1 Mose 25 - ŊMALƐ KRƆŊKRƆŊ LƐ

Abraham ŋɔ Ketura akɛ ŋa

¹ Abraham ŋɔ yoo kroko. Yoo lɛ gbɛi ji Ketura.

² Abraham kɛ Ketura fɔ Zimran kɛ Yokshan kɛ Medan kɛ Midian kɛ Ishbak kɛ Shua.

³ Yokshan fɔ Sheba kɛ Dedan. Dedan bii ji Ashurbii kɛ Letushbii kɛ Leumbii;

⁴ Midian bii ji Efa kɛ Efer kɛ Hanok kɛ Abida kɛ Eldaa. Mɛnɛɛmɛi fɛɛ lɛ Ketura shwiei ni.

⁵ Abraham kɛ nii fɛɛ ni eyɔɔ lɛ hã Isak.

⁶ Shi ehemɛi lɛ abii lɛ, Abraham hã amɛ nikeenii be mli ni ehiɛ kã beebe, ni ewo amɛ gbɛ kɛje ebi Isak he kɛtee bokãgbɛ yɛ bokãgbɛ shikpɔŋ lɛ nɔ.

Abraham gbele kɛ efuu

⁷ Afii abɔ ni Abraham ye dani egbo ji afii oha kɛ nyɔŋmai kpawo kɛ enumɔ.

⁸ Ni Abraham gbo yɛ gbɔlɛ kpakpa mli, nuumo ni, ni egbɔ kotokoto.

⁹ Isak kɛ Ishmael ni ji ebii lɛ fu lɛ yɛ Makpela tɛkplo lɛ mli. Tɛkplo nɛɛ yɛ Efron, ni ji Zohar Hitnyo lɛ bi lɛ shikpɔŋ ni yɔɔ Mamre bokãgbɛ lɛ mli.

¹⁰ Abraham he nɛkɛ shikpɔŋ nɛɛ yɛ Hitbii lɛ adɛŋ. Jɛi afu Abraham kɛ eŋa Sara fɛɛ yɛ.

¹¹ Abraham gbele sɛɛ lɛ, Nyɔŋmɔ jɔɔ ebinuu Isak. Ehi shi yɛ “Mɔ ni hiɛ kã ni naa mi” lɛ nubu lɛ he.

Ishmael Shwiei

¹² Mɛnɛɛmɛi ji Abraham bi Ishmael ni Ijiptyoo Hagar ni ji Sara weyoo lɛ kɛ Abraham fɔ lɛ shwiei.

¹³ Yɛ fɔmɔ naa lɛ, Ishmael bihii lɛ agbɛii nɛ: Nebaiot, lɛ ji kromɔ, kɛ Kedar kɛ Abdeel kɛ Mibsam

¹⁴ kɛ Mishma kɛ Duma kɛ Masa

¹⁵ kɛ Hadad kɛ Tema kɛ Yetur kɛ Nafish kɛ Kedema.

¹⁶ Ishmael bihii lɛ, amɛ ji akutsei nyɔŋma kɛ enyɔ lɛ ablematsɛmɛi, ni akɛ amɛgbɛii wo amɛkrowai kɛ amɛshitoohei lɛ.

¹⁷ Afii abɔ ni Ishmael ye ji afii oha kɛ nyɔŋmai etɛ̃ kɛ kpawo. Egbo, ni afu lɛ yɛ ewekumɛi ateŋ.

¹⁸ Ishmael shwiei nɛɛ he shi kɛjɛ Hawila kɛyashi Shur. Amɛshikpɔŋ lɛ yɛ Ijipt ŋlɛnɔ kɛyaa Asiria gbɛ. Amɛtse amɛhe kɛje Abraham shwiei krokomɛi lɛ ahe.

Esau kɛ Yakob fɔmɔ

¹⁹ Abraham bi Isak shwiei nɛ: Abraham fɔ Isak.

²⁰ Isak eye afii nyɔŋmai ejwɛ ni eŋɔ Rebeka ni ji Betuel Aramnyo ni jɛ Mesopotamia lɛ biyoo lɛ. Laban, Aramnyo lɛ nyɛmi yoo ni.

²¹ Isak kpa Yehowa fai ehã eŋa lɛ ejaakɛ efee kene. Yehowa bo efaikpamɔ lɛ toi ni eŋa Rebeka na musu.

²² Bii lɛ shimɔshimɔɔ amɛhe yɛ musu lɛ mli. Ni Rebeka kɛɛ, “Mɛɛba sa akɛ nɛkɛ nɔ ko afee mi?” No hewɔ lɛ, etee eyabi Yehowa.

²³ Ni Yehowa kɛɛ lɛ akɛ, “Jeŋmaji enyɔ yɛ omusuŋ, ni maŋ kome he aaawa fe ekome, ni onukpa lɛ aaasɔmɔ gbekɛ lɛ.”

²⁴ Be ni Rebeka fɔmɔ be shɛ lɛ, efɔ hãaji.

²⁵ Mɔ ni ba klɛŋklɛŋ lɛ etsuɔ fɔɔ kɛ ehe tsɔi sulaŋŋ tamɔ ofo; awo lɛ Esau.

²⁶ No sɛɛ lɛ, enyɛmi lɛ hu ba ni enine hiɛ Esau nanetsitsi mli, ni awo lɛ Yakob. Be ni afɔ amɛ lɛ, Isak eye afii nyɔŋmai ekpaa.

Esau hɔɔ ekromɔbi gbɛnaa

²⁷ Gbekɛbii lɛ badara. Esau le gbɔbimɔ jogbaŋŋ, no hewɔ lɛ, efɔɔ ŋa mli yaa; shi Yakob lɛ gbɔmɔ kpoo ni, ni ehiɔ shĩa.

²⁸ Isak sumɔɔ Esau ejaakɛ milɛloo ŋɔɔ enaa shi Rebeka sumɔɔ Yakob.

²⁹ Gbi ko lɛ Yakob miihoo nii, ni Esau jɛ ŋa lɛ mli eba ni hɔmɔ miiye lɛ.

³⁰ Esau kɛɛ Yakob akɛ, “Miikpa bo fai, hã mi nɛkɛ niyenii tsuru nɛɛ eko maye, shi hɔmɔ miiye mi.” No hewɔ lɛ, awo Esau gbɛi akɛ Edom.

³¹ Shi Yakob kɛɛ Esau akɛ, “Hɔɔmɔ okromɔbi gbɛnaa lɛ ohã mi dã!”

³² Ni Esau kɛɛ akɛ, “Miigbo kɛ hɔmɔ, ni mɛni kromɔbi gbɛnaa nɛɛ baafee ehã mi?”

³³ Yakob kɛɛ lɛ akɛ, “Kã mi kitã yɛ nɔ dã!” Hewɔ lɛ Esau kã lɛ kitã ni ehɔ̃ɔ ekromɔbi gbɛnaa lɛ ehã Yakob.

³⁴ Kɛkɛ ni Yakob hã Esau aboloo kɛ abɔbɔi ni ehoo lɛ eko. Esau ye, ni enu nɔ ko eshwie nɔ; kɛkɛ ni ete shi, ni eyiŋ etee. Bɔ ni fee ni Esau ŋmɛɛ ekromɔbi gbɛnaa ni ebuuu lɛ nɛ.