1 Mose 2 - ŊMALƐ KRƆŊKRƆŊ LƐ

¹ Nɛkɛ ji bɔ ni agbe ŋwɛi kɛ shikpɔŋ kɛ amɛsafoi lɛ fɛɛ bɔɔ naa ahã.

² Be ni shɛ gbi ni ji kpawo lɛ nɔ lɛ, Nyɔŋmɔ egbe enitsumɔ ni etsu lɛ fɛɛ naa; ni ejɔɔ ehe yɛ gbi ni ji kpawo lɛ nɔ.

³ Nyɔŋmɔ jɔɔ gbi ni ji kpawo lɛ ni efee lɛ krɔŋkrɔŋ, ejaakɛ no nɔ ejɔɔ ehe yɛ, be ni egbe ebɔɔ nitsumɔ ni etsu lɛ fɛɛ naa lɛ.

⁴ Ŋwɛi kɛ shikpɔŋbɔɔ he saji nɛ. Be ni Nuŋtsɔ Nyɔŋmɔ bɔ je lɛ,

Eden Trom lɛ

⁵ ŋa nɔ baa ko bɛ ni ŋa nɔ jwɛi ko nako akwɛ̃ ejaakɛ Nuŋtsɔ Nyɔŋmɔ hãko nu anɛ shikpɔŋ lɛ nɔ, ni gbɔmɔ ko bɛ ni huɔ shikpɔŋ lɛ nɔ.

⁶ Shi afua teɔ shi kɛjɛɔ shikpɔŋ lɛ nɔ ni etsɔ̃ɔ bɔ, ni eshwieɔ shikpɔŋ lɛ fɛɛ nɔ nu.

⁷ Kɛkɛ ni Nuŋtsɔ Nyɔŋmɔ kɛ shikpɔŋ sũ shɔ̃ gbɔmɔ, ni emu wala mumɔ ewo egugɔ mli, ni gbɔmɔ tsɔ bɔɔnɔ ni hiɛ kã.

⁸ Kɛkɛ ni Nuŋtsɔ Nyɔŋmɔ fee trom yɛ Eden yɛ bokãgbɛ, ni ekɛ gbɔmɔ ni eshɔ̃ lɛ to jɛi.

⁹ Nuŋtsɔ Nyɔŋmɔ hã tsei fɛɛ ni kɛ akwɛ ni aaaba mɔ tsine ni amɛhi hã yeli hu kwɛ̃ kɛjɛ shikpɔŋ sũ lɛ mli. Ehã wala tso kɛ ekpakpa kɛ efɔŋlee tso hu kwɛ̃ yɛ trom lɛ teŋ.

¹⁰ Ni faa ko hoɔ yɛ Eden mli ni hãa trom lɛ nu. Egbalaa niji ejwɛ kɛjɛɔ jɛi.

¹¹ Klɛŋklɛŋ nɔ lɛ gbɛi ji Pishon. Ehoɔ kɛbɔleɔ Hawila shikpɔŋ muu lɛ fɛɛ, he ni shika yɔɔ lɛ.

¹² Nakai shikpɔŋ lɛ nɔ shika lɛ hi naakpa; ni bedola ojeŋma kɛ onike tɛ hu yɛ jɛi.

¹³ Faa ni ji enyɔ lɛ gbɛi ji Gihon. Ehoɔ kɛbɔleɔ Kush shikpɔŋ lɛ fɛɛ.

¹⁴ Faa ni ji etɛ̃ lɛ gbɛi ji Tigris. Ehoɔ yɛ Asiria bokãgbɛ. Faa ni ji ejwɛ lɛ gbɛi ji Eufrate.

¹⁵ Kɛkɛ ni Nuŋtsɔ Nyɔŋmɔ ŋɔ gbɔmɔ lɛ ni ekɛ lɛ bato Eden trom lɛ mli koni ehu mli ni ebu he.

¹⁶ Nuŋtsɔ Nyɔŋmɔ kɛɛ gbɔmɔ lɛ akɛ, “Trom lɛ mli tsei lɛ fɛɛ nɔ yibii lɛ ye bɔ ni osumɔɔ;

¹⁷ shi ekpakpa kɛ efɔŋlee tso lɛ yibii lɛ kaaye ejaakɛ gbi nɔ ni oooye eko lɛ, gbo ooogbo!”

¹⁸ Kɛkɛ ni Nuŋtsɔ Nyɔŋmɔ kɛɛ akɛ, “Ehiii akɛ gbɔmɔ lɛ koome hiɔ shi, mafee hefatalɔ ko ni sa lɛ mahã lɛ.”

¹⁹ No hewɔ lɛ, Nuŋtsɔ Nyɔŋmɔ kɛ shikpɔŋ sũ shɔ̃ ŋa nɔ kooloi kɛ loofɔji fɛɛ; ni ekɛ amɛ ba gbɔmɔ lɛ ŋɔɔ koni ekwɛ bɔ ni eeetsɛ amɛ; ni bɔ fɛɛ bɔ ni gbɔmɔ lɛ tsɛ kooloo fɛɛ kooloo ni hiɛ kã lɛ, no nɔŋŋ tsɔ̃ egbɛi.

²⁰ Gbɔmɔ lɛ wo shĩaŋ kooloi fɛɛ kɛ ŋaŋ kooloi fɛɛ kɛ loofɔji fɛɛ gbɛi; shi lɛ gbɔmɔ lɛ diɛŋtsɛ lɛ, anako hefatalɔ ko ni sa lɛ ahã lɛ.

²¹ No hewɔ lɛ, Nuŋtsɔ Nyɔŋmɔ hã wɔ ni tsii nyɔ gbɔmɔ lɛ nɔ ni ewɔ. Be ni ewɔ lɛ, Nuŋtsɔ Nyɔŋmɔ jie eŋmawu wui lɛ ekome, ni ekɛ loo tsi wui lɛ anajiaŋ.

²² Ni Nuŋtsɔ Nyɔŋmɔ kɛ ŋmawu wu ni ejie yɛ gbɔmɔ lɛ mli lɛ fee yoo, ni ekɛ lɛ ba gbɔmɔ lɛ ŋɔɔ.

²³ Kɛkɛ ni gbɔmɔ lɛ kɛɛ akɛ, “Mihe nɔ nɛ! Wu ni jɛ miwui amli, kɛ loo ni jɛ miheloo mli nɛ. Mɔ nɛ lɛ aaatsɛ lɛ yoo ejaakɛ nuu mli ajie lɛ kɛjɛ.”

²⁴ No hewɔ lɛ, nuu aaashi etsɛ kɛ enyɛ, ni eeekpɛtɛ eŋa he, ni amɛaatsɔ̃ gbɔmɔ kome.

²⁵ Amɛyi enyɔ lɛ fɛɛ, nuu lɛ kɛ eŋa lɛ, nyiɛ yayai, shi amɛhiɛ gbooo he.