1 Petro 3 - ŊMALƐ KRƆŊKRƆŊ LƐ

Yeigbãyei kɛ wumɛi

¹ Nakai nɔŋŋ nyɛ yeigbãyei lɛ hu, nyɛbaa nyɛhe shi nyɛhãa nyɛ diɛŋtsɛ nyɛwumɛi lɛ, koni, kɛ mɛi komɛi booo wiemɔ lɛ toi tete lɛ, ashi wiemɔ lɛ sɛɛ ni atsɔ̃ yei lɛ ajeŋba nɔ ni nine ashɛ amɛnɔ,

² ejaakɛ amɛnaa nyɛjeŋba ni he tse ni gbeyeishemɔ yɔɔ mli lɛ.

³ Ni nyɛhewulamɔ akafee yigbɔɔ kɛ shikawoo kɛ atadewoo yɛ kpo nɔ gbɛ.

⁴ Shi moŋ efee tsui mli gbɔmɔ ni akɛtee yɛ mumɔ ni he jɔ ni yɔɔ kpoo lɛ hewulamɔ ni fiteee lɛ mli lɛ; no ji nɔ ni jara wa yɛ Nyɔŋmɔ hiɛ.

⁵ Ejaakɛ sa lɛ, nakai ji bɔ ni yei krɔŋkrɔŋi lɛ hu ni hiɛ kã Nyɔŋmɔ nɔ lɛ wula amɛhe, ni amɛba amɛhe shi amɛhã amɛ diɛŋtsɛ amɛwumɛi.

⁶ Tamɔ bɔ ni Sara bo Abraham toi, ni etsɛɔ lɛ “nuŋtsɔ” lɛ; ebiyei ji nyɛ, kɛ nyɛfeɔ ekpakpa ni nyɛsheee nɔ ko gbeyei lɛ.

⁷ Nakai nɔŋŋ nyɛ wumɛi, nyɛkɛ nyɛŋamɛi lɛ ahia shi yɛ nilee naa, ni nyɛkɛ woo awoa yoo akɛ mɔ ni he waaa tuutu ko, akɛni amɛ kɛ nyɛ fɛɛ ji wala dromɔ lɛ niyelɔi lɛ, koni akatsĩ nyɛsɔlemɔi lɛ agbɛ.

Nyɛkɛ efɔŋ akatoa efɔŋ najiaŋ

⁸ Shi naagbee lɛ, nyɛ fɛɛ nyɛhiɛa jwɛŋmɔ kome, nyɛnanaa nyɛhãa nyɛhe, nyɛsumɔsumɔa nyɛhe akɛ nyɛmimɛi, nyɛmli ashãa nyɛ ahãa nyɛhe, nyɛjwɛŋa heshibaa jwɛŋmɔ.

⁹ Nyɛkɛ efɔŋ akatoa efɔŋ najiaŋ aloo jɛmɔ yɛ jɛmɔ najiaŋ, shi moŋ nyɛjɔa, ejaakɛ nyɛle akɛ enɛ hewɔ atsɛ nyɛ, koni nyɛnine ashɛ jɔɔmɔ lɛ nɔ.

¹⁰ Shi, “Mɔ ni taoɔ wala asumɔ ni ena gbii kpakpai lɛ, emɔ elilɛi mli kɛje efɔŋ he, kɛ enaabu hu koni ekawie shishiumɔ wiemɔ.

¹¹ Ewi efɔŋ ni efee ekpakpa. Etao hejɔlɛ ni enyiɛ no sɛɛ.

¹² Ejaakɛ Nuŋtsɔ lɛ hiŋmɛi kã jalɔi ahe, ni eboɔ amɛfaikpamɔ toi; shi mɛi ni feɔ nifɔɔjianii lɛ, Nuŋtsɔ lɛ ejie ehiɛ eka amɛ.”

Nyɛfea ekpakpa kɛ nyɛna amanehulu yɛ mli tete

¹³ Ni kɛ nyɛbɔɔ ekpakpa he mɔdɛŋ lɛ, namɔ aaafee nyɛ efɔŋ?

¹⁴ Shi kɛ jalɛ hewɔ nyɛnaa amanehulu tete lɛ, ajɔɔ nyɛ. Shi nyɛkashea amɛ gbeyei, ni nyɛkahaoa hu.

¹⁵ Shi Nuŋtsɔ, Kristo lɛ, nyɛbua lɛ krɔŋkrɔŋ yɛ nyɛtsuii amli; ni daa nɛɛ nyɛsaa nyɛhe nyɛtoa, koni nyɛna hetoo nyɛhã mɔ fɛɛ mɔ ni biɔ nyɛ hiɛnɔkãmɔ ni yɔɔ nyɛmli lɛ shi lɛ;

¹⁶ shi nyɛkɛ hejɔlɛ kɛ bulɛ ahãa hetoo, ni nyɛhiɛ henilee kpakpa, koni be ni aawie nyɛhe efɔŋ lɛ, mɛi ni gbeɔ nyɛjeŋba kpakpa ni nyɛyɔɔ akɛ Kristofoi lɛ he guɔ lɛ ahiɛ agboi.

¹⁷ Ejaakɛ, kɛ Nyɔŋmɔ miisumɔ akɛ nyɛna amanehulu lɛ, ehi moŋ akɛ nyɛaana amanehulu akɛ ekpakpafeelɔi fe nɔ ni nyɛaana amanehulu akɛ efɔŋfeelɔi.

¹⁸ Ejaakɛ Kristo hu na amanehulu yɛ eshai ahewɔ shi kome, lɛ jalɔ lɛ yɛ mɛi ni ejaaa lɛ anajiaŋ, koni ekɛ wɔ aya Nyɔŋmɔ ŋɔɔ. Ni agbe lɛ yɛ heloo gbɛfaŋ moŋ, shi ahã lɛ wala yɛ mumɔ gbɛfaŋ.

¹⁹ Ni mumɔ lɛ mli etsɔ̃ kɛtee mumɔi ni awo amɛ tsuŋ lɛ aŋɔɔ, eyashiɛ etsɔ̃ɔ amɛ.

²⁰ Amɛ mɛi ni blema lɛ amɛbooo toi, be ni Nyɔŋmɔ ŋmɛ etsui shi ni emɛ amɛ aahu yɛ Noa bei lɛ amli, be ni afeɔ adeka kpeteŋkple lɛ, nɔ mli ni ahere mɛi fioo ni ji mɛi kpaanyɔ lɛ asusumai ayiwala yɛ kɛtsɔ̃ nu mli lɛ,

²¹ Ni agbɛnɛ baptisimɔ ni nakai nu lɛ ji ehe okadi lɛ hereɔ nyɛ hu nyɛyiwala. Ejeee hewolo nɔ mujijiemɔ, shi moŋ eji kpãŋmɔ ni ajɛɔ henilee kpakpa mli akɛ Nyɔŋmɔ kpãŋɔ, kɛtsɔ̃ Yesu Kristo shitee lɛ nɔ,

²² mɔ ni etee ŋwɛi ni eyata Nyɔŋmɔ ninejurɔ nɔ, ni akɛ ŋwɛi bɔfoi kɛ hegbɛi kɛ hewalɛi fɛɛ ewo eshishi lɛ.