1 Samuel 26 - ŊMALƐ KRƆŊKRƆŊ LƐ

David kɛ Saul he ke lɛ ekoŋŋ

¹ Zifbii komɛi ba Saul ŋɔɔ yɛ Gibea amɛbakɛɛ lɛ akɛ, “Naa, David ebatee ehe yɛ Hakila Gɔŋkpɔ ni yɔɔ Yuda ŋa kplanaa lɛ bokãgbɛ lɛ nɔ.”

² No hewɔ lɛ, Saul hala Israel hii akpei etɛ̃, ni ekɛ amɛ yiŋ kɛtee Zif ŋa lɛ nɔ koni eyatao David.

³ Saul yato shi yɛ Hakila Gɔŋkpɔ ni yɔɔ gbɛ ni kã Yuda ŋa lɛ bokãgbɛ lɛ he lɛ nɔ. Shi David tee nɔ ehi shiaŋa lɛ nɔ. Be ni enu yɛ ŋa lɛ nɔ akɛ Saul enyiɛ esɛɛ kɛba shiaŋa lɛ nɔ lɛ,

⁴ etsu mɛi kɛtee amɛyasara amɛkwɛ akɛ Saul eba shiaŋa lɛ nɔ lɛɛlɛŋ lo.

⁵ Fee sɛɛ lɛ David diɛŋtsɛ tee Saul shitoohe lɛ, ni eyana he pɔtɛɛ ni Saul kɛ etatsɛ Abner, Nerbi lɛ, kãmɔ. Saul kã shi ewɔ, ni ewebii tabilɔi ebɔle ehe kɛkpe.

⁶ Kɛkɛ ni David bi Ahimelek, Hitnyo lɛ, kɛ Zeruia bi Abishai, Yoab nyɛminuu lɛ, akɛ, “Nyɛteŋ namɔ kɛ mi aaatee Saul shitoohe lɛ mli?” Abishai here nɔ ekɛɛ, “Mi kɛ bo aaatee!”

⁷ No hewɔ lɛ, David kɛ Abishai tee Saul tabilɔi lɛ ashitoohe lɛ mli nyɔɔŋ lɛ mli. Amɛyanina Saul ni ekã ewebii lɛ ateŋ ewɔ, ni ekpɔlɔ lɛ tsɛkɛ shi yɛ eyitsogbɛ; ni Abner kɛ tabilɔi lɛ kãmɔ ehewɔ kɛbɔle lɛ kɛkpe.

⁸ Kɛkɛ ni Abishai kɛɛ David akɛ, “Nyɔŋmɔ ejie ohenyɛlɔ lɛ ewo odɛ̃ŋ ŋmɛnɛ. No hewɔ lɛ, agbɛnɛ hã matsu lɛ akplɔ lɛ shi koome kɛmɔ shikpɔŋ nyɔŋlo, mihaŋ etia shii enyɔ.”

⁹ Shi David kɛɛ Abishai akɛ, “Kaakpãtã ehiɛ, ejaakɛ mɔ ko mɔ ko bɛ ni baawo enine nɔ yɛ mɔ ni Yehowa efɔ lɛ mu nɔ ni mɔ lɛ aaaŋɔ ehe aye.”

¹⁰ David kɛɛ Abishai ekoŋŋ akɛ, “Mina Yehowa akɛ Yehowa diɛŋtsɛ ni aaatswa Saul nɔ, aloo ebe baashɛ ni eeegbo, aloo eeetee ta ni eeeyanyɔ yɛ ta lɛ mli.

¹¹ Yehowa akpa ashwie akɛ mi mawo minine nɔ yɛ mɔ ni lɛ Yehowa efɔ lɛ mu lɛ nɔ. Bo lɛ fãa akplɔ lɛ ni tsɛkɛ shi yɛ eyitsogbɛ lɛ, ni owo nu kɛ kpulu lɛ kɛkɛ ni wɔtee.”

¹² Kɛkɛ ni David kɔ akplɔ lɛ ni ewo nu kpulu lɛ yɛ Saul yiteŋgbɛ, ni amɛje jɛi amɛtee. Mɔ ko mɔ ko enaaa amɛ lɛ, mɔ ko mɔ ko hiɛ hu etsɛ̃ɛɛ ni mɔ ko mɔ ko hu leee. Mɔ fɛɛ mɔ ewɔ ejaakɛ Yehowa ehã wɔ ni tsii enyɔ amɛnɔ.

¹³ Be ni David etse mli kɛtee eyadamɔ gɔŋ lɛ yiteŋ yɛ sɛɛ flɛŋŋ, he ni gbɛ shwaŋŋ kã ekɛ Saul teŋ lɛ,

¹⁴ ebolɔ etsɛ Saul tabilɔi lɛ kɛ Abner, Ner bi lɛ, ni ekɛɛ akɛ, “Ohereee nɔ lo, Abner?” Abner here nɔ akɛ, “Bo namɔ obolɔɔ otsimɔɔ maŋtsɛ toi lɛ?”

¹⁵ David here Abner nɔ akɛ, “Abner, kwɛɛ, jeee mikɛɛ bo ji hii fɛɛ amli nuu yɛ Israel lɛ? Te aye tɛŋŋ ni obuuu onuŋtsɔ maŋtsɛ lɛ he, ni mɔ ko jɛ mɛi lɛ ateŋ ba ni kulɛ ebaakpãtã onuŋtsɔ maŋtsɛ lɛ hiɛ lɛ?

¹⁶ Ofeee ni ahi kwraa! Mina Yehowa akɛ nyɛsa gbele, ejaakɛ nyɛnyɛɛɛ nyɛbu nyɛnuŋtsɔ, ni ji gbɔmɔ ni Yehowa efɔ lɛ mu, lɛ he. Agbɛnɛ, kwɛ nɛgbɛ maŋtsɛ akplɔ lɛ kɛ enu kɛ kpulu ni ma eyitsogbɛ lɛ yɔɔ?”

¹⁷ Saul yoo David gbee ni ekɛɛ akɛ, “Mibi David, bo owieɔ lɛ?” David here nɔ akɛ, “Minuŋtsɔ Maŋtsɛ, mi ni.

¹⁸ Shi mɛɛba ni minuŋtsɔ nyiɛ etsulɔ sɛɛ nɛkɛ nɛɛ? Mɛni mifee; mɛɛ efɔŋ po mifee?

¹⁹ Taflatsɛ, minuŋtsɔ maŋtsɛ abo nɔ ni etsulɔ yɔɔ kɛɛmɔ toi fioo. Kɛji Yehowa diɛŋtsɛ ni etee bo shi ewo mi lɛ, mibashã he afɔle kɛkpa he fai. Shi kɛji gbɔmɛi adesai abii ni ehã ote shi owo mi lɛ, no lɛ Yehowa aaawo amɛ he nyɔmɔ, ejaakɛ amɛshwie mi ŋmɛnɛ akɛ mikahi Yehowa shikpɔŋ lɛ nɔ, shi moŋ miya ni miyasɔmɔ jemawɔji.

²⁰ Kɛji magbo po lɛ, kaahã migbo yɛ he ko ni jeee Yehowa shikpɔŋ nɔ, ejaakɛ naa Israel maŋtsɛ eba mi oflikiti taomɔ tamɔ agbɔbiɔ afi yɛ gɔji anɔ lɛ.”

²¹ Kɛkɛ ni Saul here nɔ ekɛɛ akɛ, “Mifee efɔŋ! Mibi David, kpalemɔ ni oba. Mifeŋ bo efɔŋ ko dɔŋŋ, ejaakɛ otsɔ̃ɔ mi ŋmɛnɛ gbi nɛɛ akɛ miwala jara wa hã bo. Miye kwashiai asane lɛɛlɛŋ, ni mitɔ̃ fe nine.”

²² David to he ehã Saul akɛ, “Maŋtsɛ, naa okpɔlɔ lɛ. Hã oblahii lɛ ateŋ mɔ kome aba ni ebaŋɔ.

²³ Yehowa woɔ mɔ nyɔmɔ yɛ mɔ fɛɛ mɔ lɛ ejalɛ kɛ enɔkwayeli naa. Yehowa tu bo ewo midɛŋ ŋmɛnɛ, shi mi ni misumɔɔɔ akɛ miwoɔ minine nɔ yɛ mɔ ni Yehowa efɔ lɛ mu lɛ nɔ.

²⁴ Bɔ ni mikɛ ohe ke bo ŋmɛnɛ nɛɛ lɛ, nakai nɔŋŋ mi hu Yehowa aaabaa miwala yi, ni eeejie mi yɛ nɔnai fɛɛ mli.”

²⁵ Kɛkɛ ni Saul kɛɛ David akɛ, “Mibi David, Naa Nyɔŋmɔ aaajɔɔ bo. Oootsu nibii wuji, ni oooye fɛɛ mli kunim.” Kɛkɛ ni David yiŋ etee, ni Saul hu ku esɛɛ kɛtee ejɛɛhe lɛ.