji tamɔ bɔ ni nyɛye amɛ nyɔŋ lɛ.”

¹⁰ Lɛɛlɛŋ akɛ Filistibii lɛ wu ta lɛ ekãa naa, ni amɛye Israelbii lɛ anɔ kunim, ni Israelbii lɛ jo foi yɛ Filistibii lɛ ahiɛ kɛtee amɛbuui amli. Agbe mɛi babaoo diɛŋtsɛ, ejaakɛ Israel tabilɔi aaafee akpei nyɔŋmai etɛ̃ ni nyiɛɔ amɛnane nɔ nyɔnyɔɔi.

¹¹ Nyɔŋmɔ Kpãŋmɔ Adeka lɛ ashɔ̃, ni Hofni kɛ Finehas, Eli bihii enyɔ lɛ, nyɔ.

Eli gbele

¹² Benyaminnyo ko jo foi kɛjɛ ta lɛ naa kɛba Shilo nakai gbi lɛ nɔŋŋ kɛ atade ni etserɛ kɛ eyiteŋ su.

¹³ Nuu nɛɛ bashɛ shi be mli ni Eli ta sɛ̃i nɔ yɛ agbo lɛ naa ni eesra, ejaakɛ etsui enyɔɔɔ emli yɛ Nyɔŋmɔ Kpãŋmɔ Adeka lɛ hewɔ. Nuu lɛ bote maŋ lɛŋ ni be ni ebabɔ amaniɛ ni ekɛjɛ ta lɛ naa lɛ, maŋ lɛ fɛɛ wo yara.

¹⁴ Be ni Eli nu blɔmɔ hoo lɛ ebi akɛ, “Te blɔmɔ ni abolɔɔ hoo nɛɛ shishi hu?” Nuu lɛ sha ehe ni ebabɔ Eli amaniɛ lɛ.

¹⁵ No mli lɛ Eli eye afii nyɔŋmai nɛɛhu kɛ kpaanyɔ, ni ehiŋmɛii anɔ eha, ni enaaa nii ekpakpa ko.

¹⁶ Nuu lɛ kɛɛ Eli akɛ, “Mi ji mɔ ni jɛ ta lɛ naa ba lɛ, ni ŋmɛnɛ nɔŋŋ mijo foi yɛ ta lɛ naa.” Kɛkɛ ni Eli bi nuu lɛ akɛ, “Ni te emli tamɔ tɛŋŋ, mibi?”

¹⁷ Bɔfo lɛ here nɔ ni ekɛɛ akɛ, “Israel ejo foi yɛ Filistibii lɛ ahiɛ, wɔmaŋbii lɛ ateŋ mɛi babaoo diɛŋtsɛ enyɔ. Obihii, Hofni kɛ Finehas hu enyɔ, ni asaŋ Nyɔŋmɔ Kpãŋmɔ Adeka lɛ ashɔ̃.”

¹⁸ Nyɔŋmɔ Kpãŋmɔ Adeka lɛ tã ni atsi nɛkɛ pɛ ni Eli kpa yɛ esɛi lɛ nɔ eyagbee esɛɛgbɛ yɛ maŋ agbo lɛ he, ni ekuɛŋ wu kũ, ni egbo, ejaakɛ egbɔ ni egbɔmɔtso tsii. Nakai be mli lɛ Eli ekwɛ Israelbii anɔ afii nyɔŋmai ejwɛ.

Finehas ŋa lɛ hu gbele

¹⁹ Eli shaayoo, ni ji Finehas ŋa lɛ, hiɛ musu, ni eshɛ efɔmɔ be etã. Be ni yoo lɛ nu amaniɛ lɛ akɛ ashɔ̃ Nyɔŋmɔ Kpãŋmɔ Adeka lɛ, ni eshaanuu lɛ kɛ ewu lɛ fɛɛ hu egboi lɛ, fɔmɔ ta ehe amrɔ lɛ nɔŋŋ, ni eho esɔ̃ shi ni efɔ.

²⁰ Be ni yoofɔyoo lɛ heɔ egbo yɛ fɔmɔ lɛ mli lɛ, yei ni yɔɔ emasɛi ni amɛwaa lɛ kɛ fɔmɔ lɛ kɛɛ lɛ akɛ, “Kaashe gbeyei, shi ofɔ binuu.” Shi efooo mli, asaŋ ekɛ ejwɛŋmɔ efɔ̃ɔɔ nɔ.

²¹ Ewo abifao lɛ gbɛi akɛ, “Ikabod,” ejaakɛ ekɛɛ akɛ, “Israel nyam etã,” hewɔ lɛ ashɔ̃ Nyɔŋmɔ Kpãŋmɔ Adeka lɛ kɛtee, ni asaŋ eshaanuu lɛ kɛ ewu lɛ fɛɛ egboi.

²² Esaa ekɛɛ akɛ, “Israel nyam etã, ejaakɛ ashɔ̃ Nyɔŋmɔ Kpãŋmɔ Adeka lɛ.”