1 Mose 48 - ŊMALƐ KRƆŊKRƆŊ LƐ

Yakob jɔɔ Efraim kɛ Manase

¹ Sane nɛɛ sɛɛ lɛ abakɛɛ Yosef akɛ, “Naa, otsɛ he miiye.” No hewɔ lɛ, Yosef ŋɔ ebihii enyɔ ni ji Manase kɛ Efraim efata ehe kɛtee.

² Ayakɛɛ Yakob akɛ, “Obi Yosef miiba oŋɔɔ.” Kɛkɛ ni Yakob mia ehiɛ ni ete shi eta saatso lɛ nɔ.

³ Yakob kɛɛ Yosef akɛ, “Nyɔŋmɔ Ofe lɛ jie ehe kpo etsɔ̃ɔ mi yɛ Luz yɛ Kanaan shikpɔŋ lɛ nɔ, ni ejɔɔ mi ni ekɛɛ mi akɛ,

⁴ ‘Naa, mahã ofɔ pii ni obaashwere, ni mahã oshwiei atsɔmɔ maji pii, ni mikɛ shikpɔŋ nɛɛ aaahã oshwiei ni aaaba yɛ osɛɛ lɛ akɛ amɛnɔ kɛmiiya naanɔ.’ ”

⁵ Yakob tsa ewiemɔ lɛ nɔ ni ekɛɛ, “Obihii enyɔ ni ji Efraim kɛ Manase ni ofɔ yɛ Ijipt dani miba oŋɔɔ lɛ, minii ji amɛ. Efraim kɛ Manase etsɔ̃mɔ mibii tamɔ Ruben kɛ Simeon nɔŋŋ;

⁶ ni bii ni ooofɔ yɛ amɛsɛɛ lɛ afee bo onii; shi yɛ gboshiniiyeli gbɛfaŋ lɛ, aaabu amɛ ashi Efraim kɛ Manase nɔ.

⁷ Ejaakɛ be ni mijɛ Mesopotamia ni mibaa Kanaan lɛ, Rahel gbo shi mi yɛ gbɛ teŋ, be ni eshwɛ gbɛ kukuoo dani ashɛɔ Efrat lɛ, ni mifu lɛ yɛ jɛi yɛ gbɛ ni yaa Efrat ni ji ŋmɛnɛ Betlehem lɛ he.”

⁸ Be ni Yakob na Yosef bihii lɛ, ebi akɛ, “Namɛi nɛ?”

⁹ Yosef kɛɛ etsɛ akɛ, “Mibii ni Nyɔŋmɔ hã mi yɛ Ijipt lɛ nɛ.” Yakob kɛɛ, “Okɛ amɛ aba ni majɔɔ amɛ.”

¹⁰ Shi gbɔlɛ ehã Yakob hiŋmɛii anɔ eha, ni enaaa nii jogbaŋŋ. Yosef tsi gbekɛbii lɛ ebɛŋkɛ etsɛ. Yakob shwɔshwɔɔ amɛnaa ni eloo amɛ atuu,

¹¹ ni ekɛɛ Yosef akɛ, “Misusuko kɔkɔɔkɔ akɛ mana ohiɛ; ni naa, Nyɔŋmɔ ehã mina obii hu.”

¹² Agbɛnɛ Yosef hole gbekɛbii lɛ yɛ Yakob nakutsei anɔ, kɛkɛ ni ekɛ ehiɛ bu shi.

¹³ Yosef mɔmɔ gbekɛbii enyɔ lɛ fɛɛ amli, Efraim ye Yakob abɛku nɔ, ni Manase ye Israel ninejurɔ nɔ, ni etsi amɛ ebɛŋkɛ Yakob.

¹⁴ Kɛkɛ ni Yakob kpã eninejurɔ mli ni ekɛŋmɛ Efraim ni ji gbekɛ lɛ yiteŋ, ni ekɛ ebɛku tsɔ̃ eninejurɔ lɛ nɔ ekɛŋmɛ Manase yiteŋ, tsɛbelɛ Manase ji kromɔ.

¹⁵ Kɛkɛ ni Yakob jɔɔ Yosef ni ekɛɛ, “Nyɔŋmɔ, mɔ ni mitsɛmɛi Abraham kɛ Isak sɔ̃mɔ lɛ, Nyɔŋmɔ mɔ ni ekwɛ minɔ miwala gbii fɛɛ kɛbashi ŋmɛnɛ gbi nɛɛ,

¹⁶ bɔfo ni jie mi kɛjɛ efɔŋ fɛɛ mli lɛ, ajɔɔ gbekɛbii nɛɛ. Amɛhewɔ lɛ, migbɛi kɛ mitsɛmɛi Abraham kɛ Isak agbɛi gboŋ kɔkɔɔkɔ. Amɛyi afa babaoo yɛ shikpɔŋ lɛ nɔ.”

¹⁷ Be ni Yosef na akɛ etsɛ kɛ eninejurɔ eŋmɛ Efraim yiteŋ lɛ, enaaa he miishɛɛ, ni ewo etsɛ nine nɔ koni ejie kɛjɛ Efraim yiteŋ kɛyaŋmɛ Manase yiteŋ.

¹⁸ Ni Yosef kɛɛ etsɛ akɛ, “Jeee nakai ni Ataa, ejaakɛ mɔ nɛ ji kromɔbi; okɛ onine jurɔ aŋmɛ lɛ moŋ eyiteŋ.”

¹⁹ Shi etsɛ ekpɛlɛ̃ɛɛ nɔ, ni ekɛɛ, “Mibi, mile, mile krɛdɛɛ akɛ onukpa lɛ hu aaatsɔ̃ maŋ kpele, ni eeetsɔ agbo; shi kɛ̃lɛ enyɛmi gbekɛ lɛ aaatsɔ̃ kpeteŋkple fe lɛ, ni eshwiei aaatsɔ majimaji babaoo.”

²⁰ No hewɔ lɛ, Yakob jɔɔ gbekɛbii lɛ nakai gbi lɛ ni ekɛɛ, “Nyɛ nyɛgbɛi Israelbii kɛaajɔɔ akɛ, ‘Nyɔŋmɔ ahã otsɔ̃ tamɔ Efraim kɛ Manase.’ ” Belɛ Yakob ŋɔ onukpa gbɛhe lɛ ehã Efraim.

²¹ Kɛkɛ ni Yakob kɛɛ Yosef akɛ, “Naa, mi lɛ, migbele be eshɛ etã, shi nyɛ lɛ Nyɔŋmɔ kɛ nyɛ baahi shi, ni ekɛ nyɛ baaku sɛɛ kɛya nyɛblematsɛmɛi ashikpɔŋ lɛ nɔ ekoŋŋ.

²² Asaŋ, bo pɛ ji mɔ ni miŋɔ Shekem shikpɔŋ lɛ mihã, shi jeee onyɛmimɛi lɛ, nakai shikpɔŋ lɛ ni mikɛ miklante kɛ migãi shɔ̃ yɛ Amorbii lɛ adɛ̃ŋ lɛ.”