1 Mose 18 - ŊMALƐ KRƆŊKRƆŊ LƐ

Awo Abraham kɛ Sara binuu he shi

¹ Yehowa jie ehe kpo etsɔ̃ɔ Abraham yɛ Mamre tsei lɛ ahe, be ni eta shi yɛ buu lɛ shinaa lɛ naa shwane ketekete lɛ.

² Abraham yaawo ehiɛ nɔ ni ekwɛ lɛ, naa hii etɛ̃ damɔ emasɛi. Be ni ena amɛ lɛ, esha foi kɛjɛ buu lɛ shinaa lɛ shi kɛtee koni eyakpee amɛ. Ekoto amɛ

³ ni ekɛɛ akɛ, “MiNuŋtsɔ, kɛji ona mihe tsuijurɔ lɛ, miikpa bo fai, kaaho otsulɔ he ooya.

⁴ Hã ni ayɛ nu fioo kɛba ni nyɛkɛfɔ nyɛnaji ahe, ni nyɛjɔɔ nyɛhe yɛ tso lɛ shishi

⁵ koni mayakɔ aboloo atrɔma kome kɛba ni nyɛkɛwo nyɛdaaŋ. No sɛɛ koni nyɛfoŋ kɛya, akɛni nyɛbatsɔ̃ otsulɔ ŋɔɔ nɛɛ.” Amɛkɛɛ lɛ akɛ, “Feemɔ bɔ ni okɛɛ lɛ.”

⁶ Kɛkɛ ni Abraham yiŋ kɛtee Sara ŋɔɔ oya mli yɛ buu lɛ mli, ni ekɛɛ, “Feemɔ mramra, tii mã kiloi etɛ̃ koni okpɔtɔ ni okɛshã aboloo.”

⁷ Kɛkɛ ni Abraham sha foi kɛtee tsinai lɛ ateŋ ni eyamɔ tsinabi ni esako ni hi, ni ekɛhã etsulɔ ko, ni tsulɔ lɛ ye ehe oyai ni ekɛfee niyenii.

⁸ Kɛkɛ ni Abraham wo butru kɛ fufɔ kɛ tsinabi loo ni akɛfee niyenii lɛ ni ekɛbamamɔ gbɔi lɛ ahiɛ, ni edamɔ amɛhiɛ esɔ̃mɔ amɛ yɛ tso lɛ shishi ni amɛye nii lɛ.

⁹ Ni amɛbi lɛ akɛ, “Nɛgbɛ oŋa Sara yɔɔ?” Ni eto he ekɛɛ akɛ, “Eyɛ buu lɛ mli.”

¹⁰ Amɛteŋ mɔ kome kɛɛ akɛ, “Bɔ fɛɛ bɔ ni fee lɛ maku misɛɛ maba oŋɔɔ wɔsɛɛ afi benɛ mli ni be ni maba lɛ oŋa Sara ena binuu.” Sara damɔ buu lɛ mli gbɛ yɛ shinaa lɛ shi yɛ Abraham sɛɛgbɛ eebo toi.

¹¹ Abraham kɛ Sara fɛɛ egbɔlɔ ni amɛye afii pii, ni Sara ekpa tsuiasɛɛ yaa.

¹² No hewɔ lɛ, Sara ŋmɔ yɛ eyitsoŋ ni ekɛɛ, “Belɛ migbɔlɛ nɛɛ mli be ni miwu etsɔ̃ nuumo nɛɛ, mɛɛ miishɛɛ wɔɔna yɛ nuu kɛ yoo bɔlɛ mli.”

¹³ Yehowa bi Abraham akɛ, “Mɛni hewɔ ni Sara ŋmɔ, ni ekɛɛ akɛ, ‘Aso lɛɛlɛŋ akɛ mi ni mitsɔ yoomo nɛɛ mana bi mafɔ lo?’ lɛ.

¹⁴ Ani nɔ ko wa hã Yehowa lo? Be ni mito lɛ maba oŋɔɔ ekoŋŋ afi naakplɔ benɛ, ni Sara aaana binuu!”

¹⁵ Shi Sara tso ni ekɛɛ, “Miŋmɔko,” ejaakɛ eeeshe gbeyei. Shi Nuŋtsɔ lɛ kɛɛ, “Dabida, oŋmɔ.”

Abraham kpa fai ehã Sodom

¹⁶ Kɛkɛ ni hii etɛ̃ lɛ yi mli kɛjɛ jɛi ni amɛtsɔmɔ amɛhiɛ amɛhã Sodom gbɛ, ni Abraham kɛ amɛ tee eyajie amɛ gbɛ.

¹⁷ Ni Yehowa kɛɛ akɛ, “Mikɛ nɔ ni mibafee nɛɛ eteŋ Abraham.

¹⁸ Abraham baatsɔ̃ maŋ kpeteŋkple ni he wa, ni abaajɔɔ shikpɔŋ lɛ nɔ maji fɛɛ kɛtsɔ̃ enɔ,

¹⁹ ejaakɛ mile lɛ akɛ eeefã ebii kɛ ewebii ni baa yɛ esɛɛ lɛ koni amɛbo mi toi ni amɛfee nɔ ni hi kɛ nɔ ni ja koni nɔ ni mi, Yehowa, miwo shi yɛ ehe lɛ aba mli.”

²⁰ Kɛkɛ ni Yehowa kɛɛ akɛ, “Akɛni nibii ni awieɔ ashiɔ Sodom kɛ Gomora lɛ fa, ni amɛhe eshai lɛ efa naakpa hewɔ lɛ,

²¹ makpeleke shi matee mayakwɛ akɛ nibii fɔ̃ji ni awieɔ ashiɔ amɛ ni minuɔ lɛ eyɛ mli nakai lo? Ni kɛji ebɛ mli nakai lɛ, koni male.”

²² No hewɔ lɛ, hii enyɔ lɛ tsɔ amɛhe ni amɛtee Sodom gbɛ; shi Abraham damɔ shi yɛ Yehowa hiɛ lolo.

²³ Kɛkɛ ni Abraham tsi ebɛŋkɛ Yehowa ni ekɛɛ akɛ, “Ani oookpãtã jalɔ kɛ gbɔmɔ fɔŋ fɛɛ hiɛ shi kome lo?

²⁴ Ekolɛ benɛ jalɔi nyɔŋmai enumɔ aaahi maŋ lɛ mli. Ani kɛji nakai lɛ, oookpãtã maŋ lɛ hiɛ, ni okɛfaŋ maŋ lɛ yɛ jalɔi nyɔŋmai enumɔ ni yɔɔ mli lɛ ahewɔ?

²⁵ Enɛ akagbale bo fɔ̃ŋfɔ̃ akɛ oooye nɛkɛ sane, ni ooogbe jalɔ kɛ gbɔmɔ fɔŋ fɛɛ shi kome, ni jalɔ aaana nɔ tamɔ gbɔmɔ fɔŋ nɔŋŋ lo! Enɛ akagbale bo! Ani shikpɔŋ lɛ fɛɛ nɔ kojolɔ lɛ, ekojoŋ kojomɔ ni ja lo?”

²⁶ Kɛkɛ ni Yehowa kɛɛ akɛ, “Kɛji mana jalɔi nyɔŋmai enumɔ yɛ Sodom maŋ lɛ mli lɛ, mikɛbaafa maŋ lɛ fɛɛ yɛ jalɔi lɛ ahewɔ.”

²⁷ Abraham here nɔ ni ekɛɛ akɛ, “Naa, miŋɔ mifɔ̃ minɔ akɛ mikɛ Nuŋtsɔ lɛ aaawie, tsɛbelɛ mi lɛ su kɛ lamlu kɛkɛ ji mi.

²⁸ Ekolɛ be nɛ, aaashwɛ mɛi enumɔ dani ashɛ jalɔi nyɔŋmai enumɔ lɛ. Ani oookpãtã maŋ lɛ fɛɛ hiɛ yɛ mɛi enumɔ ni shwɛ dani ashɛ lɛ hewɔ?” Nyɔŋmɔ kɛɛ, “Kɛji mana mɛi nyɔŋmai ejwɛ kɛ enumɔ yɛ jɛi lɛ, mikpãtãŋ maŋ lɛ hiɛ.”

²⁹ Abraham kɛ Nyɔŋmɔ wie ekoŋŋ, ni ekɛɛ akɛ, “Ekolɛ aaana jalɔi nyɔŋmai ejwɛ yɛ jɛi.” Ni Nyɔŋmɔ kɛɛ akɛ, “Mifeŋ nɔ ko yɛ mɛi nyɔŋmai ejwɛ lɛ ahewɔ.”

³⁰ Abraham wie ekoŋŋ akɛ, “Nuŋtsɔ mli akawo la akɛ mawie. Ekolɛ aaana gbɔmɛi nyɔŋmai etɛ̃ yɛ jɛi.” Nyɔŋmɔ kɛɛ akɛ, “Kɛji mina mɛi nyɔŋmai etɛ̃ yɛ jɛi lɛ, mikpãtãŋ maŋ lɛ hiɛ.”

³¹ Abraham kɛɛ akɛ, “Miŋɔ mifɔ̃ minɔ akɛ mikɛ Nuŋtsɔ lɛ aaawie. Ekolɛ aaana mɛi nyɔŋmai enyɔ yɛ jɛi.” Nyɔŋmɔ kɛɛ akɛ, “Mikpãtãŋ maŋ lɛ hiɛ yɛ mɛi nyɔŋmai enyɔ lɛ ahewɔ.”

³² Abraham kɛɛ akɛ, “Ao, Nuŋtsɔ mli akawo la kɛji mawie shi kome nɛɛ pɛ kɛkɛ. Ekolɛ aaana mɛi nyɔŋma yɛ jɛi.” Nyɔŋmɔ kɛɛ akɛ, “Mikpãtãŋ maŋ lɛ hiɛ yɛ mɛi nyɔŋma lɛ ahewɔ.”

³³ Be ni Nyɔŋmɔ kɛ Abraham wie etã lɛ, Nyɔŋmɔ yiŋ etee ni Abraham ku esɛɛ kɛba shĩa.