1 Mose 22 - ŊMALƐ KRƆŊKRƆŊ LƐ

Nyɔŋmɔ ka Abraham

¹ Saji nɛɛ asɛɛ lɛ eba mli akɛ Nyɔŋmɔ ka Abraham ni ekɛɛ lɛ akɛ, “Abraham!” Ni Abraham kɛɛ, “Naa mi!”

² Nyɔŋmɔ kɛɛ lɛ akɛ, “Ŋɔɔ obi Isak ni ji obi koome ni odɔɔ ehe lɛ, ni oyiŋ oya Moria Shikpɔŋ lɛ nɔ, ni okɛ lɛ ayashã afɔle yɛ jɛi, yɛ gɔji lɛ ateŋ ekome ni matsɔ̃ɔ bo lɛ nɔ.”

³ No hewɔ lɛ, Abraham te shi leebi maŋkpa, ni ewo eteji nɔ nii, ni eŋɔ eblahii lɛ enyɔ kɛ ebi Isak lɛ efata ehe. Egba lai ni ekɛyaashã shãa afɔle lɛ; ni eyiŋ eeya he ni Nyɔŋmɔ etsɔ̃ɔ lɛ lɛ.

⁴ Gbi ni ji etɛ̃ lɛ nɔ lɛ, Abraham wo ehiɛ nɔ, ni ena jɛi yɛ shɔŋŋ.

⁵ Kɛkɛ ni Abraham kɛɛ eblahii lɛ akɛ, “Nyɛkɛ teji lɛ ahĩa biɛ; mi kɛ oblanyo lɛ miiya he ni jeɔ lɛ wɔyaja Nyɔŋmɔ ni wɔku wɔsɛɛ wɔba nyɛŋɔɔ ekoŋŋ.”

⁶ Kɛkɛ ni Abraham kɛ afɔleshãa lai lɛ tere ebi Isak, ni eŋɔ la lɛ kɛ kakla lɛ ehiɛ edɛ; ni amɛyi enyɔ lɛ pɛ amɛyi mli amɛtee.

⁷ Be ni amɛyaa lɛ, Isak kɛ etsɛ Abraham wie, ni ekɛɛ, “Ataa!” Etsɛ here nɔ ekɛɛ, “Naa mi, mibi!” Ni Isak kɛɛ, “Naa, la kɛ lai nɛ, shi nɛgbɛ too gwantɛŋbi ni akɛbaashã shãa afɔle lɛ yɔɔ?”

⁸ Abraham to he akɛ, “Mibi, Nyɔŋmɔ diɛŋtsɛ aaahã too gwantɛŋ ni akɛshã shãa afɔle lɛ!” Kɛkɛ ni amɛyi enyɔ lɛ fɛɛ amɛkɛshwie nɔ kɛtee.

⁹ Be ni amɛshɛ he ni Nyɔŋmɔ etsɔ̃ɔ lɛ, Abraham ma afɔleshãa latɛ yɛ jɛi. Eto lai lɛ eshwie afɔleshãa latɛ lɛ nɔ. Kɛkɛ ni efi ebi Isak lɛ, ni ekɛ lɛ ŋmɛ lai lɛ nɔ yɛ afɔleshãa latɛ lɛ nɔ.

¹⁰ Kɛkɛ ni Abraham kpã enine mli ekɔ kakla lɛ koni ekɛgbe ebi lɛ.

¹¹ Shi Yehowa bɔfo lɛ jɛ ŋwɛi etsɛ Abraham ekɛɛ, “Abraham, Abraham!” Abraham here nɔ ekɛɛ, “Naa mi!”

¹² Bɔfo lɛ kɛɛ lɛ akɛ, “Kaahã onine miisa oblanyo lɛ he, ni asaŋ kaafee lɛ nɔ ko nɔ ko! Shi mina mile agbɛnɛ akɛ osheɔ Nyɔŋmɔ gbeyei, akɛni okamaaa lɛ obi koome nɛɛ lɛ.”

¹³ Kɛkɛ ni Abraham wo ehiɛ nɔ; eyaakwɛ ehe lɛ, naa ojwɛni ko yɛ esɛɛgbɛ ni eklontoi elalaa koo. Abraham tee eyamɔ ojwɛni lɛ, ni eŋɔ lɛ eshã shãa afɔle lɛ yɛ ebi lɛ najiaŋ.

¹⁴ No hewɔ lɛ, Abraham wo jɛi gbɛi akɛ “Yehowa aaakwɛ.” No hewɔ akɛɔ kɛ ŋmɛnɛ akɛ, “Yehowa Gɔŋ lɛ nɔ aaakwɛ yɛ lɛ.”

¹⁵ Ni Yehowa bɔfo lɛ jɛ ŋwɛi etsɛ Abraham nɔ ni ji shii enyɔ nɔ,

¹⁶ ni ekɛɛ, “Bɔ ni Yehowa kɛɛ nɛ, ‘Mikã mi diɛŋtsɛ mihe kitã akɛ, akɛni ofee enɛ ni okamaaa mi obi lɛ ni ji obi kome too lɛ

¹⁷ hewɔ lɛ, jɔɔmɔ majɔɔ bo, ni mahã oshwiei afa tamɔ ŋwɛi ŋulamii kɛ ŋshɔnaa shia. Oshwiei lɛ aaaye amɛhenyɛlɔi anɔ kunim.

¹⁸ Ni oshwiei lɛ amli aaajɛ ajɔɔ shikpɔŋ lɛ nɔ maji fɛɛ, ejaakɛ obo mi toi.’ ”

¹⁹ Kɛkɛ ni Abraham ku esɛɛ kɛba eblahii lɛ aŋɔɔ. Amɛte shi, ni amɛ fɛɛ amɛŋɔ shwie nɔ kɛba Beersheba. Abraham hi shi yɛ Beersheba.

²⁰ Saji nɛɛ asɛɛ lɛ, eba mli akɛ abakɛɛ Abraham akɛ, “Naa, Milka hu kɛ onyɛmi nuu Nahor efɔ bii.”

²¹ Kromɔbi lɛ ji Uz kɛ enyɛmi Buz kɛ Kemuel ni ji Aram tsɛ lɛ;

²² kɛ Kesed kɛ Hazo kɛ Pildash kɛ Yidlaf kɛ Betuel.

²³ Betuel fɔ Rebeka. Mɛi kpaanyɔ nɛɛ ji mɛi ni Milka kɛ Abraham nyɛmi Nahor fɔ.

²⁴ Nahor hemɔ ni atsɛɔ lɛ Reuma lɛ hu kɛ Nahor fɔ Teba kɛ Gaham kɛ Tahash kɛ Maaka.