1 Samuel 1 - ŊMALƐ KRƆŊKRƆŊ LƐ

Elkana kɛ eweku yɛ Shilo

¹ Nuu ko hi shi yɛ Rama yɛ Efraim gɔji lɛ anɔ. Egbɛi ji Elkana, ni etsɛ gbɛi ji Yeroham. Zuf bi Tohu bi Elihu bi ji Elkana nɛɛ.

² Elkana yɛ ŋamɛi enyɔ, mɔ kome gbɛi ji Hana, ni mɔ kome lɛ hu gbɛi ji Penina. Penina yɛ bii shi Hana bɛ bi.

³ Daa afi lɛ Elkana yaa Shilo eyasɔleɔ ni eshãa afɔle ehãa Yehowa ni ji Taiatsɛ lɛ. Nɛkɛ be mli lɛ Eli bihii enyɔ lɛ, ni ji Hofni kɛ Finehas, miiye osɔfoi kɛha Yehowa yɛ Shilo.

⁴ Gbi fɛɛ gbi ni Elkana baaya eyashã afɔle lɛ, ehãa eŋa Penina kɛ Penina bihii lɛ kɛ ebiyei lɛ ateŋ mɔ fɛɛ mɔ loo kukuli.

⁵ Shi Hana lɛ eyɛ mli akɛ Elkana sumɔɔ lɛ jogbaŋŋ moŋ nɛ, shi loo kukuli kome nɔŋŋ ehãa lɛ hu, ejaakɛ lɛ lɛ Nyɔŋmɔ hãko lɛ bi.

⁶ Enɛ hãa Hana bienyɛ Penina kɛ fɔmɔ yeɔ Hana he fɛo, ni ekɛwoɔ emli la naakpa bɔ ni ehãa Hana gbigbliɔ emli akɛ Yehowa etsi efɔmɔ naa.

⁷ Nɛkɛ ji bɔ ni nibii tee nɔ daa afi. Shii abɔ fɛɛ ni amɛyaa Yehowa we lɛ, ebienyɛ Penina yeɔ ehe fɛo. Kɛkɛ lɛ efeɔ Hana yaafo, ni eyeee nii.

⁸ Kɛfee nakai lɛ ewu Elkana kɛɔ Hana akɛ, “Hana, mɛɛba ni ofoɔ ni asaŋ oyeee nii? Mɛɛba ni oyeɔ otsui? Mihiii hãaa bo fe musuŋ bihii nyɔŋma?”

Hana kɛ Eli

^9-10 Be ko be ni amɛye nii ni amɛnu nɔ ko yɛ Shilo sɛɛ lɛ, Hana te shi ni ewerɛ eho ehe naakpa. Ni efo waa be ni esɔleɔ etsɛɔ Yehowa lɛ. Nakai beiaŋ nɔŋŋ lɛ Osɔfo Eli ta sɛ̃i nɔ yɛ Yehowa Sɔlemɔtsu lɛ shinaatso lɛ masɛi.

¹¹ Hana wo shi ekɛɛ, “Yehowa Taiatsɛ, kɛji oookwɛ mi, oweyoo, mimanehulu nɛɛ, ni oookai mi, ni ohiɛ kpaŋ mi, oweyoo, nɔ shi moŋ ooohã mi, oweyoo, binuu lɛ, no lɛ majɔɔ enɔ mahã bo, Yehowa, ewala gbii abɔ fɛɛ; ni asooyi naa esaŋ eyiteŋ.”

¹² Ni eba mli akɛ, be ni Hana hiɛ sɔlemɔ lɛ aahu yɛ Yehowa hiɛ lɛ, Eli kwɛ enaabu.

¹³ Shi Hana miiwie yɛ etsui mli. Anuuu egbee akɛ fe enaabu kɛkɛ ni tsɔmɔɔ. Enɛ hewɔ lɛ, Eli susu akɛ dãa Hana etɔ.

¹⁴ Ni Eli kɛɛ Hana akɛ, “Mɛɛ beyinɔ nɔŋŋ ni oootɔ dãa kɛyashi? Hã ni owain lɛ atserɛ yɛ ohiɛ.”

¹⁵ Shi Hana here nɔ ni ekɛɛ, “Dabida, minuŋtsɔ, mi ji yoo ko ni miwerɛ eho mihe naakpa. Minuko wain loo dãa ko ni wa; shi moŋ miifɔse mitsui mli awerɛho sane mashwie Yehowa hiɛ.

¹⁶ Kaabu mi, oweyoo akɛ yoo yakagbɔmɔ ko shi mikɔmɔ kɛ mlila ni awoɔ sɔŋŋ naa miwieɔ yɛ kɛbashi amrɔ nɛɛ nɛɛ.”

¹⁷ Eli to he hã Hana ekɛɛ, “Omanye abla bo, ni Israel Nyɔŋmɔ lɛ ahã bo nii ni obi lɛ lɛ.”

¹⁸ Hana kɛɛ Eli akɛ, “Ofainɛ, ohã misane nɛɛ akã otsui nɔ.” Kɛkɛ ni Hana yiŋ etee, ni agbɛnɛ eyatao nɔ ko eye, ni ehiɛ efeee tɔtɔɔtɔ dɔŋŋ.

Samuel fɔmɔ kɛ enɔjɔɔmɔ hã Nyɔŋmɔ

¹⁹ Enɔ jetsɛremɔ lɛ Elkana kɛ eŋãmɛi lɛ kɛ ebii lɛ te shi leebi maŋkpa, be ni amɛtee amɛyaja Yehowa sɛɛ lɛ amɛku amɛsɛɛ kɛtee Rama. Elkana kɛ eŋa Hana yawɔ, ni Yehowa mɔbɔnalɛ naa lɛ,

²⁰ be ni shɛɔ afi naakplɔ lɛ Hana ena musu, ni efɔ binuu. Hana wo abifao lɛ gbɛi akɛ Samuel, ni ekɛɛ, “Ejaakɛ miba lɛ yɛ Yehowa dɛŋ.”

²¹ Be ni afi shɛ lɛ, Elkana kɛ eŋa kɛ ebii lɛ tee koni amɛyashã daa afi naakplɔ afɔle yɛ shi krɛdɛɛ ni ewo lɛ hewɔ.

²² Shi Hana eyaaa eko ejaakɛ ekɛɛ ewu Elkana akɛ, “Mamɛ kɛyashi matse gbekɛ lɛ fufɔ dani mikɛ lɛ ayapue yɛ Yehowa hiɛ koni ehi jɛi kwraa.”

²³ Elkana to he ekɛɛ, “Ojogbaŋŋ; feemɔ nɔ ni hi yɛ ohiɛ. Hii shi kɛyashi oootse abifao lɛ fufɔ. Yehowa ahã eshiwoo lɛ aba mli kɛkɛ.” No hewɔ lɛ, Hana hi shi, ni ekwɛ abifao lɛ kɛyashi etse lɛ fufɔ lɛ.

²⁴ Be ni Hana tse gbekɛ lɛ fufɔ lɛ sɛɛ lɛ, ekɛ gbekɛ lɛ tee Yehowa we lɛ yɛ Shilo, ni ehiɛ edɛŋ tsinanuu ni eye afii etɛ̃ kɛ ŋmaa mamu kiloi nyɔŋma kɛ wain tɔ kome. Nakai be mli tete lɛ Samuel edako.

²⁵ Agbe tsinanuu lɛ, ni akɛ gbekɛnuu fioo lɛ ba Eli ŋɔɔ,

²⁶ ni Hana kɛɛ Eli akɛ, “Minuŋtsɔ, ookai mi. Mi ji yoo lɛ ni badamɔ omasɛi yɛ biɛ nɛɛ nyɛsɛɛ ko, ni ebakpa Yehowa fai ni eba lɛ nii lɛ.

²⁷ Gbekɛ nɛɛ he fai mibakpa lɛ, ni Yehowa ehã mi nɔ ni mibaba lɛ lɛ hu.

²⁸ No hewɔ lɛ, miijɔɔ enɔ kwraa miihã Yehowa. Mikɛ lɛ miike Yehowa ewala gbii abɔ fɛɛ.” Kɛkɛ ni amɛja Yehowa yɛ jɛi.