1 Mose 32 - ŊMALƐ KRƆŊKRƆŊ LƐ

Yakob saa ehe ni ekɛ Esau ayakpe

¹ Kɛkɛ ni Yakob hu kɛshwie nɔ. Nyɔŋmɔ bɔfoi kɛ lɛ bakpe.

² Be ni ena amɛ lɛ, ekɛɛ, “Enɛ lɛ Nyɔŋmɔ ta nɛ!” Ni ewo jɛi Mahanaim.

³ Kɛkɛ ni Yakob tsu mɛi kɛtsɔ ehiɛ kɛtee enyɛmi Esau ŋɔɔ yɛ Seir yɛ Edom shikpɔŋ lɛ nɔ.

⁴ Wiemɔ ni ekɛtsu amɛ nɛ, “Nyɛkɛa minuŋtsɔ Esau akɛ, bɔ ni otsulɔ Yakob kɛɛ nɛ: ‘Miyato gbɔ yɛ Laban ŋɔɔ, ni mitsɛ yɛ jɛi aahu kɛbashi ŋmɛnɛ.

⁵ Minã tsinai kɛ tejii kɛ toi kɛ tsuji hii kɛ tsuji yei, ni mitsu ni abakɛɛ bo, minuŋtsɔ, koni kɛ miba lɛ ona mihe tsuijurɔ.’ ”

⁶ Mɛi ni atsu lɛ ku amɛsɛɛ amɛba Yakob ŋɔɔ, ni amɛbakɛɛ lɛ akɛ, “Wɔtee onyɛmi Esau ŋɔɔ, ni lɛ hu ekɛ hii ohai ejwɛ miiba abakpee bo.”

⁷ Kɛkɛ ni Yakob tsui fã, ni efee yeyeeye naakpa. Eja emɛi lɛ kɛ toi lɛ kɛ tsinai lɛ kɛ yoomai lɛ amli kui enyɔ ni ekɛɛ,

⁸ “Kɛji Esau batua ku kome nɛɛ ni etswia amɛ nii lɛ, koni ku kome ni eshwɛ lɛ ana gbɛ ajo foi.”

⁹ Kɛkɛ ni Yakob sɔle ekɛɛ, “Mitsɛ Abraham Nyɔŋmɔ kɛ mitsɛ Isak Nyɔŋmɔ, Yehowa, bo mɔ ni okɛɛ mi akɛ, ‘Kuu osɛɛ oya oshikpɔŋ lɛ nɔ kɛ owekumɛi aŋɔɔ, ni mafee bo jogbaŋŋ’ lɛ,

¹⁰ osuɔmɔ ni tsakeee kɛ onɔkwayeli fɛɛ ni ojie kpo otsɔ̃ɔ otsulɔ lɛ, ekome folo nɛkɛ esaaa mi. Dɛhiɛmɔtso kɛkɛ mihiɛ kɛfo Yordan nɛɛ; shi agbɛnɛ mitsɔ asafo kui enyɔ.

¹¹ Miikpa bo fai koni ojie mi yɛ Esau, minyɛmi lɛ, dɛŋ shi miishe lɛ gbeyei, koni ekaba ni ebatswia wɔ fɛɛ nii, mi kɛ nyɛmɛi lɛ kɛ bii lɛ.

¹² Bo okɛɛ akɛ, ‘Mafee bo jogbaŋŋ, ni mahã oshwiei afa tamɔ ŋshɔnaa shia, ni anyɛŋ amɛyibɔ akane yɛ amɛyifalɛ naa.’ ”

¹³ No hewɔ lɛ, Yakob wɔ jɛi nakai gbi lɛ, ni ekɛ nii ni ehiɛ lɛ eko yake enyɛmi Esau;

¹⁴ too abotia yei ohai enyɔ kɛ too kpakpoi nyɔŋmai enyɔ, too gwantɛŋ yei ohai enyɔ kɛ too ojwɛnii nyɔŋmai enyɔ

¹⁵ kɛ yoomai nyɔŋmai etɛ̃ ni miihã amɛbii fufɔ lolo kɛ amɛbii lɛ, kɛ tsina hii nyɔŋma kɛ tsina yei nyɔŋmai ejwɛ kɛ teji yei nyɔŋmai enyɔ kɛ teji hii nyɔŋma.

¹⁶ Yakob kɛ nibii nɛɛ wo etsuji lɛ adɛŋ kuikui, ni ekɛɛ tsuji lɛ akɛ, “Nyɛtsɔa mihiɛ ni nyɛhãa gbɛ akãa ku kɛ ku teŋ.”

¹⁷ Yakob wo klɛŋklɛŋ ku lɛ nɔkwɛlɔ lɛ kitã akɛ, “Kɛji minyɛmi Esau kɛ bo kpe ni ebi bo akɛ, ‘Namɔ gbɔmɔ ji bo, ni nɛgbɛ oyaa, ni namɔ nii ji enɛɛmɛi ni nyiɛ ohiɛ nɛɛ?’ lɛ,

¹⁸ no lɛ ohã lɛ hetoo akɛ, ‘Otsulɔ Yakob nikeenii ni ekɛtsu akɛ akɛbake minuŋtsɔ Esau ni; ni naa, lɛ diɛŋtsɛ lɛ enyiɛ wɔsɛɛ?’ ”

¹⁹ Nakai kitã nɔŋŋ ewo mɔ ni ji enyɔ kɛ mɔ ni ji etɛ̃ lɛ kɛ mɛi fɛɛ hu ni nyiɛ kui lɛ asɛɛ lɛ akɛ, “Kɛ nyɛnina Esau lɛ, bɔ ni nyɛkɛ lɛ awie nɛ;

²⁰ ni nyɛsaa nyɛkɛa lɛ akɛ, naa ‘Otsulɔ Yakob nyiɛ wɔsɛɛ.’ ” Esusumɔ ji akɛ, “Mikɛ nikeenii ni nyiɛ hiɛ nɛɛ yaakpãtã lɛ, ni no sɛɛ dani mayana ehiɛ; eko lɛ eeekwɛ mihiɛ.”

²¹ Kɛkɛ ni akɛ nikeenii lɛ tsɔ Yakob hiɛ, shi lɛ diɛŋtsɛ lɛ, ekɛ mɛi ni eshwɛ lɛ wɔ jɛi nakai gbi lɛ.

Yakob kɛ nuu ko nɔ yɛ Peniel

²² Yakob te shi nyɔɔŋ lɛ mli, ni ekɛ eŋãmɛi enyɔ lɛ kɛ eweyei enyɔ lɛ kɛ ebihii nyɔŋma kɛ ekome lɛ yafo faa lɛ yɛ Yabok faafoohe lɛ.

²³ Ehã amɛfo faa lɛ kɛ nii ni eyɔɔ fɛɛ.

²⁴ Ni ebashwɛ Yakob kome. Nuu ko kɛ lɛ banɔ kɛyashi jetsɛremɔ.

²⁵ Be ni nuu lɛ na akɛ enyɛɛɛ Yakob lɛ, etswa Yakob joŋku nɔ, ni joŋku talɔ lɛ hwãŋ yɛ nɔmɔ lɛ mli.

²⁶ Nuu lɛ kɛɛ akɛ, “Hã maya, shi je miitsɛre!” Shi Yakob kɛɛ akɛ, “Mihaŋ oya, ja ojɔɔ mi dã.”

²⁷ Nuu lɛ bi Yakob akɛ, “Te atsɛɔ bo tɛŋŋ?” Yakob to he akɛ, “Atsɛɔ mi Yakob.”

²⁸ Nuu lɛ kɛɛ lɛ akɛ, “Atsɛŋ bo Yakob dɔŋŋ, shi Israel aaatsɛ bo, ejaakɛ okɛ Nyɔŋmɔ kɛ gbɔmɛi eshi mple, ni oye kunim.”

²⁹ Yakob kɛɛ lɛ akɛ, “Miikpa bo fai ni otsɔ̃ɔ mi ogbɛi.” Shi nuu lɛ kɛɛ, “Mɛni hewɔ obiɔ migbɛi?” Ni ejɔɔ Yakob moŋ yɛ jɛi.

³⁰ Yakob kɛɛ akɛ, “Mina Nyɔŋmɔ hiɛ kɛ hiɛ, shi kɛ̃lɛ migbooo.” No hewɔ lɛ, ewo jɛi Peniel.

³¹ Be ni efoŋ yɛ Peniel lɛ, je etsɛre lɛ, ni eetsutsɔ egboŋ.

³² No hewɔ lɛ, kɛbashi ŋmɛnɛ Israelbii yeee joŋku he loo, ejaakɛ nuu lɛ tswa Yakob joŋku lɛ nɔ, ni ejoŋku lɛ hwãŋ.