1 Mose 35 - ŊMALƐ KRƆŊKRƆŊ LƐ

Nyɔŋmɔ jɔɔ Yakob yɛ Betel

¹ Nyɔŋmɔ kɛɛ Yakob akɛ, “Yaa Betel ni oyahi jɛi, ni oma afɔleshãa latɛ yɛ jɛi ohã Nyɔŋmɔ ni jie ehe kpo etsɔ̃ɔ bo be ni ojo onyɛmi Esau naa foi lɛ.”

² No hewɔ lɛ, Yakob kɛɛ ewe lɛ kɛ mɛi fɛɛ ni kɛ lɛ yɔɔ lɛ akɛ, “Nyɛjiea maŋsɛɛ wɔji ni yɔɔ nyɛteŋ lɛ nyɛshɛraa nyɛshwiea, ni nyɛtsua nyɛhe ni nyɛtsakea nyɛtadei.

³ Nyɛhãa wɔyaa Betel koni mayama afɔleshãa latɛ yɛ jɛi mahã Nyɔŋmɔ, mɔ ni bo misɔlemɔ toi yɛ mifimɔ gbi lɛ nɔ ni ewa mi yɛ gbɛ ni mifã lɛ fɛɛ mli lɛ.”

⁴ No hewɔ lɛ, amɛkɛ maŋsɛɛ wɔji lɛ fɛɛ ni yɔɔ amɛdɛŋ lɛ kɛ amɛtoiaŋnii lɛ bahã Yakob; kɛkɛ ni Yakob kɛtee eyafu yɛ tso kpele ko ni ma Shekem masɛi lɛ shishi.

⁵ Kɛkɛ ni amɛŋɔ shwie nɔ. Nyɔŋmɔ he ŋmiŋmi mɔmɔ maji fɛɛ ni bɔle amɛ lɛ, no hewɔ lɛ, amɛtiuuu Yakob webii lɛ.

⁶ Yakob kɛ mɛi fɛɛ ni ekɛnyiɛ lɛ bashɛ Luz ni ji Betel ni yɔɔ Kanaan shikpɔŋ lɛ nɔ lɛ.

⁷ Ema afɔleshãa latɛ yɛ jɛi, ni etsɛ jɛi El-Betel, ejaakɛ jɛi Nyɔŋmɔ jie ehe shi etsɔ̃ɔ lɛ yɛ, be ni ejo enyɛmi Esau naa foi lɛ.

⁸ Ni Debora, mɔ ni kwɛɔ Rebeka kɛjɛ egbekɛbiiashi lɛ, gbo ni afu lɛ yɛ Betel wuoyigbɛ yɛ tso kpele ko shishi. No hewɔ lɛ, awo tso lɛ gbɛi akɛ Allon-bakut.

⁹ Ni Nyɔŋmɔ jie ehe kpo etsɔ̃ɔ Yakob ekoŋŋ, be ni ejɛ Mesopotamia eba lɛ, ni ejɔɔ lɛ.

¹⁰ Nyɔŋmɔ kɛɛ lɛ akɛ, “Ogbɛi ji Yakob; atsɛŋ bo Yakob dɔŋŋ, shi moŋ aaatsɛ bo Israel.” No hewɔ lɛ, Nyɔŋmɔ wo lɛ Israel.

¹¹ Nyɔŋmɔ kɛɛ lɛ akɛ, “Mi ji Nyɔŋmɔ Ofe lɛ; fɔ ni oyi afa. Maŋ kɛ maji babaoo aaajɛ omli, ni maŋtsɛmɛi hu aaajɛ omli.

¹² Shikpɔŋ lɛ ni mikɛhã Abraham kɛ Isak lɛ, bo mikɛbaahã, ni oshwiei ni aaaba yɛ osɛɛ lɛ mikɛ shikpɔŋ nɛɛ baahã.”

¹³ Kɛkɛ ni Nyɔŋmɔ shi Yakob yɛ he ni ekɛ lɛ wie yɛ lɛ, ni etee ŋwɛi.

¹⁴ Yakob ŋɔ tɛ eto okadi yɛ he ni Nyɔŋmɔ kɛ lɛ wie yɛ lɛ, ni efɔse wain kɛ mu eshwie nɔ.

¹⁵ No hewɔ lɛ, Yakob wo he ni Nyɔŋmɔ kɛ lɛ wie yɛ lɛ gbɛi akɛ Betel.

Rahel gbele

¹⁶ Kɛkɛ ni Yakob kɛ ewebii lɛ fã kɛjɛ Betel. Be ni eshwɛ gbɛ kukuoo ko lolo dani amɛshɛɔ Efrat lɛ, Rahel bɔi kɔ̃ɔmɔ, ni kɔ̃ɔmɔ lɛ mli yawa.

¹⁷ Be ni fɔmɔ lɛ mli ewa nɛkɛ lɛ, yoofɔlɔ lɛ kɛɛ Rahel akɛ, “Kaashe gbeyei, ejaakɛ obaafɔ nuu ekoŋŋ.”

¹⁸ Be ni Rahel etɔ biti ni eehe enyɔ lɛ, ewo abifao lɛ gbɛi akɛ Benoni; shi etsɛ wo lɛ Benyamin.

¹⁹ Rahel gbo ni afu lɛ yɛ Efrat ni ji Betlehem gbɛ lɛ he.

²⁰ Yakob kɛ tɛ ko to okadi yɛ Rahel saŋ lɛ nɔ; ni no hewɔ lɛ, atsɛɔ lɛ Rahel saŋ nɔ tɛ kɛbashi ŋmɛnɛ.

²¹ Israel ni atsɛɔ lɛ Yakob hu lɛ tsa egbɛfaa lɛ nɔ, ni eyashi ebuu lɛ yɛ Eder mɔɔ lɛ sɛɛgbɛ.

Yakob bihii lɛ

²² Be ni Yakob yɔɔ nakai shikpɔŋ lɛ nɔ lɛ, Ruben yi mli etee ekɛ etsɛ hemɔ Bilha lɛ yawɔ; Yakob nu sane nɛɛ he. Yakob yɛ bihii nyɔŋma kɛ enyɔ.

²³ Lea bihii ji Ruben, Yakob kromɔbi lɛ, kɛ Simeon kɛ Levi kɛ Yuda kɛ Isakar kɛ Zebulon.

²⁴ Rahel bihii ji Yosef kɛ Benyamin.

²⁵ Bilha, Rahel weyoo lɛ, bihii ji Dan kɛ Naftali.

²⁶ Ni Zilpa, Lea weyoo lɛ, bii ji Gad kɛ Asher. Mɛnɛɛmɛi ji Yakob bihii lɛ ni efɔ yɛ Mesopotamia lɛ.

Isak gbele

²⁷ Yakob ba etsɛ Isak ŋɔɔ yɛ Mamre loo Kiriat-Arba ni bɛŋkɛ Hebron lɛ, he ni Abraham kɛ Isak bato gbɔ yɛ lɛ.

²⁸ Afii ni Isak ye ji afii oha kɛ nyɔŋmai kpaanyɔ.

²⁹ Isak tsɔ̃ nuumo ni egbɔ kotokoto; egbo ni afu lɛ yɛ ewekumɛi amasɛi be mli ni eye afii babaoo lɛ. Ni ebii ni ji Esau kɛ Yakob fu lɛ.