1 Samuel 19 - ŊMALƐ KRƆŊKRƆŊ LƐ

Saul hao David

¹ Saul wo ebi Yonatan kɛ etsuji lɛ fɛɛ ayitsoŋ akɛ amɛgbe David kɛji nine shɛ enɔ. Shi akɛni Saul bi Yonatan sumɔɔ David sane

² hewɔ lɛ Yonatan yatswa David adafi akɛ, “Naa, mitsɛ Saul miitao bo egbe. No hewɔ lɛ, ole ohenɔ kwɛmɔ wɔ leebi. Otao nififiaŋ he ko koni oyatee ohe yɛ jɛi.

³ Mi lɛ mibaya mitsɛ ŋɔɔ yɛ ŋa lɛ mli, he ni oyɔɔ lɛ, koni mi kɛ lɛ ayawie ohe. Bɔ ni mibana lɛ mahã ole.”

⁴ Yonatan tee ni eyana etsɛ Saul ni ewie ehã David, ni ekɛɛ lɛ akɛ, “Ofainɛ, kwɛmɔ koni okafee otsulɔ David esha ko, ejaakɛ efeko bo esha ko kwraa; ni asaŋ nibii fɛɛ ni etsu lɛ he eba sɛɛnamɔ ehã bo.

⁵ Edɔɔɔ ewala he, ni no hewɔ lɛ, etee ni ekɛ Goliat, Filistinyo lɛ, yakpe, ni egbe lɛ, ni Yehowa hã Israel fɛɛ ye kunim kpeteŋkple. Bo diɛŋtsɛ hu ona kunim ni eye lɛ, ni onya he. Mɛni hewɔ mɔ ni otaoɔ akɛ ofee mɔ ni efeko efɔŋ ko lɛ esha, ni ogbe David yakatswaa lɛ?”

⁶ Saul bo ebi Yonatan toi, ni Saul kã kitã ekɛɛ, “Mina Yehowa akɛ agbeŋ David.”

⁷ Enɛ hã Yonatan tee ni eyatsɛ David yɛ eteemɔhe lɛ; ni be ni egba lɛ nɔ ni etee nɔ lɛ fɛɛ sɛɛ lɛ, Yonatan kɛ David ba Saul ŋɔɔ, ni David ku sɛɛ ebahi Saul ŋɔɔ ni esɔmɔ lɛ tamɔ tsuutsu lɛ.

⁸ Yɛ mli aahu lɛ ta ba ekoŋŋ. David fã kɛtee eyawu ta lɛ, ni eye Filistibii lɛ anɔ butuu, ni amɛjo foi yɛ ehiɛ.

⁹ Yehowa hã mumɔ fɔŋ lɛ bayi Saul nɔ ekoŋŋ. Gbi nɛɛ lɛ Saul hiɛ akplɔ kɛta shi yɛ ewe lɛ mli, ni David miitswa kpãa saŋku lɛ eehã lɛ.

¹⁰ Saul ka akɛ etsu David akplɔ lɛ kɛmɔ gbogbo lɛ, shi David sha ehe, ni akplɔ lɛ yatsɛkɛ gbogbo lɛ mli. Kɛkɛ ni David jo foi, ni eje Saul dɛŋ.

¹¹ Nakai gbi lɛ gbɛkɛ lɛ, Saul wo mɛi agbɛ akɛ amɛyawo David ka yɛ ewe lɛ bɔ ni afee koni lɛ Saul lɛ, enine ashɛ David nɔ enɔ jetsɛremɔ leebi koni egbe lɛ. Shi David ŋa, Mikal, wo David ŋaa ekɛɛ, “Kɛji ohereee oyiwala ŋmɛnɛ nyɔɔŋ nɛɛ mli lɛ, wɔ lɛ abaagbe bo.”

¹² No hewɔ lɛ, Mikal shi David kɛtsɔ̃ samflɛ mli kɛyi shi ni David jo foi etee, ni eje Saul dɛŋ.

¹³ Kɛkɛ ni Mikal wo nɔ ko ni agbɔ lɛ tamɔ gbɔmɔ efɔ̃ David saatso lɛ nɔ, ni ekɛ nɔ lɛ yitso tsɔle abotia he tsɔi sune lɛ, ni eha nɔ lɛ mama.

¹⁴ Be ni Saul bɔfoi ni etsu akɛ amɛyamɔ David amɛbahã lɛ lɛ shɛ David we lɛ mli lɛ, Mikal kɛɛ bɔfoi lɛ akɛ David naaa hetselɛ.

¹⁵ Shi Saul saa wo bɔfoi lɛ agbɛ ekoŋŋ kɛtee David we lɛ akɛ amɛyana lɛ kɛ amɛhiŋmɛi; ni akɛɛ amɛ akɛ, “Nyɛwoa lɛ kɛ saa lɛ fɛɛ nyɛbahãa mi koni magbe lɛ.”

¹⁶ Be ni bɔfoi lɛ ba lɛ amɛbanina amãgã ni tsɔle abotia he tsɔi sune kã David saatso lɛ nɔ.

¹⁷ Enɛ hã Saul bi Mikal akɛ, “Mɛni hewɔ ni olaka mi nɛkɛ, ni ojie mihenyɛlɔ lɛ gbɛ etee, ni ohã eje midɛŋ nɛɛ?” Mikal hã Saul hetoo ekɛɛ akɛ, “Ewo mi shi ekɛɛ akɛ, ‘Kɛji owaaa mi koni majo foi lɛ, no lɛ magbe bo.’ ”

¹⁸ Be ni David jo foi lɛ eba Samuel ŋɔɔ yɛ Rama, ni ebagba lɛ saji fɛɛ ni Saul kɛye lɛ lɛ. Kɛkɛ ni David kɛ Samuel fɛɛ tee ni amɛyahi Naiot.

¹⁹ Ayatswa Saul adafi akɛ, “Naa, David yɛ Naiot yɛ Rama.”

²⁰ Kɛkɛ ni Saul wo bɔfoi agbɛ koni amɛyamɔ David kɛba. Be ni bɔfoi nɛɛ yashɛ Naiot ni amɛyanina Samuel damɔ gbalɔi aku lɛ naa akɛ amɛnukpa ni amɛmiigba lɛ, Nyɔŋmɔ Mumɔ lɛ bayi bɔfoi lɛ anɔ ni amɛ hu amɛbɔi gbaa.

²¹ Ababɔ Saul amaniɛ; no hewɔ lɛ, esaa etsu bɔfoi krokomɛi; shi amɛ hu amɛyashi gbalɔi lɛ anɔ. Saul ku sɛɛ etsu bɔfoi ekoŋŋ nɔ ni ji shii etɛ̃ nɔ; shi amɛ hu amɛyatsɔ̃mɔ gbalɔi nakai nɔŋŋ.

²² Kɛkɛ ni Saul diɛŋtsɛ yi mli ni etee Rama. Be ni eyashɛ nubu wulu ni yɔɔ Seku lɛ he lɛ, ebi David kɛ Samuel shi ni ekɛɛ akɛ, “Nɛgbɛ ji he ni Samuel kɛ David yɔɔ lɛ?” Mɔ ko tsɔ̃ɔ lɛ ekɛɛ, “Amɛyɛ Naiot yɛ Rama.”

²³ Kɛkɛ ni Saul shwie nɔ kɛjɛ Seku ni eeya Naiot yɛ Rama; shi Nyɔŋmɔ Mumɔ lɛ yi lɛ hu enɔ, ni ehiɛ gbaa yɛ gbɛteŋ aahu kɛyashi eyashɛ Naiot yɛ Rama.

²⁴ Kɛkɛ ni Saul hu kpɔlɔ ehe atadei lɛ ni egba yɛ Samuel hiɛ; ni ekã shi kɛ ehe folo nakai gbi lɛ shwane muu lɛ fɛ̃ɛ kɛ nyɔɔŋ muu lɛ fɛ̃ɛ. Bɔ ni fee ni abɔi kɛɛmɔ akɛ, “Mɛni, Saul hu etsɔ̃ gbalɔ hu?” lɛ nɛ.