1 Samuel 30 - ŊMALƐ KRƆŊKRƆŊ LƐ

David kɛ Amalekbii lɛ wu ta

¹ Gbii etɛ̃ sɛɛ be ni David kɛ ewebii lɛ bashɛ Ziklag lɛ, amɛyanina akɛ Amalekbii lɛ ebatua Yuda wuoyigbɛ shikpɔŋ lɛ kɛ Ziklag hu, ni amɛwo Ziklag mli la amɛshã maŋ lɛ,

² ni amɛŋɔ emli yei blublu kɛ mɛi fɛɛ ni yɔɔ maŋ lɛ mli, kɛjɛ gbekɛbii anɔ aahu kɛyashi onukpai anɔ fɛɛ. Amɛgbeee mɔ ko mɔ ko fe akɛ amɛloo amɛ fɛɛ kɛtee be ni amɛshiɔ lɛ.

³ No hewɔ lɛ, be ni David kɛ ewebii lɛ shɛɔ shi lɛ ashã maŋ lɛ, ni aŋɔ amɛŋamɛi kɛ amɛbihii kɛ amɛbiyei fɛɛ nom kɛtee.

⁴ Kɛkɛ ni David kɛ ewebii ni ekɛnyiɛ lɛ wo yara, ni amɛfo kɛyashi etɔ amɛ bɔ ni amɛnyɛɛɛ amɛfo dɔŋŋ.

⁵ David ŋamɛi enyɔ lɛ, ni ji Ahinoam, Yezreelyoo lɛ, kɛ Abigail Nabal Karmelnyo lɛ ŋa okulafo lɛ, hu Amalekbii lɛ ŋɔ amɛ nom kɛtee.

⁶ Sane wulu bakã David nɔ, ni ehe jara lɛ jogbaŋŋ diɛŋtsɛ, ejaakɛ ewebii lɛ kɛɛ amɛbaatswia lɛ tɛ, ejaakɛ mɔ fɛɛ mɔ musuŋ miishã lɛ yɛ ebihii kɛ ebiyei lɛ ahewɔ. Shi Yehowa, David Nyɔŋmɔ lɛ, waje David ni ewo lɛ hewalɛ.

⁷ Kɛkɛ ni David kɛɛ Osɔfo Abiatar, ni ji Ahimelek bi lɛ akɛ, “Yaakɔ nɔ ni akɛbiɔ nii lɛ obahã mi.” Abiatar kɛ nii lɛ bahã David.

⁸ Kɛkɛ ni David bi Yehowa nii ekɛɛ, “Mitiu gbɔmɛi nɛɛ lo?” Yehowa hã hetoo akɛ, “Tiumɔ amɛ, bɔ fɛɛ bɔ ni fee lɛ obaaya oyanina amɛ yɛ gbɛteŋ, ni onine baashɛ nyɛgbɔmɛi lɛ anɔ shweshweeshwe.”

⁹ No hewɔ lɛ, David kɛ hii ohai ekpaa ni fata ehe lɛ yi gbɛ. Be ni amɛshɛ Besor Faa lɛ naa lɛ, esɛɛbii lɛ ateŋ mɛi ni emiii akɛ amɛaafo faa lɛ, ashi amɛ yɛ jɛi,

¹⁰ ni David kɛ hii ohai ejwɛ tiu Amalekbii ofɔ̃yelɔi lɛ. Eshi hii ohai enyɔ yɛ faa lɛ naa ejaakɛ etɔ amɛ bliboo bɔ ni amɛnyɛɛɛ Besor Faa lɛ amɛfo.

¹¹ Be ni amɛyaa lɛ, David webii lɛ na Ijiptnyo oblanyo fioo ko yɛ shiaŋa lɛ nɔ, ni amɛkɛ lɛ batsɔ̃ɔ David. Ahã oblanyo nɛɛ niyenii eye, kɛ nu hu ni enu;

¹² ni asaŋ ahã lɛ agbãmi kɛ wainyibii shabii enyɔ hu. Be ni eye nii nɛɛ sɛɛ lɛ ehiɛ tserɛ lɛ, ejaakɛ oblanyo nɛɛ eye gbii etɛ̃ ni nɔ ko eyako edaaŋ, niyenii jio, nu jio.

¹³ Agbɛnɛ David bi oblanyo lɛ akɛ, “Namɔ bi ji bo; ni nɛgbɛ hu ojɛ?” Oblanyo lɛ jie naa akɛ, “Ijiptnyo bi ji mi. Ŋmɛnɛ ji gbii etɛ̃ ni minuŋtsɔ lɛ shi mi eŋmɛ shi ni etee, ejaakɛ hela bamɔ mi.

¹⁴ Wɔtee wɔyatua shikpɔŋ ni yɔɔ Keretibii lɛ awuoyigbɛ he ni yɔɔ Yuda shikpɔŋ lɛ nɔ lɛ, kɛ Kalebbii hu awuoyigbɛ, ni wɔma Ziklag maŋ lɛ naa la wɔshã.”

¹⁵ David bi oblanyo lɛ akɛ, “Kɛji mikɛɛ oyatsɔ̃ɔ mi ofɔ̃yelɔi nɛɛ lɛ, obaaya lo?” Oblanyo lɛ here nɔ ekɛɛ, “Okɛ Nyɔŋmɔ akã mi kitã akɛ ogbeŋ mi, ni asaŋ okpaleŋ mi ohaŋ minuŋtsɔ lɛ, ni mikɛ bo baaya miyatsɔ̃ɔ bo ofɔ̃yelɔi lɛ.”

¹⁶ Be ni oblanyo lɛ kɛ David tee lɛ ayanina ofɔ̃yelɔi lɛ ni amɛgbɛ amɛshwã he ni amɛyato shi yɛ lɛ fɛɛ, ni aayeyee nii, ni aanunuu dãi, ni aajojoo yɛ nibii babaoo ni amɛyahahaa yɛ Filistibii ashikpɔŋ lɛ kɛ Yuda shikpɔŋ lɛ hu nɔ lɛ ahewɔ.

¹⁷ Kɛkɛ ni David kɛshwie amɛnɔ, ni egbe amɛ kɛjɛ hulushinyɔɔ mli aahu kɛyashi enɔ jetsɛremɔ gbɛkɛ mli. Amalekbii lɛ ateŋ mɔ ko mɔ ko he ejeee gbele mli fe oblahii ohai ejwɛ komɛi ni shara yoomai ni amɛtara nɔ kɛjo foi lɛ.

¹⁸ David nine shɛ nibii fɛɛ ni Amalekbii lɛ baloo kɛtee lɛ anɔ, kɛ eŋãmɛi enyɔ lɛ hu.

¹⁹ Nibii ni Amalekbii lɛ baloo lɛ ateŋ eko kwraa elaajeee. Nɔ bibioo ni jio, nɔ wulu ni jio, binuu ni jio, bo biyoo ni jio, David nine shɛ fɛɛ tswɛm nɔ kɛba.

²⁰ Ni David loo toi kɛ tsinai fɛɛ ni yɔɔ Amalekbii anine nɔ lɛ, ni akpala kooloi nɛɛ kɛnyiɛ hiɛ belɛ aapai aakɛɛ akɛ, “Enɛ lɛ David ofɔ̃yelinii nɛ.”

²¹ Kɛkɛ ni David bashɛ hii ohai enyɔ lɛ ni bɔ ni etɔ amɛ bliboo hewɔ lɛ, amɛnyɛɛɛ David sɛɛ amɛnyiɛ kɛtiu Amalekbii ofɔ̃yelɔi lɛ, ni no hewɔ lɛ, David hã amɛhi shi yɛ Besor Faa lɛ naa lɛ aŋɔɔ. Gbɔmɛi nɛɛ fã kɛbakpee David kɛ mɛi ni kɛ lɛ nyiɛ lɛ. Be ni David bɛŋkɛ amɛ lɛ ehã amɛ “Sɛɛ fɛɛ?”

²² Kɛkɛ ni mɛi ni kɛ David tee lɛ ateŋ yitsoŋwalɔi kɛ yakagbɔmɛi lɛ kɛɛ akɛ, “Akɛni amɛbɛ mli ni wɔtee lɛ hewɔ lɛ nibii ni wɔyashɔ̃ kɛba lɛ, amɛnɔ bɛ mli fe mɔ oŋa kɛ obii ni obaanyɛ obakpala amɛ kɛya kɛkɛ.”

²³ Shi David here amɛ nɔ akɛ, “Anyɛmimɛi, kɛji Yehowa ebu wɔhe, ni ehã wɔye mɛi ni batua wɔ lɛ anɔ kunim lɛ, nyɛkafea nakai yɛ nii ni Yehowa ehã wɔ lɛ he.

²⁴ Ni namɔ po aaabu nyɛ bem yɛ nɛkɛ sane nɛɛ mli? Naa, bɔ ni mɔ ni tee ta lɛ baana akɛ egbɛnaa lɛ, nakai nɔŋŋ mɔ ni bu nibii ahe yɛ sɛɛ hu baana akɛ egbɛnaa. Abaaja mɔ fɛɛ mɔ pɛpɛɛpɛ.”

²⁵ Kɛjɛ nakai gbi lɛ nɔ lɛ David wiemɔ nɛɛ tsɔ̃ akpɔ kɛ mla ehã Israelbii, ni ekã shi nakai kɛbashi ŋmɛnɛ.

²⁶ Be ni David bashɛ Ziklag lɛ, etsu akɛ nibii ni eyaye amɛ ofɔ̃ lɛ eko tee ayake Yuda maŋ onukpai fɛɛ ni ji ehe gbɔmɛi kpakpai lɛ kɛ shɛɛ akɛ, “Naa, miyaye ofɔ yɛ Yehowa henyɛlɔi lɛ ashikpɔŋ lɛ nɔ. Nɔ ni mikɛɛ akɛbake nyɛ nɛ.”

²⁷ Aja nibii nɛɛ ahã maŋ onukpai ni yɔɔ Betel kɛ Rama yɛ Yuda wuoyigbɛ lɛ kɛ Yatir,

²⁸ kɛ Aroer kɛ Sifmot kɛ Eshtemoa,

²⁹ kɛ Rakal kɛ Yerameelbii kɛ Kenbii lɛ hu amaji lɛ amli lɛ.

³⁰ Ahã onukpai ni yɔɔ Horma kɛ Borashan kɛ Atak

³¹ kɛ Hebron fɛɛ eko. David tsu akɛ nikee tee hei fɛɛ ni lɛ kɛ ewebii lɛ enyiɛnyiɛ nyɛsɛɛ ko lɛ.