1 Mose 49 - ŊMALƐ KRƆŊKRƆŊ LƐ

Yakob naagbee wiemɔi

¹ Kɛkɛ ni Yakob tsɛ ebii lɛ ni ekɛɛ, “Nyɛbuaa nyɛhe naa koni magba nyɛ wɔsɛɛ saji ni baaba nyɛ nɔ:

² “Nyɛbuaa nyɛhe naa, ni nyɛboa mi toi; nyɛ Yakob bihii, nyɛboa nyɛtsɛ Yakob toi!

³ “Ruben, bo ji mikromɔbi, miblahiaŋ be hewalɛ mli bi, mɔ ni fe fɛɛ yɛ gbɛnaa kɛ hewalɛ gbɛfaŋ.

⁴ Otamɔ nu hamahama ni damɔɔɔ he kome; ofeŋ klɛŋklɛŋ mɔ dɔŋŋ, ejaakɛ okɛ mihemɔ wɔ, ni owo misaa he muji ni obule misaatso.

⁵ “Simeon kɛ Levi lɛ, nyɛmimɛi ni; amɛkɛ amɛklantei lɛ tsuɔ yiwalɛnii.

⁶ Mihiŋ amɛ jinatoo mli, ni mitaŋ amɛkpei amli. Amɛmlifu mli lɛ, amɛgbe gbɔmɔ, ni amɛkɛ yiŋflɛflɛ fee tsinai akpaketsɛmɛi.

⁷ Alomɔ amɛmlifu, ejaakɛ enaa wa; alomɔ amɛmlila, ejaakɛ eyi wa. Magbala amɛmli mawo Israel magbɛ amɛ mashwã Israel shikpɔŋ lɛ nɔ fɛɛ.

⁸ “Yuda, onyɛmimɛi lɛ aaajie oyi. Oooye ohenyɛlɔi anɔ; otsɛbii lɛ aaakoto bo!

⁹ Yuda lɛ, jata binuu ni; mibi yagbe milɛloo ni eku esɛɛ eeba! Eedɛkɛ shi, eebumɔ shi tamɔ jata, tamɔ jatayoo; namɔ aaanyɛ lɛ ajije?

¹⁰ Maŋtsɛyeli ejeŋ Yuda dɛŋ, ni nɔyeli hu ejeŋ eshwiei adɛŋ; gbii abɔ ni jeŋmaji kɛ amɛ onia baa, ni amɛbaa amɛhe shi amɛhãa lɛ lɛ.

¹¹ Ekɛ etejibi aaaŋmɔ wain tso, ekɛ etejiyoo bi aaaŋmɔ wain tso ni wa. Ekɛ wain aaafɔ etade he, ekɛ wain tsuru fɔɔ aaafɔ ehebo he.

¹² Ehiŋmɛii aaatsu fɔɔ fe wain, ni enyanyɔji aaayɛ futaa, fe fufɔ.

¹³ “Zebulon aaahi ŋshɔ naa; ni ehilɛhe aaatsɔ̃ lɛji adaamɔhe, ni ekɛ Sidon aaaje husu.

¹⁴ “Isakar lɛ, teji ni he wa ni, ni ebuɔ shi yɛ kooloi atsui ateŋ.

¹⁵ Enaa akɛ hejɔɔmɔhe lɛ hi, ni shikpɔŋ lɛ yɛ akɔnɔ. Ni eŋɔɔ ekoto sɛɛ ehãa ni atere lɛ jatsu. Ni anyɛɔ enɔ ni etsu nii tamɔ nyɔŋ.

¹⁶ “Dan aaatsɔ̃ lumɔ ehã emɛi lɛ ni amɛaatamɔ Israel akutsei krokomɛi lɛ.

¹⁷ Ni Dan aaatsɔ̃ onufu ni ble gbɛ toi, onaŋka ni naa yɔɔ ebɔɔ yɛ gbɛ lɛ toi, ni ekɔ̃ɔ okpɔŋɔ nanetsitsi, ni enɔtalɔ lɛ kpaa gbeɔ shi.

¹⁸ “Yehowa, oyiwalaheremɔ lɛ, gbɛ miikwɛɔ nɛɛ!

¹⁹ “Gad lɛ ojotswalɔi asafo aaabatua lɛ, shi lɛ moŋ eeewo amɛ foi.

²⁰ “Asher shikpɔŋ aaaba nii kpɔtɔɔ nii ni sa maŋtsɛ.

²¹ “Naftali lɛ ofrote ni foɔ shi kɛkɛ ni; ni enaa ŋɔɔ.

²² “Yosef lɛ, tso nine ni woɔ yibii ni, tso nine ni ma nuhiŋmɛi he, ni eniji kwɔlɔɔ gbogbo.

²³ Gãitsɛ̃lɔi kɛ hiɛdɔɔ batua lɛ, ni amɛtsɛ̃rɛ̃ lɛ gãi kɛ yiwalɛ.

²⁴ Shi egãi lɛ yɛ hewalɛ kpɛŋŋ. Eniji kɛ ekɔ̃ɔji ahe yɛ oya; Yakob Nyɔŋmɔ Ofe lɛ ni hã lɛ nakai hewalɛ lɛ. Tookwɛlɔ lɛ ni ji Israel tɛsaa lɛ, gbɛi lɛ tsu enɛ.

²⁵ Otsɛ Yakob Nyɔŋmɔ lɛ ji mɔ ni aaaye abua bo. Nyɔŋmɔ Ofe lɛ baajɔɔ bo. Lɛ eeejɔɔ bo kɛ jɔɔmɔi ni jɛ ŋwɛi kɛ jɔɔmɔi ni jɛ shikpɔŋ lɛ shishi nui lɛ amli. Eeejɔɔ bo kɛ fufɔ ni kɔ̃ɔ, eeejɔɔ bo kɛ fɔmɔnii kpakpa.

²⁶ Otsɛ jɔɔmɔi lɛ mli wa fe naanɔ gɔji lɛ, kɛ naanɔ gɔ̃ŋkpɔi lɛ ajɔɔmɔi lɛ. Jɔɔmɔi nɛɛ ashwie Yosef yiteŋ, eshwie lɛ mɔ ni ajie lɛ yɛ enyɛmimɛi lɛ ateŋ ato afã lɛ pampam.

²⁷ “Benyamin lɛ, klaŋ ni yɔɔ hahaaha ni. Leebi kɛ gbɛkɛ lɛ emɔɔ emilɛloo ni eyeɔ.”

²⁸ Mɛnɛɛmɛi ji Israel akutsei nyɔŋma kɛ enyɔ lɛ; ni wiemɔi nɛɛ amɛtsɛ kɛ amɛ wie be ni ejɔɔ amɛ lɛ, amɛteŋ mɔ fɛɛ mɔ lɛ jɔɔmɔ ni sa lɛ lɛ, no ekɛjɔɔ lɛ.

Yakob gbele kɛ efuu

²⁹ Yakob wo amɛ kitã ni ekɛɛ amɛ akɛ, “Agbɛnɛ miiya mitsɛmɛi ni etsɔ̃ mihiɛ lɛ aŋɔɔ. Nyɛfũa mi nyɛfataa mitsɛmɛi lɛ ahe yɛ tɛkplo ni yɔɔ Efron, Hitnyo lɛ, abɔɔ lɛ mli lɛ mli.

³⁰ Tɛkplo nɛɛ yɛ Makpela abɔɔ lɛ mli yɛ Mamre bokãgbɛ, yɛ Kanaan shikpɔŋ lɛ nɔ; nɔ ni Abraham diɛŋtsɛ he kɛ abɔɔ lɛ fɛɛ yɛ Efron, Hitnyo lɛ, dɛŋ, ni eŋɔ fee efuuhe lɛ.

³¹ Jɛi afu Abraham kɛ eŋa Sara yɛ; jɛi afu Isak kɛ eŋa Rebeka yɛ; ni jɛi mifu Lea hu yɛ.

³² Abɔɔ nɛɛ kɛ tɛkplo ni yɔɔ mli lɛ, ahe yɛ Hitbii lɛ adɛŋ.”

³³ Be ni Yakob ewo ebii lɛ kitãi nɛkɛ egbe naa lɛ, ebua enaji anaa eshwie saa lɛ nɔ, ni ebu enaa. Afu lɛ afata emɛi lɛ ahe.