1 Mose 38 - ŊMALƐ KRƆŊKRƆŊ LƐ

Yuda kɛ Tamar

¹ Nɛkɛ be nɛɛ mli nɔŋŋ lɛ, Yuda shi enyɛmimɛi lɛ ni eyahi Adullamnyo ko ni atsɛɔ lɛ Hira lɛ ŋɔɔ.

² Yuda na Kanaannyo ko ni atsɛɔ lɛ Shua lɛ biyoo ko yɛ jɛi; eŋɔ oblayoo lɛ efee eŋa.

³ Oblayoo lɛ na musu ni efɔ binuu. Yuda wo gbekɛ lɛ Er.

⁴ Yoo lɛ na musu ekoŋŋ. Efɔ binuu ni ewo lɛ Onan.

⁵ Esaa efɔ binuu ekoŋŋ ni ewo lɛ Shela. Eyɛ Akzib be ni efɔ gbekɛ nuu lɛ.

⁶ Yuda ŋɔ yoo ehã Er, ebi kromɔ lɛ. Yoo lɛ gbɛi ji Tamar.

⁷ Shi Er, Yuda kromɔ lɛ fee ehe gbɔmɔ fɔŋ yɛ Yehowa hiɛ, ni Yehowa gbe lɛ.

⁸ Kɛkɛ ni Yuda kɛɛ Onan akɛ, “Ŋɔɔ onyɛmi nuu lɛ ŋa lɛ akɛ kulayeli ŋa, koni owo shwiei ohã onyɛmi nuu lɛ.”

⁹ Shi Onan le akɛ bii lɛ ebatsɔ̃ŋ enɔ. No hewɔ lɛ, kɛ etee enyɛmi lɛ ŋa lɛ ŋɔɔ ekɛ lɛ yawɔ lɛ, ejieɔ ehe nu lɛ eshwieɔ shikpɔŋ efiteɔ, koni ekahã enyɛmi lɛ miina shwiei.

¹⁰ Nɔ ni efee lɛ, efɔŋ ni yɛ Yehowa hiɛ; no hewɔ lɛ, Yehowa gbe Onan hu.

¹¹ Kɛkɛ ni Yuda kɛɛ eshaayoo Tamar akɛ, “Yaahi shi akɛ okulafo yɛ otsɛ we lɛ kɛyaashi beyinɔ ni mibi Shela lɛ aaada.” Ekɛɛ enɛ, ejaakɛ eeshe gbeyei akɛ Shela hu baagbo tamɔ enyɛmimɛi lɛ. No hewɔ lɛ, Tamar tee eyahi etsɛ we lɛ.

¹² Yɛ mli aahu lɛ, Yuda ŋa Shua biyoo lɛ bagbo; ni be ni Yuda etse etsui eŋmɛ emli lɛ, ekɛ enaanyo Hira, Adullamnyo lɛ, yiŋ tee etoohetsɔi kulɔi lɛ aŋɔɔ yɛ Timna.

¹³ Ayakɛɛ Tamar akɛ, “Oshaanuu miiya Timna eyaku etoi lɛ ahe tsɔi.”

¹⁴ Kɛkɛ ni Tamar jie ekulafeemɔ atadei lɛ yɛ ehe efɔ shi, ni ekɛ hiɛhaanɔ ha ehiɛ, ni ekɛ mama bla ehe koni akayoo lɛ; ni eyata shi yɛ Enaim klotia, yɛ Timna gbɛ lɛ toi ejaakɛ ena akɛ Shela eda, shi kɛ̃lɛ aŋɔɔɔ lɛ, Tamar lɛ, ahãaa Shela gbãlã.

¹⁵ Be ni Yuda na Tamar lɛ, esusu akɛ yoo ajwamãŋ ko ni, ejaakɛ eha ehiɛ.

¹⁶ Yuda gba kɛtee eŋɔɔ yɛ gbɛ lɛ toi, ni ekɛɛ lɛ akɛ, “Ofainɛ, hã ni maba oŋɔɔ,” ejaakɛ eleee akɛ eshaayoo lɛ ni. Tamar bi Yuda akɛ, “Mɛni obaahã mi koni okɛ mi ayawɔ?”

¹⁷ Yuda to he akɛ, “Mahã amɔ too kpakpo bi ko yɛ toi lɛ ateŋ abahã bo.” Ni Tamar kɛɛ lɛ akɛ, “Ojogbaŋŋ kɛji okɛ nɔ ko aaato mi awaba kɛyaashi beyinɔ ni ooohã akɛ too lɛ aba lɛ.”

¹⁸ Yuda bi lɛ akɛ, “Mɛni mikɛto bo awaba lɛ?” Tamar to he akɛ, “Owolonaasɔomɔnɔ kɛ ehe kpãa lɛ kɛ odɛhiɛmɔtso lɛ.” Kɛkɛ ni Yuda kɛ nibii lɛ hã Tamar, ni etee ekɛ lɛ yawɔ. Fee sɛɛ lɛ Tamar na musu,

¹⁹ Tamar te shi, ni eyiŋ etee. Eyajie ehiɛhaanɔ lɛ efɔ shi, ni ekɔ ekulafeemɔ atade lɛ ewo.

²⁰ Yuda kɛ too kpakpo bi lɛ hã enaanyo Adullamnyo lɛ kɛtee koni eyahe ewabatoo nii lɛ yɛ Tamar dɛŋ; shi enaanyo lɛ enaaa Tamar.

²¹ No hewɔ lɛ, ebi maŋbii komɛi ni yɔɔ Enaim lɛ akɛ, “Nɛgbɛ yoo ajwamãŋ lɛ ni ta Enaim gbɛ lɛ toi lɛ yɔɔ?” Amɛhã lɛ hetoo akɛ, “Yoo ajwamãŋ ko bɛ biɛ nɛɛ.”

²² Yuda naanyo lɛ ku esɛɛ eba Yuda ŋɔɔ ni ebakɛɛ lɛ akɛ, “Minaaa lɛ, ni asaŋ jɛibii lɛ kɛɛ, ‘Yoo ajwamãŋ ko bɛ biɛ nɛɛ.’ ”

²³ Yuda kɛɛ akɛ, “Hã ni eŋɔ kɛya, kɛjeee nakai lɛ wɔhiɛ aaashwie shi. Mihã okɛ too kpakpo bi lɛ tee, ni onaaa lɛ.”

²⁴ No sɛɛ aaafee nyɔji etɛ̃ lɛ, abakɛɛ Yuda akɛ, “Oshaayoo Tamar eyabɔ ajwamãŋ, ni nɔ ni ena yɛ ajwamãŋbɔɔ lɛ mli ji akɛ ena musu.” Yuda fã akɛ, “Amɔ lɛ kɛje kpo koni ashã lɛ.”

²⁵ Be ni akɛ Tamar jeɔ kpo kɛbaa lɛ, etsu atee eshaanuu Yuda ŋɔɔ ayakɛɛ lɛ akɛ, “Nuu mɔ ni nibii ji enɛɛmɛi lɛ, lɛ mikɛna musu lɛ.” Asaŋ Tamar kɛɛ, “Kwɛmɔ akɛ oooyoo mɔ ni nibii ji wolonaasɔomɔnɔ nɛɛ kɛ ehe kpãa nɛɛ kɛ tso nɛɛ lo?”

²⁶ Yuda yoo nibii lɛ, ni ekɛɛ, “Akɛni miŋɔɔɔ lɛ mihãaa mibi Shela lɛ esane ja.” Ni Yuda etaaa Tamar he dɔŋŋ.

²⁷ Be ni shɛ Tamar fɔmɔ be lɛ, ana akɛ hãaji ni yɔɔ emusu mli lɛ.

²⁸ Be ni efɔɔ lɛ, hãaji lɛ ateŋ mɔ kome jie enine kɛje kpo, ni yoofɔlɔ lɛ mɔ mli. Ekɛ kpãa tsuru fi nine lɛ, ni ekɛɛ, “Mɔnɛ tsutsu ba.”

²⁹ Shi abifao lɛ su enine lɛ, kɛkɛ ni enyɛmi lɛ je kpo kɛba, ni yoofɔlɔ lɛ kɛɛ akɛ, “Bo diɛŋtsɛ ogbu gbɛ kɛje kpo.” Ni awo gbekɛ lɛ Perez.

³⁰ No sɛɛ lɛ, enyɛmi lɛ ni kpãa tsuru lɛ yɔɔ enineshi lɛ hu ba, ni awo lɛ Zera.