1 Samuel 11 - ŊMALƐ KRƆŊKRƆŊ LƐ

¹ Amonbii amaŋtsɛ Nahash fã ta kɛba, ni ebasa Yabesh yɛ Gilead maŋbii lɛ ayi. Kɛkɛ ni Yabesh hii lɛ tsu ayakɛɛ Maŋtsɛ Nahash akɛ, “Okɛ wɔ akpãŋ ni wɔɔsɔ̃mɔ bo.”

² Shi Nahash, Amonbii amaŋtsɛ lɛ, hã amɛ hetoo ekɛɛ, “Dani mikɛ nyɛ aaakpãŋ ni wɔfee ekome lɛ, ja nyɛhã mifamɔ nyɛninejurɔ hiŋmɛii fɛɛ yɛ nyɛyitsei ahe koni kpa ni nyɛbaaje lɛ ahã Israel muu lɛ fɛɛ hiɛ ashwie shi.”

³ Yabesh maŋ onukpai lɛ kɛɛ Nahash akɛ, “Hã wɔ gbii kpawo. Wɔbaatsu bɔfoi kɛya Israel maji fɛɛ anɔ. Kɛji ayanaaa mɔ ko abahere wɔ lɛ koni wɔkɛ wɔhe abahã bo.”

⁴ Be ni Yabesh bɔfoi lɛ yashɛ maŋ ni ji Gibea, he ni Saul yɔɔ lɛ, ni amɛbɔ amɛmaniɛ lɛ, maŋtso muu lɛ wo yara.

⁵ Nakai be mli nɔŋŋ lɛ Saul miikpala tsinai kɛjɛ ŋa nɔ kɛmiiba shĩa, ni ebi mɔ ko akɛ, “Mɛni eba ni awo yara nɛkɛ nɛɛ?” Ni abɔ lɛ amaniɛ ni Yabesh bɔfoi lɛ kɛba lɛ.

⁶ Kɛkɛ ni Nyɔŋmɔ Mumɔ lɛ wo Saul ekãa titri ko be ni enu amaniɛ lɛ, asaŋ emli hu wo la naakpa.

⁷ Emɔmɔ tsinai enyɔ egbe, ni efolɔ amɛmli bibiibii, ni ekɛtsu Yabesh bɔfoi lɛ akɛ amɛkɛyakpa Israel majimaji lɛ fɛɛ anɔ. Ni wiemɔ ni fata he ji akɛ, “Mɔ fɛɛ mɔ ni efãaa ta kɛbaaa ebawaaa Saul kɛ Samuel lɛ, nɛkɛ ji bɔ ni abaafee mɔ lɛ tsinai lɛ.” Israelbii lɛ she nɔ ni Yehowa aaafee amɛ lɛ he gbeyei, ni no hewɔ lɛ, eshwɛɛɛ nuu kome ni emĩaaa kɛyaaa ta lɛ eko.

⁸ Saul hã Israel naa yakpe shi yɛ Bezek, ni be ni ekane amɛ lɛ amɛyibɔ fee akpei ohai etɛ̃, ni Yuda kɔkrɔɔ hii ayibɔ fee akpei nyɔŋmai etɛ̃.

⁹ Kɛkɛ ni Saul shɛ bɔfoi lɛ ni atsu kɛba lɛ akɛ, “Nyɛyakɛa Yabeshbii yɛ Gilead akɛ, ‘Wɔ be ni hulu kɛɛ edamɔɔ lɛ ahere nyɛyiwala.’ ” Be ni bɔfoi lɛ babɔ Yabeshbii lɛ amaniɛ lɛ amɛtsui nyɔ amɛmli,

¹⁰ ni amɛhã ayakɛɛ Maŋtsɛ Nahash akɛ, “Wɔ ni ji wɔ lɛ wɔkɛ wɔhe baaba abahã nyɛ koni nyɛfee wɔ bɔ ni nyɛsumɔɔ.”

¹¹ Enɔ jetsɛremɔ lɛ Saul ja etabilɔi lɛ amli kui etɛ̃, ni amɛyatua Amonbii lɛ maŋkɛ hima mli, yɛ amɛnsra lɛ mli, ni amɛtswia amɛ nii kɛyashi shwane fintiŋŋ. Amonbii ni je gbele mli lɛ gbɛ shwã bɔ ni onaŋ amɛteŋ mɛi enyɔ nɛkɛ yɛ he kome.

¹² Kɛkɛ ni maŋbii lɛ kɛɛ Samuel akɛ, “Nɛgbɛ nakai mɛi ni kɛɛ akɛ, ‘Mɛɛ Saul hu ni baaye wɔnɔ maŋtsɛ lɛ yɔɔ? Akɛ amɛ aba ni wɔgbe amɛ!’ ”

¹³ Shi Saul to he ekɛɛ, “Ashwieŋ la shi ŋmɛnɛ, ejaakɛ ŋmɛnɛ lɛ Yehowa ehere Israel yiwala.”

¹⁴ Kɛkɛ ni Samuel kɛɛ maŋ lɛ akɛ, “Nyɛbaa ni wɔtea Gilgal koni wɔsaa wɔwo Saul maŋtsɛ ekoŋŋ yɛ jɛi.”

¹⁵ No hewɔ lɛ, maŋ lɛ fɛɛ loo mli kɛtee Gilgal, ni amɛyawo Saul maŋtsɛ yɛ Yehowa hiɛ yɛ jɛi. Amɛshãshãa shidaa afɔlei yɛ jɛi yɛ Yehowa hiɛ, ni Saul kɛ Israelbii lɛ fɛɛ nya jogbaŋŋ diɛŋtsɛ.