1 Mose 46 - ŊMALƐ KRƆŊKRƆŊ LƐ

Yakob kɛ eweku fɛɛ fã kɛtee Ijipt

¹ No hewɔ lɛ, Yakob fã kɛ nibii fɛɛ ni eyɔɔ, ni eba Beersheba. Eshã afɔlei ehã etsɛ Isak Nyɔŋmɔ lɛ yɛ jɛi.

² Nyɔŋmɔ kɛ Yakob wie yɛ ninaa mli nyɔɔŋ ni ekɛɛ, “Yakob, Yakob!” Ni Yakob here nɔ akɛ, “Naa mi.”

³ Kɛkɛ ni Nyɔŋmɔ kɛɛ lɛ akɛ, “Mi ji Yehowa, otsɛ Nyɔŋmɔ lɛ. Kaashe Ijipt yaa gbeyei ejaakɛ mahã oshwiei atsɔ̃ jeŋmaŋ kpeteŋkple yɛ jɛi.

⁴ Mi diɛŋtsɛ mi kɛ amɛ aaatee Ijipt, ni mi kɛ oshwiei aaasaa aba ekoŋŋ; ni ooogbo ofɔ̃ Yosef tsitsiŋ.”

⁵ Kɛkɛ ni Yakob kɛshwie nɔ kɛjɛ Beersheba. Ebihii lɛ ŋɔ lɛ Yakob lɛ, kɛ amɛŋamɛi kɛ amɛbii lɛ, ni amɛkɛ amɛ tara shwiilii lɛ ni Farao hã akɛ akɛbaŋɔ lɛ Yakob lɛ amli.

⁶ Asaŋ amɛŋɔ amɛkooloi kɛ amɛnibii ni amɛna yɛ Kanaan shikpɔŋ lɛ nɔ lɛ, ni amɛba Ijipt, Yakob kɛ eshwiei lɛ fɛɛ;

⁷ ebihii kɛ ebihii lɛ abihii kɛ ebiyei kɛ ebihii lɛ abiyei, eshwiei fɛɛ ekɛba Ijipt lɛ.

Yakob Shwiei lɛ

⁸ Yakob shwiei ni ba Ijipt lɛ agbɛii nɛ: Yakob kɛ ebii lɛ: Ruben, Yakob kromɔbi lɛ,

⁹ ebihii ji Hanok kɛ Pallu kɛ Hezron kɛ Karmi.

¹⁰ Simeon bihii nɛ: Yemuel kɛ Yamin kɛ Ohad kɛ Yakin kɛ Zohar kɛ Shaul ni ji Kanaanyoo lɛ bi lɛ.

¹¹ Levi bihii nɛ: Gershon kɛ Kohat kɛ Merari.

¹² Yuda bihii nɛ: Er kɛ Onan kɛ Shela kɛ Perez kɛ Zera, shi Er kɛ Onan gboi yɛ Kanaan shikpɔŋ lɛ nɔ; ni Perez bihii ji Hezron kɛ Hamul.

¹³ Isakar bihii nɛ: Tola kɛ Pua kɛ Yashub kɛ Shimron.

¹⁴ Zebulon bihii nɛ: Sered kɛ Elon kɛ Yakleel.

¹⁵ Mɛnɛɛmɛi ji Lea bihii kɛ amɛnyɛmi yoo Dina ni ekɛ Yakob fɔ yɛ Mesopotamia lɛ. Yakob bii ni ekɛ Lea fɔ fɛɛ feɔ gbɔmɛi nyɔŋmai etɛ̃ kɛ etɛ.

¹⁶ Gad bihii nɛ: Zefon kɛ Hagi kɛ Shuni kɛ Ezbon kɛ Eri kɛ Arodi kɛ Areli.

¹⁷ Asher bihii nɛ: Imna kɛ Ishvah kɛ Ishvi kɛ Beria kɛ amɛnyɛmi yoo Sera. Beria bihii ji Heber kɛ Malkiel.

¹⁸ Shwiei nyɔŋma kɛ ekpaa nɛɛ ji bii ni Yakob kɛ Zilpa, nyɔ́ŋyoo lɛ ni Laban kɛhã ebiyoo Lea lɛ fɔ.

¹⁹ Yakob ŋa Rahel bihii ji Yosef kɛ Benyamin.

²⁰ Yosef hu fɔ bii yɛ Ijipt. Ekɛ Osɔfo Potifera biyoo Asenat lɛ fɔ Manase kɛ Efraim.

²¹ Benyamin hu bii ji Bela kɛ Beker kɛ Ashbel kɛ Gera kɛ Naaman kɛ Ehi kɛ Rosh kɛ Mupim kɛ Hupim kɛ Ardi.

²² Mɛnɛɛmɛi ji Rahel kɛ Yakob shwiei lɛ. Amɛ fɛɛ amɛyibɔ ji nyɔŋma kɛ ejwɛ.

²³ Dan bi nɛ: Hushim.

²⁴ Naftali bii ji Yazeel kɛ Guni kɛ Yezer kɛ Shillem.

²⁵ Shwiei kpawo ni Yakob kɛ Bilha, nyɔ́ŋyoo lɛ ni Laban kɛhã ebi Rahel lɛ wo nɛ.

²⁶ Yakob shwiei diɛŋtsɛ ni ekɛba Ijipt lɛ ayibɔ ji gbɔmɛi nyɔŋmai ekpaa kɛ ekpaa, esoro ebihii lɛ aŋamɛi lɛ.

²⁷ Yosef bihii ni afɔ yɛ Ijipt lɛ ji bihii enyɔ. Belɛ gbɔmɛi fɛɛ ni jɛ Yakob we lɛ ni amɛba Ijipt lɛ ayibɔ ji gbɔmɛi nyɔŋmai kpawo.

Yakob kɛ ebii yɛ Ijipt

²⁸ Agbɛnɛ Yakob tsu Yuda kɛtsɔ ehiɛ kɛtee Yosef ŋɔɔ koni Yosef atsɔ̃ɔ lɛ gbɛ kɛya Goshen; ni amɛba Goshen.

²⁹ Kɛkɛ ni Yosef saa eshwiili ni eyiŋ etee koni eyakpee etsɛ Yakob yɛ Goshen; ni be ni Yosef na etsɛ lɛ, eloo lɛ atuu ni efo eshwie ekuɛ nɔ aahu.

³⁰ Israel kɛɛ Yosef akɛ, “Agbɛnɛ ni mina ohiɛ akɛ oyɛ jeŋ lolo nɛɛ, kɛ migbo tete po miyajɔɔ mihe.”

³¹ Kɛkɛ ni Yosef kɛɛ enyɛmimɛi lɛ kɛ etsɛ we lɛ akɛ, “Miiya Farao ŋɔɔ mayagba lɛ akɛ, ‘Minyɛmimɛi lɛ kɛ mitsɛ we lɛ ni yɔɔ Kanaan lɛ eba miŋɔɔ.

³² Gbɔmɛi lɛ tookwɛlɔi ji amɛ, ni amɛlɛɔ kooloi. Amɛkɛ amɛtoi kɛ amɛtsinai kɛ amɛnii fɛɛ ni amɛyɔɔ lɛ eba.’

³³ Yosef kɛɛ, ‘Kɛ Farao aaabatsɛ nyɛ ni eeebi nyɛ akɛ, Mɛni ji nyɛnitsumɔ? lɛ’

³⁴ nyɛkɛa lɛ akɛ, ‘Otsuji lɛɔ kooloi kɛjɛ wɔblahiaŋ kɛbashi ŋmɛnɛ; wɔ kɛ wɔtsɛmɛi lɛ fɛɛ koni ehã nyɛhi Goshen shikpɔŋ lɛ nɔ; ejaakɛ Ijiptbii nyaŋeɔ mɔ fɛɛ mɔ ni ji koolookwɛlɔ.’ ”