1 Mose 40 - ŊMALƐ KRƆŊKRƆŊ LƐ

Yosef tsɔ̃ɔ gboklɛfoi lɛ alamɔi ashishi

¹ Saji nɛɛ asɛɛ lɛ, Ijipt maŋtsɛ lɛ dãawolɔ lɛ kɛ ebolooshãlɔ lɛ tɔ̃ amɛnuŋtsɔ ni ji Ijipt maŋtsɛ lɛ nɔ.

² Farao mli fu epiafoi enyɔ nɛɛ, ni ji edãawolɔ nukpa lɛ kɛ ebolooshãlɔ nukpa lɛ,

³ ni eyawo amɛ tsuŋ yɛ blafoiatsɛ lɛ shĩa yɛ gboklɛfoi atsu lɛ mli he ni akɛ Yosef ewo lɛ.

⁴ Blafoiatsɛ lɛ tu piafoi lɛ ewo Yosef dɛŋ ni ekwɛɔ amɛnɔ. Piafoi enyɔ lɛ ye be kplaŋŋ yɛ tsu lɛ mli.

⁵ Gbi ko nyɔɔŋ lɛ amɛyi enyɔ lɛ fɛɛ amɛla, Ijipt maŋtsɛ lɛ dãawolɔ nukpa lɛ kɛ ebolooshãlɔ nukpa lɛ ni awo amɛ tsuŋ lɛ, amɛteŋ mɔ fɛɛ mɔ kɛ elamɔ, kɛ lamɔ lɛ shishi hu.

⁶ Be ni Yosef tee amɛŋɔɔ leebi lɛ, eyoo akɛ amɛfee mɔbɔmɔbɔ.

⁷ No hewɔ lɛ, ebi Farao piafoi nɛɛ ni kɛ lɛ yɔɔ mɔɔ lɛ mli yɛ enuŋtsɔ shĩa lɛ mli lɛ akɛ, “Mɛɛba nyɛfee mɔbɔmɔbɔ ŋmɛnɛ nɛkɛ?”

⁸ Amɛto he akɛ, “Wɔla lamɔi komɛi, ni mɔ ko bɛ ni aaatsɔ̃ɔ wɔ shishi.” Yosef kɛɛ, “Ani lamɔ shishitsɔɔmɔ lɛ jeee Nyɔŋmɔ nɔ ni? Nyɛfainɛ, nyɛgbaa mi lamɔi lɛ!”

⁹ No hewɔ lɛ, daawolɔi anukpa lɛ gba Yosef elamɔ lɛ, ni ekɛɛ lɛ akɛ, “Milamɔ lɛ mli lɛ, mina ni waintso ko ma mihiɛ.

¹⁰ Egbala niji etɛ̃, amrɔ nɔŋŋ ni efimɔ afofro kpɔi, ni egba afofro, ni ewo wainyibii shabii ni etsu.

¹¹ Mihiɛ Farao kpulu mli; ni mitserɛ wain yibii lɛ, ni miŋa miwo kpulu lɛ mli, kɛkɛ ni mikɛ kpulu lɛ hã Farao.”

¹² Yosef kɛɛ lɛ akɛ, “Naa olamɔ lɛ shishitsɔɔmɔ. Niji etɛ̃ lɛ damɔ shi hã gbii etɛ̃.

¹³ Biɛ gbii etɛ̃ lɛ, Farao aaajie bo yɛ tsuŋ, ni ekɛ bo aaayato ogbɛhe lɛ ekoŋŋ ni okɛ Farao kpulu lɛ aaawo edɛŋ tamɔ bɔ ni ofeɔ sa lɛ be ni bo ji edãawolɔ lɛ.

¹⁴ Shi kɛji ehi ehã bo lɛ, miikpa bo fai koni okai mi, ni omli ahi ahã mi koni otsi mitã otsɔ̃ɔ Farao koni abajie mi yɛ tsu nɛɛŋ.

¹⁵ Shi ju aju mi yɛ Hebribii ashikpɔŋ lɛ nɔ; ni biɛ nɛɛ hu mifeko nɔ ko ni sa akɛ akɛ mi awo kpabuŋ nɛɛŋ.”

¹⁶ Be ni abolooshãlɔi anukpa lɛ na akɛ lamɔ lɛ shishitsɔɔmɔ lɛ yɛ miishɛɛ lɛ, ekɛɛ Yosef akɛ, “Mi hu mila lamɔ ko. Milamɔ lɛ mli lɛ, mina ni mitere bodobodo kɛntɛŋi etɛ̃.

¹⁷ Kɛntɛŋ ni ma yiteŋ tɔɔ lɛ, niyenii srɔtoi fɛɛ ni ashãa ahãa Farao lɛ yɛ mli, ni loofɔji miiye yɛ kɛntɛŋ lɛ mli yɛ miyiteŋ.”

¹⁸ Yosef hã hetoo ni ekɛɛ, “Naa olamɔ lɛ shishitsɔɔmɔ. Kɛntɛŋi etɛ̃ lɛ damɔ shi hã gbii etɛ̃.

¹⁹ Biɛ gbii etɛ̃ lɛ, Farao aaajie bo yɛ tsuŋ ni eeefo oyi ni ekɛ bo aaatsotsoro tso nɔ, ni loofɔji aaaye oheloo.”

²⁰ Ni eba mli akɛ gbi ni ji etɛ̃ lɛ, Farao fɔmɔgbi ni. Eŋmɛ etsuji fɛɛ okplɔ̃ ni ejie edãawolɔi anukpa lɛ kɛ ebolooshãlɔi anukpa lɛ yɛ tsuŋ yɛ enukpai lɛ ahiɛ.

²¹ Ehã edãawolɔi anukpa lɛ yaye egbɛhe lɛ ekoŋŋ; ni lɛ ekɛ kpulu lɛ wo Farao dɛŋ.

²² Shi abolooshãlɔi anukpa lɛ, esɛŋ lɛ, tamɔ bɔ ni Yosef tsɔ̃ɔ amɛlamɔi lɛ ashishi lɛ.

²³ Shi dãawolɔ nukpa lɛ eyakaiii Yosef; ehiɛ kpa enɔ.