1 Samuel 12 - ŊMALƐ KRƆŊKRƆŊ LƐ

Wiemɔ ni Samuel wie ni ekɛ maŋbii lɛ ye shɛɛ

¹ Samuel kɛɛ Israel fɛɛ akɛ, “Nɔ ni nyɛbi mi lɛ mifee, ni miwo maŋtsɛ mihã nyɛ.

² No hewɔ lɛ, agbɛnɛ maŋtsɛ lɛ nyiɛ nyɛhiɛ nɛɛ. Mi lɛ amrɔ nɛɛ migbɔ ni miyi eyɛ, ni mibihii lɛ nyɛ kɛ amɛ yɔɔ. Mikwɛ nyɛnɔ kɛjɛ miblahiaŋ aahu kɛbashi ŋmɛnɛ.

³ Mi nɛ; nyɛyea odase nyɛshia mi yɛ Yehowa hiɛ, kɛ emɔ̃ ni efɔ lɛ mu lɛ hu hiɛ. Namɔ tsina mishɔ̃, ni namɔ teji mishɔ̃? Aloo namɔ ojo mitswa, aloo namɔ yi miwa? Ni namɔ dɛŋ mihe nyɔɔŋnii yɛ koni maku mihiɛ mafɔ esane nɔ? Nyɛwiea koo, koni mato nyɛ najiaŋ.”

⁴ Maŋbii lɛ here nɔ amɛkɛɛ, “Otswako wɔ ojo lɛ, owako wɔ yi lɛ, oshɔ̃ko mɔ ko dɛŋ nɔ ko hu.”

⁵ Samuel to he ni ekɛɛ, “Yehowa ji midasefonyo mɔ, ni emɔ̃ ni efɔ lɛ mu lɛ hu miiye he odase ŋmɛnɛ akɛ mɔ ko nɔ ko nɔ ko bɛ midɛŋ.” Amɛto he akɛ, “Lɛ ji odasefonyo lɛɛlɛŋ.”

⁶ Samuel kɛɛ maŋ lɛ akɛ, “Yehowa ji odasefonyo lɛɛlɛŋ, lɛ mɔ ni ehala Mose kɛ Aaron ni ejie nyɛtsɛmɛi lɛ kɛje Ijipt shikpɔŋ lɛ nɔ kɛba lɛ.

⁷ No hewɔ lɛ, agbɛnɛ nyɛdamɔa shi nyɛmɛa koni mi kɛ nyɛ akojoa yɛ Yehowa hiɛ, yɛ nibii fɛɛ ni ekɛhere nyɛ kɛ nyɛtsɛmɛi lɛ ahewɔ.

⁸ Be ni Yakob tee Ijipt ni Ijiptbii lɛ yeɔ nyɛtsɛmɛi lɛ anyɔŋ lɛ, nyɛtsɛmɛi lɛ bolɔ amɛtsɛ Yehowa, ni Yehowa tsu Mose kɛ Aaron ni amɛyajie nyɛtsɛmɛi lɛ yɛ Ijipt kɛba, ni amɛhã amɛbahi biɛ nɛɛ.

⁹ Shi nyɛtsɛmɛi lɛ ahiɛ kpa Yehowa, amɛNyɔŋmɔ, lɛ nɔ. No hewɔ lɛ, Yehowa ŋmɛɛ amɛhe ehã, ni Hazor Maŋtsɛ Yabin tatsɛ Sisera lɛ, kɛ Filistibii lɛ hu kɛ Moab maŋtsɛ lɛ hu kɛ amɛ wuwuu tai, ni gbɔmɛi nɛɛ ye nyɛtsɛmɛi lɛ anɔ.

¹⁰ Enɛ hã nyɛtsɛmɛi lɛ bolɔ amɛtsɛ Yehowa, ni amɛkɛɛ, ‘Wɔfee esha, ejaakɛ wɔkwa bo, Yehowa, ni wɔyasɔmɔ Baali kɛ Astarte moŋ. Shi agbɛnɛ heremɔ wɔ yɛ wɔhenyɛlɔi lɛ adɛŋ, ni wɔbaasɔmɔ bo.’

¹¹ No hewɔ lɛ, Yehowa tsu Gideon (ni ji Yerubaal) kɛ Barak kɛ Yefta kɛ mi Samuel hu, ni etsɔ̃ gbɔmɛi nɛɛ anɔ ehere nyɛ yɛ nyɛhenyɛlɔi lɛ adɛŋ yɛ hei fɛɛ; kɛkɛ ni nyɛhi shi shweshweeshwe.

¹² Shi be ni nyɛna akɛ Nahash, Amonbii lɛ amaŋtsɛ lɛ, efã nyɛyi nɔ ta lɛ, nyɛkɛɛ mi akɛ ‘Dabi, wɔkpɛ̃lɛɛɛ; ja wɔna maŋtsɛ ni eye wɔnɔ,’ tsɛbelɛ Yehowa, nyɛNyɔŋmɔ lɛ, ji nyɛmaŋtsɛ.

¹³ “No hewɔ lɛ, naa, maŋtsɛ lɛ ni nyɛtao ni nyɛbi lɛ, ahã nyɛ. Naa, Yehowa ewo maŋtsɛ ehã nyɛ.

¹⁴ Kɛji nyɛaashe Yehowa gbeyei, ni nyɛaasɔmɔ lɛ, ni nyɛaaye egbee nɔ, ni nyɛtseŋ ekitã lɛ hiɛ atua, ni asaŋ nyɛ kɛ maŋtsɛ lɛ ni yeɔ nyɛnɔ lɛ fɛɛ aaanyiɛ Yehowa, nyɛNyɔŋmɔ, lɛ sɛɛ lɛ, nyɛjeŋ baaja ahã nyɛ.

¹⁵ Shi kɛji nyɛyayeee Yehowa gbee nɔ; shi nyɛtse ekitã lɛ hiɛ atua lɛ no lɛ Yehowa baagbala nyɛ kɛ nyɛmaŋtsɛ lɛ fɛɛ toi.

¹⁶ No hewɔ lɛ, nyɛdamɔa shi ni nyɛkwɛa naakpɛɛ nɔ ko ni Yehowa baafee.

¹⁷ Ani jeee ŋmãakuu be mli ji ŋmɛnɛ? Ojogbaŋŋ! Mibasɔle matsɛ Yehowa koni ehã ŋwɛi ashimɔ, ni nu hu anɛ koni nyɛkɛna nyɛle akɛ nɔ fɔŋ ni nyɛfee nyɛshi Yehowa kɛ maŋtsɛ ni nyɛbi akɛ ahã nyɛ lɛ, eda naakpa.”

¹⁸ Kɛkɛ ni Samuel sɔle etsɛ Yehowa, ni ehã ŋwɛi shimɔ, ni nu nɛ nakai gbi lɛ, ni maŋ lɛ fɛɛ she Yehowa kɛ Samuel gbeyei.

¹⁹ Maŋ muu lɛ fɛɛ kpa Samuel fai amɛkɛɛ, “Ofainɛ, kpa Yehowa, oNyɔŋmɔ lɛ, fai ohã wɔ otsuji koni wɔkagboi, ejaakɛ eshai fɛɛ ni wɔfee sa lɛ wɔfee eko hu wɔfata he akɛ wɔbi akɛ ahã wɔ maŋtsɛ lɛ.”

²⁰ Shi Samuel kɛɛ maŋ lɛ akɛ, “Nyɛkashea gbeyei; nyɛna nyɛfee nɛkɛ nɔ fɔŋ nɛɛ moŋ, shi kɛ̃lɛ nyɛkakpalea kɛjea Yehowa sɛɛ, shi moŋ nyɛsɔmɔa lɛ kɛ nyɛtsui fɛɛ.

²¹ Nyɛkagbaa afã kɛyanyiɛ yaka nibii ni ahe bɛ sɛɛnamɔ ni asaŋ nyɛɛɛ mɔ yiwala ahere lɛ asɛɛ; ejaakɛ yaka nibii ni.

²² Ejaakɛ Yehowa kwaŋ nyɛ yɛ egbɛi kpeteŋkple lɛ hewɔ; asaŋ esa ehiɛ hu akɛ ekɛ nyɛ afee lɛ diɛŋtsɛ emaŋ.

²³ Mi hu enɛ akagbale mi fɔ̃ŋfɔ akɛ makpa sɔlemɔ kɛ nyɛ hãmɔ ni mikɛfee esha mishi Yehowa. Shi moŋ mibatsɔ̃ɔ nyɛ nɔ ni hi kɛ nɔ ni ja ni sa akɛ nyɛfee.

²⁴ Nyɛshea Yehowa kɛkɛ gbeyei; asaŋ nyɛsɔmɔa lɛ yɛ anɔkwayeli mli kɛ nyɛtsui fɛɛ. Nyɛkaia nibii wuji abɔ ni etsu ehã nyɛ lɛ.

²⁵ Shi naa, kɛji nyɛkã he nyɛfee nifɔɔjianii lɛ, no lɛ aaabɛɛ nyɛ kɛ nyɛmaŋtsɛ lɛ fɛɛ ashwie.”