1 Samuel 23 - ŊMALƐ KRƆŊKRƆŊ LƐ

¹ Abagba David akɛ Filistibii lɛ eyatua Keila maŋ lɛ, ni amɛmiiha ŋmaa ni yɔɔ ŋmashaahei lɛ.

² No hewɔ lɛ, David bi Yehowa nii akɛ, “Ani miya ni miyatua Filistibii lɛ kɛhere Keila lo?” Yehowa here David nɔ ekɛɛ, “Yaa ni oyatua Filistibii lɛ ni ohere Keila.”

³ Shi David webii lɛ kɛɛ lɛ akɛ, “Naa, Yuda shikpɔŋ lɛ nɔ he ni wɔyɔɔ yɛ biɛ nɛɛ po lɛ, wɔmiishe gbeyei, aahu ni wɔtee Keila wɔkɛɛ wɔkɛ Filistibii atai lɛ yaawu.”

⁴ Enɛ hã David ku sɛɛ ni ebi Yehowa nii ekoŋŋ. Yehowa kɛɛ lɛ akɛ, “Yaa Keila lɛ, shi mibahã oye Filistibii lɛ anɔ kunim.”

⁵ No hewɔ lɛ, David kɛ ewebii lɛ fã kɛtee Keila ni amɛkɛ Filistibii lɛ yawu, ni amɛgbe Filistibii lɛ butuu, ni amɛloo Filistibii lɛ akooloi kɛtee. Bɔ ni fee ni David here Keilabii ayiwala nɛ.

⁶ Be mli ni Ahimelek bi Abiatar jo foi kɛtee David ŋɔɔ yɛ Keila lɛ ehiɛ efod lɛ kɛtee.

⁷ Be ni ayagba Saul akɛ David yɛ Keila lɛ, nɔ ni Saul kɛɛ ji akɛ “Nyɔŋmɔ ejie David ewo midɛŋ, ejaakɛ akɛni eyabote maŋ ni agboi kɛ amɛsɛɛ adabaŋi tara naa mli nɛɛ lɛ, esa lɛ diɛŋtsɛ ehe yi.”

⁸ Ni Saul tsɛ etabilɔi fɛɛ kɛkpe koni amɛfã ta kɛya Keila ni amɛyasa David kɛ ewebii lɛ ayi.

⁹ Be ni David na le akɛ Saul miito ehe yiŋ fɔŋ lɛ, ekɛɛ Osɔfo Abiatar akɛ, “Kɔ efod lɛ kɛba.”

¹⁰ Be ni Abiatar kɛ efod lɛ ba lɛ, David bi Yehowa nii ekɛɛ, “Yehowa, Israel Nyɔŋmɔ, otsulɔ enu akɛ Saul miitao aba Keila koni ebakpãtã maŋ lɛ hiɛ yɛ mi mihewɔ.

¹¹ Ani Keilabii baajie mi awo edɛŋ lo? Ani Saul baana aba lɛɛlɛŋ? Yehowa, Israel Nyɔŋmɔ, otsulɔ miikpa bo fai koni ohã male enɛ.”

¹² Ni David bi ekoŋŋ akɛ, “Ani Keilabii lɛ aaajie mi kɛ miwebii lɛ amɛwo Saul dɛŋ lo?” Yehowa here nɔ akɛ, “Amɛbaajie nyɛ amɛhã Saul.”

¹³ Ni fee nakai lɛ David kɛ esɛɛbii aaafee mɛi ohai ekpaa lɛ ye amɛhe oyai ni amɛshi Keila. Amɛyiŋ amɛtee he fɛɛ he ni amɛna. Ayagba Saul akɛ David ejo foi yɛ Keila, ni no hewɔ lɛ, Saul efãaa ta lɛ.

David yahi gɔji lɛ anɔ

¹⁴ Sane nɛɛ sɛɛ lɛ David yabɔ ehe agwaa yɛ ŋa lɛ nɔ tɛkploi lɛ amli yɛ Zif Ŋa lɛ nɔ gɔji lɛ anɔ. Gbi fɛɛ gbi lɛ Saul miitao David, shi Nyɔŋmɔ hãaa enine ashɛ David nɔ.

¹⁵ Kɛ̃lɛ David she gbeyei ejaakɛ ena akɛ Saul eba ebaatao lɛ koni egbe lɛ. David yɛ Zif Ŋa lɛ nɔ yɛ Horesh niiaŋ,

¹⁶ ni Saul bi Yonatan tiu lɛ kɛtee jɛi, ni eyawo David hewalɛ koni ekɛ ehiɛ afɔ Nyɔŋmɔ nɔ.

¹⁷ Yonatan kɛɛ David akɛ, “Kaashe gbeyei, ejaakɛ mitsɛ Saul nine shɛŋ onɔ. Ele enɛ faŋŋ akɛ bo obaaye Israel nɔ maŋtsɛ, ni mi matsɔ̃ osɛɛmɔ.”

¹⁸ David kɛ Yonatan kamɔ amɛhe kitã yɛ Nyɔŋmɔ gbɛi mli, ni no sɛɛ lɛ Yonatan ku esɛɛ etee shĩa; shi David tee nɔ ehi Horesh.

¹⁹ Kɛkɛ ni Zif hii komɛi yakɛɛ Saul yɛ Gibea akɛ, “Naa, David ebatee yɛ wɔŋɔɔ yɛ Horesh tɛkploi lɛ amli yɛ Hakila Gɔŋ lɛ nɔ yɛ Yuda shiaŋa lɛ wuoyigbɛ.

²⁰ Maŋtsɛ, wɔle akɛ otsui miishwe tsɔ̃ koni onine ashɛ enɔ. No hewɔ lɛ, ba, ni wɔbaaŋɔ lɛ wɔhã bo.”

²¹ Saul kɛɛ Zif hii nɛɛ akɛ, “Yehowa ajɔɔ nyɛ akɛ nyɛnu he nyɛhã mi.

²² Agbɛnɛ nyɛkua nyɛsɛɛ nyɛyaa, ni nyɛyataoa esaji amli jogbaŋŋ. Nyɛtaoa nyɛlea hei pɔtɛɛ ni eshwɛɔ lɛ, kɛ mɔ hu ni ena lɛ yɛ jɛi kɛ ehiŋmɛitsei enyɔ, ejaakɛ ahã mile akɛ ele ŋaa naakpa.

²³ No hewɔ lɛ, nyɛyataoa hei pɔtɛɛ ni eteɔteɔ ehe yɛ lɛ, ni nyɛbaa nyɛbakɛa mi; ni mikɛ nyɛ baaya. Anɔkwa, kɛji David yɛ shikpɔŋ nɛɛ nɔ lɛ no lɛ matao lɛ fitsofitso kɛkpa Yuda muu fɛɛ.”

²⁴ Kɛkɛ Zif hii lɛ shi Saul, ni amɛtsɔ̃ ehiɛ kɛtee Zif. Nakai be mli lɛ David kɛ esɛɛbii lɛ yɛ Maon shiaŋa lɛ nɔ yɛ jɔɔ ko ni ye Yuda shiaŋa lɛ wuoyigbɛ lɛ mli.

²⁵ Be ni Saul kɛ ewebii lɛ yiŋ amɛtee koni amɛyatao David lɛ, abatswa David adafi, ni no hewɔ lɛ, David shi jɔɔ lɛ mli kɛtee Maon tɛsaa lɛ mli yɛ ŋa lɛ nɔ. Saul na ele enɛ, kɛkɛ ni etiu David kɛtee Maon shiaŋa lɛ nɔ.

²⁶ Be ni Saul kɛ ewebii lɛ nyiɛ gɔŋ lɛ biɛgbɛ lɛ, David kɛ ewebii lɛ hu nyiɛ gɔŋ lɛ sɛɛgbɛ, ni David he miitswa shi koni eshi gɔŋ lɛ nɔ, ejaakɛ fiofio lɛ Saul kɛ ewebii lɛ miibɛŋkɛ amɛ koni amɛbamɔmɔ amɛ.

²⁷ Shi bɔfo ko ba trukaa ebakɛɛ Saul akɛ, “Akɛɛ oye ohe oyai ni oba, shi Filistibii lɛ ebatua shikpɔŋ lɛ.”

²⁸ No hewɔ lɛ, Saul je David sɛɛ, ni eyiŋ etee ekɛ Filistibii lɛ yawu. Sane nɛɛ hã awo nakai kpɔ lɛ mli gbɛi akɛ, “Foijee Tɛsaa.”

²⁹ Kɛkɛ ni David shi Maon, ni etee eyahi En-Gedi tɛkploi lɛ amli.