1 Petro 1 - ŊMALƐ KRƆŊKRƆŊ LƐ

Ŋamɔ

¹ Petro ni ji Yesu Kristo bɔfo lɛ ŋma yahã gbɔi ni egbɛ eshwã Ponto, Galatia, Kapadokia, Asia kɛ Bitinia lɛ. Amɛ ji mɛi ni ahala

² yɛ Tsɛ Nyɔŋmɔ lɛ le ni ele eto momo lɛ naa. Nyɔŋmɔ fee enɛ kɛtsɔ̃ Mumɔ lɛ hetsuumɔ nɔ, koni amɛkase toiboo ni akɛ Yesu Kristo lá lɛ ashwã amɛnɔ. Dromɔ kɛ hejɔlɛ afa ahã nyɛ!

Hiɛnɔkãmɔ ni gbooo

³ Ajɔɔ Nyɔŋmɔ ni ji wɔNuŋtsɔ Yesu Kristo Tsɛ lɛ. Efɔ wɔ ehee yɛ lɛ diɛŋtsɛ emɔbɔnalɛ babaoo lɛ naa, ni ehã wɔ hiɛnɔkãmɔ ni gbooo kɛtsɔ̃ Yesu Kristo shi ni ete kɛjɛ gbohii ateŋ lɛ nɔ.

⁴ No hewɔ lɛ, wɔmiikwɛ gboshinii ni fiteee ni he bɛ kpa ko ni ekwaaa, ni akɛto yɛ ŋwɛi ahã wɔ lɛ gbɛ.

⁵ Ni atsɔ̃ɔ hemɔkɛyeli nɔ abuɔ nyɛhe yɛ Nyɔŋmɔ hewalɛ naa atoɔ yiwalaheremɔ ni asaa ato ni abaajie kpo yɛ naagbee be lɛ mli lɛ.

⁶ No hãa nyɛmli filiɔ nyɛ, tsɛbelɛ ŋmɛnɛ, kɛ efi lɛ, nyɛyeɔ ŋkɔmɔ fioo ko yɛ kai srɔtoi amli.

⁷ No aaahã ana nyɛ hemɔkɛyeli salɛ lɛ akɛ ejara wa aahu fe shika ni fiteɔ ni aka yɛ la mli tete, kɛhã yijiemɔ kɛ woo kɛ anunyam yɛ Yesu Kristo kpojiemɔ lɛ mli.

⁸ Nyɛnako lɛ moŋ nɛ, shi nyɛsumɔɔ lɛ; ni amrɔmrɔ nɛɛ hu nyɛnaaa lɛ moŋ, shi nyɛhe enɔ nyɛye. Hewɔ lɛ nyɛmli filiɔ nyɛ kɛ miishɛɛ ni anyɛɛɛ agba ni yɔɔ nyam babaoo lɛ,

⁹ ejaakɛ nyɛnine miishɛ nyɛhemɔkɛyeli naagbee ni ji nyɛsusumai ayiwalaheremɔ lɛ nɔ.

¹⁰ Nɛkɛ yiwalaheremɔ nɛɛ, gbalɔi ni gba yɛ dromɔ ni nyɛbaana lɛ he lɛ tao sɛɛgbɛ ni amɛtao mli fitsofitso.

¹¹ Ni amɛsaa amɛtao amɛna be lɛ ni Kristo Mumɔ ni yɔɔ amɛmli lɛ tsɔ̃ɔ lɛ, be mli ni eyeɔ amanehului ni baaba Kristo nɔ kɛ anunyam ni baaba yɛ nomɛi asɛɛ lɛ ahe odase etoɔ lɛ, kɛ bɔ ni nakai be lɛ yɔɔ.

¹² Ni ajie atsɔ̃ɔ amɛ akɛ, jeee amɛ diɛŋtsɛ amɛhewɔ, shi moŋ nyɛhewɔ ni amɛsɔ̃mɔ yɛ nɛkɛ nii nɛɛ ahe, nii ni agbɛnɛ mɛi ni jaje Sanekpakpa lɛ tsɔ̃ɔ nyɛ yɛ Mumɔ Krɔŋkrɔŋ ni atsu kɛjɛ ŋwɛi lɛ mli lɛ eshiɛ etsɔ̃ɔ nyɛ lɛ, ni ŋwɛi bɔfoi tete shweɔ akɛ amɛaana mli lɛ.

Atsɛ nyɛ ahã shihilɛ krɔŋkrɔŋ

¹³ No hewɔ lɛ, nyɛsaa nyɛjwɛŋmɔ, nyɛhiɛ akãa shi, ni nyɛkɛ nyɛhiɛ afɔa dromɔ ni akɛbaahã nyɛ yɛ Yesu Kristo kpojiemɔ mli lɛ nɔ kwraa.

¹⁴ Nyɛfea nyɛhe bii toibolɔi ni nyɛkabaa nyɛjeŋ yɛ sa be ni nyɛleee nɔ ko lɛ mli akɔnɔi lɛ anaa dɔŋŋ.

¹⁵ Shi moŋ, bɔ ni mɔ ni tsɛ nyɛ lɛ yɔɔ krɔŋkrɔŋ lɛ, nyɛ hu nyɛfea krɔŋkrɔŋ yɛ nyɛjeŋba fɛɛ mli.

¹⁶ Ejaakɛ aŋma akɛ. “Nyɛfea krɔŋkrɔŋ, ejaakɛ mɔ krɔŋkrɔŋ ji mi.”

¹⁷ Ni kɛ nyɛtsɛɔ mɔ ni kwɛɛɛ mɛi ahiɛiaŋ shi ekojoɔ yɛ mɔ fɛɛ mɔ nitsumɔ naa lɛ akɛ nyɛTsɛ lɛ, nyɛkɛ gbeyeishemɔ abaa nyɛjeŋ yɛ nyɛgbɔtoo be lɛ mli.

¹⁸ Ejaakɛ nyɛle akɛ jeee nibii ni fiteɔ, tamɔ jwiɛtɛi loo shika, akɛkpɔ̃ nyɛ kɛjɛ nyɛyaka jeŋba ni nyɛna kɛjɛ nyɛtsɛmɛi lɛ aŋɔɔ lɛ mli;

¹⁹ shi moŋ Kristo, mɔ ni tamɔ Toobi ni he bɛ kpa loo ŋmamɔ nɔ ko lɛ lá ni jara wa lɛ akɛkpɔ̃ nyɛ.

²⁰ Ahala lɛ ato momosa dani ato jeŋ shishi, shi ajie lɛ kpo yɛ bei lɛ anaagbee mli yɛ nyɛhewɔ.

²¹ Nyɛtsɔ̃ enɔ nyɛheɔ Nyɔŋmɔ, mɔ ni tee lɛ shi kɛjɛ gbohii ateŋ ni ewo ehiɛ nyam lɛ nɔ nyɛyeɔ lɛ, no hewɔ lɛ, nyɛhemɔkɛyeli kɛ nyɛhiɛnɔkãmɔ yɛ Nyɔŋmɔ mli.

²² Ni akɛni nyɛtsuu nyɛsusumai ahe yɛ anɔkwale lɛ toiboo mli nyɛhã nyɛmimɛi asuɔmɔ ni osato bɛ mli lɛ hewɔ lɛ, nyɛkɛ tsui krɔŋŋ asumɔsumɔa nyɛhe jogbaŋŋ.

²³ Ejaakɛ afɔ nyɛ ehee, ni jeee wui ni fiteɔ, shi moŋ nɔ ni fiteee mli ajɛ afɔ nyɛ kɛtsɔ̃ Nyɔŋmɔ hiɛkãalɔ ni hiɔ shi daa lɛ wiemɔ lɛ nɔ.

²⁴ Ejaakɛ, “Heloo fɛɛ tamɔ jwɛi, ni enunyam lɛ fɛɛ tamɔ jwɛiaŋ fɔfɔi. Jwɛi gbiɔ ni emli fɔfɔi lɛ kpalaa.

²⁵ Shi Nuŋtsɔ lɛ wiemɔ lɛ hiɔ shi kɛyaa naanɔ.” Enɛ ji wiemɔ ni ajaje atsɔ̃ɔ nyɛ akɛ Sanekpakpa lɛ.