1 Petro 2 - ŊMALƐ KRƆŊKRƆŊ LƐ

Tɛ ni hiɛ kã lɛ kɛ Maŋ Krɔŋkrɔŋ lɛ

¹ No hewɔ lɛ, nyɛshɛrɛa efɔŋ fɛɛ kɛ kutumpɔo fɛɛ kɛ shishiumɔ kɛ osato kɛ hetsɛ̃ kɛ mɔhewiemɔ fɛɛ nyɛshwiea.

² Akɛ fufɔbii ni afɔ amɛ bianɛ lɛ, nyɛshwea wiemɔ lɛ mli fufɔ krɔŋŋ lɛ, koni nyɛdara yɛ mli kɛna yiwalaheremɔ,

³ akɛni nyɛsa nyɛnaa nyɛna akɛ Nuŋtsɔ lɛ mli hi lɛ.

⁴ Lɛ eŋɔɔ nyɛba akɛ tɛ ni hiɛ kã ni gbɔmɛi ekwa lɛ moŋ, shi Nyɔŋmɔ lɛ, lɛ lɛ ehala lɛ ni ejara wa yɛ ehiɛ lɛ.

⁵ Ni nyɛ hu nyɛhãa atswaa nyɛ akɛ tɛi ni hiɛ kãmɔ afea mumɔŋ tsu ni afee nyɛ osɔfoi aweku krɔŋkrɔŋ, koni akɛshã mumɔŋ afɔlei ni sa Nyɔŋmɔ hiɛ yɛ Yesu Kristo hewɔ.

⁶ No hewɔ hu ni eyɔɔ ŋmalɛ lɛ mli akɛ, “Naa, mikɛ koŋtɛ miiŋmɛ shi yɛ Zion, tɛ ni ahala ni ejara wa. Ni mɔ ni heɔ enɔ yeɔ lɛ hiɛ gboŋ kɔkɔɔkɔ.”

⁷ No hewɔ lɛ, nyɛ mɛi ni nyɛheɔ nyɛyeɔ lɛ ejara wa hã nyɛ; shi mɛi ni heee yeee lɛ, “Tɛ ni tsutswalɔi lɛ ekwa lɛ, No nɔŋŋ etsɔ̃ koŋtɛ”

⁸ kɛ “Tɛmɔtɛ kɛ nanetɔ̃tɔ̃mɔ tɛsaa ehã amɛ.” Ejaakɛ akɛni amɛbooo wiemɔ lɛ toi hewɔ lɛ amɛtɛrɛ, ni no nɔŋŋ ato amɛ ahã;

⁹ shi nyɛ lɛ, weku ni ahala ji nyɛ, osɔfoi, maŋtsɛmɛi, jeŋmaŋ krɔŋkrɔŋ, maŋ ni ekɛfee enɔ, koni nyɛjaje mɔ ni tsɛ nyɛ kɛjɛ duŋ lɛ mli kɛba lɛ diɛŋtsɛ enaakpɛɛ la lɛ he lɛ agbojee lɛ;

¹⁰ nyɛ ni sa lɛ nyɛjeee maŋ, shi agbɛnɛ lɛ Nyɔŋmɔ maŋ ji nyɛ, nyɛ ni anaaa nyɛ mɔbɔ, shi agbɛnɛ ana nyɛ mɔbɔ lɛ.

Kristofoi kɛ maŋbii ateŋ shihilɛ

¹¹ Misuɔmɔmɛi, miiwie miitsɔ̃ɔ nyɛ akɛ gbɔi kɛ mɛi ni yɔɔ maŋsɛɛ, akɛ nyɛtsia nyɛhe kɛjɛa heloosɛɛdiinii ni kɛ susuma wuɔ ta lɛ ahe,

¹² ni nyɛba nyɛjeŋ jogbaŋŋ yɛ jeŋmajiaŋbii lɛ ateŋ, koni be mli ni amɛwieɔ nyɛhe akɛ efɔŋfeelɔi lɛ, amɛkɛ nyɛnitsumɔi kpakpai lɛ ni amɛbaana lɛ awo Nyɔŋmɔ hiɛ nyam yɛ saramɔ Gbi lɛ nɔ.

¹³ No hewɔ lɛ, nyɛbaa nyɛhe shi nyɛhãa gbɔmɛi agbɛjianɔtoo fɛɛ gbɛjianɔtoo yɛ Nuŋtsɔ lɛ hewɔ, maŋtsɛ ni yeɔ nɔ lɛ jio,

¹⁴ lumɛi ni etsu yɛ efɔŋfeelɔi anɔ oweletɔɔ hewɔ kɛ ekpakpafeelɔi ayijiemɔ hewɔ lɛ jio.

¹⁵ Ejaakɛ nakai ji Nyɔŋmɔ suɔmɔnaanii lɛ, akɛ ekpakpafeemɔ nyɛkɛaatsĩ gbɔmɛi ni bɛ yitseiaŋ lɛ akwashiafeemɔ fɛɛ naa,

¹⁶ akɛ mɛi ni eye amɛhe, shi jeee mɛi ni nyɛkɛ nyɛheyeli lɛ aaafee efɔŋ nɔhaanɔ, shi moŋ akɛ Nyɔŋmɔ tsuji.

¹⁷ Nyɛwoa mɛi fɛɛ; nyɛsumɔa nyɛmimɛi lɛ; nyɛshea Nyɔŋmɔ gbeyei, nyɛwoa maŋtsɛ.

Tsuji aŋɔ Kristo amanehulu akɛ nɔkwɛmɔnɔ

¹⁸ Webii, nyɛkɛ gbeyeishemɔ fɛɛ abaa nyɛhe shi nyɛhãa nyɛnuŋtsɔmɛi, jeee mɛi kpakpai kɛ mɛi ni nuɔ nii ahe hãa mɔ kɛkɛ, shi moŋ mɛi ni enaaa mɔbɔ lɛ hu.

¹⁹ Ejaakɛ enɛ ji dromɔ, kɛ lee ni mɔ ko le Nyɔŋmɔ hewɔ ni ena amanehulu ni ejaaa gbɛ lɛ.

²⁰ Ejaakɛ kɛ tɔ̃ nyɛtɔ̃ ni ayi nyɛ ni nyɛmia nyɛhiɛ yɛ mli lɛ, mɛɛ anunyam yɔɔ mli? Shi kɛ nyɛfee ekpakpa ni nyɛna he amanehulu ni nyɛmia nyɛhiɛ lɛ, no ji nɔ ni sa Nyɔŋmɔ hiɛ.

²¹ Ejaakɛ enɛ hewɔ atsɛ nyɛ, ejaakɛ Kristo hu na amanehulu ehã nyɛ ni ekɛfee nɔkwɛmɔnɔ ehã nyɛ, koni nyɛnyiɛ enanemaahei lɛ asɛɛ.

²² Lɛ mɔ ni efeee esha ni asaŋ anaaa shishiumɔ yɛ edaaŋ lɛ.

²³ Mɔ ni be ni ajɛɔ lɛ lɛ, ejɛɛɛ mɔ ko etooo najiaŋ, be ni enaa amanehulu lɛ, elomɔɔɔ mɔ ko, shi moŋ etu esane ewo mɔ ni kojoɔ jalɛ naa lɛ dɛŋ lɛ.

²⁴ Kristo diɛŋtsɛ etere wɔhe eshai lɛ yɛ egbɔmɔtso lɛ mli kɛtee sɛŋmɔtso lɛ nɔ, koni wɔfee tamɔ mɛi ni egboi yɛ esha gbɛfaŋ ni wɔhiɛ akamɔ yɛ jalɛ gbɛfaŋ lɛ; lɛ ehe faji akɛtsa nyɛ lɛ.

²⁵ Ejaakɛ kulɛ nyɛtamɔ toi ni elaaje, shi agbɛnɛ lɛ nyɛku nyɛsɛɛ kɛba nyɛsusumai alɛlɔ kɛ nɔkwɛlɔ lɛ ŋɔɔ.