1 Samuel 15 - ŊMALƐ KRƆŊKRƆŊ LƐ

Amalekbii lɛ kɛ Israelbii wu ta

¹ Samuel kɛɛ Saul akɛ, “Mi ji mɔ ni Yehowa tsu koni mibafɔ bo mu kɛwo bo emaŋ Israel maŋtsɛ lɛ. No hewɔ lɛ, agbɛnɛ bo nɔ ni Yehowa kɛɔ toi.”

² Yehowa ni ji Tatsɛ lɛ kɛɛ akɛ, “Mibagbala Amalekbii lɛ atoi yɛ shi ni amɛte amɛwo Israel be mli ni Israel jɛ Ijipt ebaa lɛ hewɔ.

³ No hewɔ lɛ, yaa ni oyatua Amalekbii lɛ, ni okpãtã nɔ fɛɛ nɔ ni amɛyɔɔ lɛ hiɛ. Okɛ amɛhe akake amɛ, shi ogbe amɛ, nuu ni jio, abifao ni kã fufɔ naa ni jio, tsina ni jio, yooma ni jio, teji ni jio, ogbe fɛɛ.”

⁴ No ni Saul hã akpee maŋbii lɛ kɛba, ni akane amɛyibɔ yɛ Telem. Ana hii ni nyiɛ amɛnane nɔ akpei ohai enyɔ; kɛ Yuda kɔkrɔɔ hii akpei nyɔŋma ashi nɔ.

⁵ Saul kɛ tabilɔi lɛ fã kɛba Amalekbii amaŋ wulu lɛ niiaŋ, ni ebawo ka yɛ maŋ lɛ jɔɔ lɛ mli.

⁶ Kɛkɛ ni Saul kɛ shɛɛ maje Kenbii ni yɔɔ maŋ lɛ mli akɛ, “Nyɛshia Amalekbii lɛ ateŋ nyɛyaa koni mikakpãtã nyɛ kɛ amɛ fɛɛ hiɛ, ejaakɛ nyɛ lɛ nyɛfee Israelbii lɛ fɛɛ ejurɔ, be ni amɛjɛ Ijipt amɛbaa lɛ.” No hewɔ lɛ, Kenbii lɛ shi Amalekbii lɛ ateŋ ni amɛtee.

⁷ Saul kɛ Amalekbii lɛ wu, ni eplenee amɛ kɛjɛ Hawila aahu kɛyashi Shur ni yɔɔ bokãgbɛ lɛ.

⁸ Emɔ Amalekbii amaŋtsɛ Agag hiɛkãalɔ; shi agbe emaŋbii lɛ blublu.

⁹ Saul kɛ etabilɔi lɛ baa Agag yi. Asaŋ amɛbaa toi kɛ tsinai kɛ tsinabii kɛ gwantɛŋi abii lɛ ateŋ kooloi kpakpai fe fɛɛ lɛ hu yi; ni amɛkpãtãaa amɛhiɛ; shi nɔ fɛɛ nɔ ni he bɛ sɛɛnamɔ kpakpa ko, aloo ni abɛ he nɔ ko feemɔ lɛ amɛkpãtã hiɛ.

Akpoo Saul akɛ Maŋtsɛ

¹⁰ Yehowa kɛ Samuel wie ni ekɛɛ lɛ akɛ,

¹¹ “Mishwa mihe akɛ miwo Saul maŋtsɛ, ejaakɛ ekpale yɛ misɛɛ, ni eyeee mikitãi lɛ anɔ.” Sane lɛ fee Samuel mlifu, ni esɔle ekpa Yehowa fai nyɔɔŋnyɔɔŋ fɛɛ.

¹² Ni Samuel te shi enɔjetsɛremɔ maŋkɛ mra koni enine ayashɛ Saul nɔ leebi. No mli lɛ abatswa Samuel adafi akɛ, “Saul ba Karmel, ni ebama shiu koni akɛkai kunim ni eye lɛ; ni no sɛɛ lɛ eku esɛɛ etee Gilgal.”

¹³ Be ni Samuel yashɛ Saul ŋɔɔ lɛ, Saul kɛɛ lɛ akɛ, “Yehowa ajɔɔ bo! Miye Yehowa famɔ lɛ nɔ.”

¹⁴ Samuel bi Saul akɛ, “Ni mɛni ji toi kɛ tsinai fɛɛ abolɔmɔ ni jwere mitoiŋ nɛɛ mɔ?”

¹⁵ Saul jie naa ekɛɛ, “Amalekbii lɛ aŋɔɔ akɛjɛ. Maŋbii lɛ baa toi kɛ tsinai lɛ ateŋ kooloi kpakpai fe fɛɛ lɛ ayi koni amɛkɛbashã afɔle amɛhã Yehowa, oNyɔŋmɔ, lɛ; shi nibii ni shwɛ lɛ wɔkpãtã fɛɛ hiɛ.”

¹⁶ Samuel kɛɛ Saul akɛ, “Mɛɛ! Magba bo nɔ ni Yehowa kɛɛ mi nyɔɔŋ nɛɛŋ.” Saul to he ekɛɛ akɛ, “Wiemɔ.”

¹⁷ Kɛkɛ ni Samuel kɛɛ lɛ akɛ, “Bo lɛ onaa ohe akɛ mɔ folo ko kɛkɛ; shi ani jeee bo ji Israel akutsei lɛ fɛɛ atsɛ? Yehowa fɔ bo mu kɛwo bo Israel maŋtsɛ,

¹⁸ ni Yehowa tsu bo, ni ekɛɛ bo akɛ, ‘Yaa koni oyaplenee Amalekbii eshafeelɔi lɛ. Okɛ amɛ awu kɛyashi beyinɔ ni oookpãtã amɛhiɛ kwrakwra.’

¹⁹ Mɛɛ hewɔ mɔ ni oyabooo Yehowa toi, ni otee oyaha ofɔ̃yeli nii, ni okɛtɔ̃ Yehowa nɔ nɛɛ?”

²⁰ Saul here Samuel nɔ akɛ, “Mibo Yehowa toi. Mimɔ Agag, Amalekbii amaŋtsɛ lɛ, kɛba; ni Amalekbii lɛ diɛŋtsɛ lɛ mikpãtã amɛhiɛ musumusu.

²¹ Shi tabilɔi lɛ ŋɔ ofɔ̃yeli nibii lɛ amli toi kɛ tsinai ni kulɛ sa amɛhiɛ kpãtãmɔ lɛ ateŋ kooloi kpakpai fe fɛɛ lɛ koni amɛkɛbashã afɔle amɛhã Yehowa, oNyɔŋmɔ, lɛ yɛ Gilgal.”

²² Shi Samuel kɛɛ Saul akɛ, “Ani Yehowa nyaa shãa afɔlei kɛ gbee afɔlei ahe fe ni abaabo lɛ toi lo? Naa, toiboo hi fe afɔleshãa, ni ehi fe toi agboi amli fɔ.

²³ Ejaakɛ atuatsemɔ lɛ esha ni tamɔ klamɔ nɔŋŋ, ni kuɛŋtimɔ lɛ esha ni tamɔ amãgãjamɔ nɔŋŋ. Akɛni okwa Yehowa naa wiemɔ lɛ, lɛ hu ekwa bo maŋtsɛ lɛ yeli.”

²⁴ Saul kɛɛ Samuel akɛ, “Mifee esha, ejaakɛ mitɔ̃ Yehowa fãmɔ lɛ kɛ bo hu owiemɔi lɛ anɔ, ejaakɛ miyashe tabilɔi lɛ agbeyei ni miyabo amɛnaawiemɔ toi.

²⁵ No hewɔ lɛ, agbɛnɛ miikpa bo fai, koni okɛ mihe esha lɛ afa mi, ni okɛ mi aku osɛɛ kɛya koni mayaja Yehowa.”

²⁶ Samuel kɛɛ Saul akɛ, “Mikɛ bo ekuŋ sɛɛ kɛyajaŋ ejaakɛ oyayeee fãmɔ ni Yehowa fã bo lɛ nɔ, ni no hewɔ lɛ, Yehowa hu ekwa bo maŋtsɛ lɛ yeli yɛ Israel.”

²⁷ Be ni Samuel tsɔ̃ ehe koni eya lɛ, Saul mɔ Samuel atade lɛ naamuu lɛ mli, kɛkɛ ni atade lɛ gba.

²⁸ Kɛkɛ ni Samuel kɛɛ Saul akɛ, “Yehowa shɔ̃ Israel nɔ maŋtsɛyeli lɛ yɛ odɛ̃ŋ kɛjɛ ŋmɛnɛ, ni ekɛhã onaanyo ni hi fe bo.

²⁹ Naa, Israel Anunyamtsɛ lɛ emaleŋ ni eshwaŋ ehe hu ejaakɛ jeee gbɔmɔ adesa ji lɛ, ni eeeshwa ehe.”

³⁰ Kɛkɛ ni Saul kɛɛ akɛ, “Mifee esha; shi kɛ̃lɛ wo mihiɛ nyam yɛ mimaŋ onukpai lɛ kɛ Israel fɛɛ hiɛ, ni okɛ mi aku sɛɛ kɛya ni mayaja Yehowa, oNyɔŋmɔ, lɛ.”

³¹ No hewɔ lɛ, Samuel ku esɛɛ ni ekɛ Saul tee, ni Saul yaja Yehowa yɛ Gilgal.

³² Kɛkɛ ni Samuel kɛɛ akɛ, “Nyɛkɛ Agag, Amalekbii amaŋtsɛ lɛ abaa miŋɔɔ.” Agag bashɛ Samuel hiɛ kɛ ehiɛ miishɛɛmiishɛɛ, ni ekɛɛ yɛ eyitsoŋ akɛ, “Ekã shi faŋŋ akɛ benɛ ejie gbele sane yɛ eyiŋ.”

³³ Shi Samuel kɛɛ Agag akɛ, “Bɔ ni oklante hã yei etsɔmɔ yei ni bɛ bii lɛ, nakai bo hu onyɛ baatsɔ̃ yoo ni bɛ bi yɛ enanemɛi yei ateŋ.” Kɛkɛ ni Samuel bamɔ Agag kɛ klante, ni efolɔ emli dukuduku yɛ Yehowa afɔleshãa latɛ lɛ hiɛ yɛ Gilgal.

³⁴ Kɛkɛ ni Samuel yi mli etee Rama, ni Saul hu yi mli ni etee ewe yɛ Gibea.

³⁵ Enɛ sɛɛ lɛ Samuel kɛ ehiŋmɛitsei enyɔ nɛkɛ enaaa Saul dɔŋŋ aahu kɛyashi Saul gbo; shi Samuel ye Saul he ŋkɔmɔ. Ni Yehowa shwa ehe akɛ ewo Saul Israel maŋtsɛ.