1 Mose 50 - ŊMALƐ KRƆŊKRƆŊ LƐ

¹ Kɛkɛ ni Yosef ho egbee etsɛ nɔ ni efo ni eshwɔ enaa.

² Yosef fã etsuji tsofawolɔi lɛ akɛ amɛwo etsɛ tsofa, ni amɛwo lɛ.

³ Amɛkɛ gbii nyɔŋmai ejwɛ wo lɛ tsofa lɛ; ejaakɛ gbii abɔ ni ayeɔ kɛwoɔ tsofa lɛ ji no. Ijiptbii lɛ fo Yakob gbii nyɔŋmai kpawo.

⁴ Be ni afo Yakob agbe naa lɛ, Yosef kɛɛ Farao we lɛ akɛ, “Agbɛnɛ, kɛ nyɛyɛ mihe tsuijurɔ lɛ, miikpa nyɛ fai, nyɛwoa Farao toi nɔ akɛ

⁵ mitsɛ hã mikã lɛ kitã akɛ, ‘Naa, eshɛ migbele be; mibu lɛ ni mitsa mihã mihe yɛ Kanaan shikpɔŋ lɛ nɔ lɛ, jɛi oyafu mi yɛ!’ No hewɔ lɛ, agbɛnɛ ŋmɛɛ mi gbɛ koni mayato mitsɛ ni maku misɛɛ maba.”

⁶ Farao to he akɛ, “Yaa ni oyafu otsɛ tamɔ bɔ ni ehã okã lɛ kitã lɛ.”

⁷ No hewɔ lɛ, Yosef yiŋ etee ni eyafu etsɛ. Farao tsuji lɛ fɛɛ, kɛ ewe onukpai lɛ kɛ Ijipt shikpɔŋ lɛ nɔ onukpai fɛɛ

⁸ kɛ Yosef shĩaŋbii lɛ kɛ enyɛmimɛi lɛ kɛ etsɛ we lɛ mli bii fɛɛ fata ehe kɛtee; amɛbii kɛ amɛtoi kɛ amɛtsinai kɛkɛ amɛshi yɛ Goshen shikpɔŋ lɛ nɔ.

⁹ Asaŋ shwiilii kɛ okpɔŋɔiatsɛmɛi hu kɛ Yosef tee; asafo yuu diɛŋtsɛ kɛ lɛ tee lɛ.

¹⁰ Agbɛnɛ be ni amɛshɛ Atad abeleshaahe lɛ ni yɔɔ Yordan faa lɛ sɛɛ lɛ, amɛfee yara wulu yɛ jɛi; ni Yosef fo etsɛ gbii kpawo.

¹¹ Be ni shikpɔŋ lɛ nɔ bii ni ji Kanaanbii lɛ na ŋkɔmɔyeli lɛ yɛ Atad abeleshaahe lɛ, amɛkɛɛ akɛ, “Enɛ lɛ Ijiptbii lɛ miiye ŋkɔmɔ waa diɛŋtsɛ.” No hewɔ lɛ, awo jɛi gbɛi akɛ Abel-Mizraim, eshishi ji Ijiptbii Akɔmɔyeli. Eyɛ Yordan sɛɛ.

¹² Yakob bii lɛ ye amɛtsɛ kitã ni ewo amɛ lɛ nɔ.

¹³ Amɛwo lɛ kɛtee Kanaan shikpɔŋ lɛ nɔ, ni amɛyafu lɛ yɛ Makpela abɔɔ lɛ mli tɛkplo lɛ mli. Abɔɔ nɛɛ Abraham diɛŋtsɛ he kɛ tɛkplo lɛ fɛɛ yɛ Efron, Hitnyo lɛ, dɛŋ yɛ Mamre bokãgbɛ ni ekɛfee efuuhe lɛ.

¹⁴ Be ni Yosef efu etsɛ sɛɛ lɛ, ekɛ enyɛmimɛi lɛ kɛ mɛi fɛɛ ni kɛ lɛ tee etsɛ fuu lɛ ku amɛsɛɛ kɛtee Ijipt ekoŋŋ.

Yosef shɛje enyɛmimɛi lɛ amii

¹⁵ Agbɛnɛ be ni Yosef nyɛmimɛi lɛ na akɛ amɛtsɛ egbo lɛ, amɛkɛɛ akɛ, “Ekolɛ Yosef ebɛ wɔ ewo emli, ni eeetɔ ehe owele yɛ efɔŋ fɛɛ ni wɔfee lɛ lɛ hewɔ.”

¹⁶ Enɛ hewɔ lɛ, amɛhã ayakɛɛ Yosef akɛ, “Otsɛ wo kitã dani egbo akɛ,

¹⁷ ‘Bɔ ni nyɛkɛ Yosef awie nɛ, Miikpa bo fai ni okɛ onyɛmimɛi lɛ atɔ̃mɔi kɛ amɛhe eshai lɛ afa amɛ ejaakɛ amɛfee bo efɔŋ.’ No hewɔ lɛ, agbɛnɛ wɔmiikpa bo fai ni okɛ otsɛ Nyɔŋmɔ lɛ tsuji lɛ atɔ̃mɔi lɛ afa amɛ!” Be ni amɛkɛ Yosef wie nɛkɛ lɛ, efo.

¹⁸ Kɛkɛ ni enyɛmimɛi lɛ tee amɛyabumɔ shi yɛ ehiɛ ni amɛkɛɛ, “Naa, otsuji ji wɔ!”

¹⁹ Yosef kɛɛ amɛ akɛ, “Nyɛkashea gbeyei! Minyɛŋ maye Nyɔŋmɔ najiaŋ mafee nɔ ko.

²⁰ Tsɛbelɛ, nyɛ lɛ, nyɛto nyɛyiŋ akɛ nyɛaafee mi efɔŋ, shi Nyɔŋmɔ hã etsɔ̃ nɔ kpakpa; bɔ ni afee ni atsɔ̃ no nɔ ahere mɛi babaoo ayiwala, tamɔ bɔ ni eba mli ŋmɛnɛ nɛɛ.

²¹ No hewɔ lɛ, nyɛkashea gbeyei! Mibalɛ nyɛ kɛ nyɛbii lɛ.” Bɔ ni ehã enyɛmimɛi lɛ atsui ni eshɛje amɛmii nɛ.

Yosef gbele

²² Yosef hi shi yɛ Ijipt shikpɔŋ lɛ nɔ kɛ etsɛ we lɛ. Ni eye afii oha kɛ nyɔŋma.

²³ Yosef na Efraim nanakansowai; ni Manase bi Makir bii lɛ hu afɔ amɛ ashwie eshuɔ nɔ.

²⁴ Agbɛnɛ Yosef kɛɛ enyɛmimɛi lɛ akɛ, “Migbele be eshɛ; shi saramɔ Nyɔŋmɔ aaabasra nyɛ kɛ̃, ni eeekpala nyɛ yɛ shikpɔŋ nɛɛ nɔ kɛaatee shikpɔŋ ni ekã Abraham kɛ Isak kɛ Yakob kitã yɛ he lɛ nɔ.”

²⁵ Kɛkɛ ni Yosef hã enyɛmimɛi, Yakob bii, lɛ kã lɛ kitã ni ekɛɛ, “Nyɔŋmɔ aaakai nyɛ kɛ̃. Kɛ eeebajie nyɛ lɛ, nyɛjiea miwui lɛ kɛjea biɛ kɛya.”

²⁶ Be ni Yosef eye afii oha kɛ nyɔŋma lɛ egbo. Amɛwo lɛ tsofa, ni akɛ lɛ wo adeka mli yɛ Ijipt.