1 Mose 14 - ŊMALƐ KRƆŊKRƆŊ LƐ

Abram here Lot yiwala

¹ Maŋtsɛmɛi ejwɛ, Babilon maŋtsɛ Amrafel kɛ Elasar maŋtsɛ Ariok kɛ Elam maŋtsɛ Kedorlaomer kɛ Goiim maŋtsɛ Tidal abei amli lɛ,

² maŋtsɛmɛi nɛɛ fã ta amɛshi Sodom maŋtsɛ Bera kɛ Gomora maŋtsɛ Birsha kɛ Adma maŋtsɛ Shinab kɛ Zeboim maŋtsɛ Shemeber kɛ Bela ni ji Zoar maŋtsɛ lɛ.

³ Maŋtsɛmɛi nɛɛ fɛɛ fee ta kome yɛ Sidim jɔɔ lɛ ni etsɔ̃ Ŋoo Ŋshɔ agbɛnɛ lɛ mli.

⁴ Maŋtsɛmɛi nɛɛ sɔmɔ Kedorlaomer afii nyɔŋma kɛ enyɔ, shi afi ni ji nyɔŋma kɛ etɛ̃ lɛ nɔ lɛ, amɛtse atua.

⁵ Afi ni ji nyɔŋma kɛ ejwɛ lɛ nɔ lɛ, Kedorlaomer kɛ maŋtsɛmɛi ni fata ehe lɛ ba ni amɛbaye Refabii anɔ kunim yɛ Ashterot-Karnaim. Amɛye Zuzbii anɔ yɛ Ham, ni amɛye Embii anɔ yɛ Kiriataim ŋa lɛ nɔ.

⁶ Amɛye Horbii hu anɔ yɛ amɛgɔŋ Edom lɛ nɔ, ni amɛnyiɛ amɛsɛɛ kɛyashi El-Paran ni kã shiaŋa kplanaa lɛ naa lɛ.

⁷ Amɛku amɛsɛɛ ni amɛba En-mishpat, (no ji Kadesh) ni amɛye Amalekbii ashikpɔŋ lɛ fɛɛ nɔ, kɛ Amorbii ni yɔɔ Hazazon-Tamar lɛ hu anɔ.

⁸ Kɛkɛ ni Sodom maŋtsɛ kɛ Gomora maŋtsɛ kɛ Adma maŋtsɛ kɛ Ziboim maŋtsɛ kɛ Bela, ni atsɛɔ lɛ Zoar hu lɛ maŋtsɛ lɛ fã, ni amɛbagba ta yɛ Sidim jɔɔ lɛ mli,

⁹ ni amɛkɛ Elam maŋtsɛ Kedorlaomer kɛ Goiim maŋtsɛ Tidal kɛ Babilon maŋtsɛ Amrafel kɛ Elasar maŋtsɛ Ariok bawu; maŋtsɛmɛi ejwɛ kɛ maŋtsɛmɛi enumɔ wu.

¹⁰ Shi Sidim jɔɔ lɛ mli lɛ, amãtɛ bui sɔŋŋ yɔɔ jɛi. Awo Sodom kɛ Gomora maŋtsɛmɛi lɛ afoi, ni amɛnyɔnyɔi bui lɛ amli, shi maŋtsɛmɛi ni eshwɛ lɛ jo foi kɛtee gɔŋ lɛ nɔ.

¹¹ No hewɔ lɛ, maŋtsɛmɛi ejwɛ lɛ ŋɔ Sodom kɛ Gomora nii fɛɛ kɛ niyenii fɛɛ, ni amɛyiŋ amɛtee.

¹² Amɛŋɔ Abram nyɛmibi Lot ni yɔɔ Sodom lɛ hu kɛ enibii kɛtee.

¹³ Shi nuu ko ni jo foi kɛjɛ ta lɛ mli lɛ ba ni ebagba Abram, Hebrinyo lɛ ni ehe shi yɛ he ni Mamre, Amornyo lɛ, wɔŋ koo lɛ yɔɔ lɛ. Shi Eshkol kɛ Aner nyɛmi ji Mamre; ni amɛkɛ Abram ekpãŋ.

¹⁴ Be ni Abram nu akɛ aŋɔ enyɛmibi lɛ nom lɛ, ekɛ etsuji ohai etɛ̃ kɛ nyɔŋma kɛ kpaanyɔ ni le ta he nii, ni afɔ amɛ yɛ ewe lɛ, fã ta, ni etiu maŋtsɛmɛi lɛ kɛtee Dan.

¹⁵ Ekɛ etsuji lɛ gba ta wo amɛhe nyɔɔŋ, ni enine tsɔ̃ amɛnɔ, ni etiu amɛ kɛtee Hoba ni yɔɔ Damasko kooyigbɛ lɛ.

¹⁶ Eŋɔ nibii lɛ fɛɛ kɛ enyɛmibi Lot lɛ hu kɛ enibii lɛ, kɛ yei lɛ hu kɛ maŋbii lɛ kɛku sɛɛ kɛba.

Melkizedek jɔɔ Abram

¹⁷ Be ni Abram eye Kedorlaomer kɛ maŋtsɛmɛi ni fata ehe lɛ anɔ kunim ni eku esɛɛ eba lɛ, Sodom maŋtsɛ lɛ tee eyakpee lɛ yɛ Shaveh Jɔɔ ni atsɛɔ jɛi Maŋtsɛ Jɔɔ lɛ mli.

¹⁸ Ni Salem maŋtsɛ Melkizedek kɛ aboloo kɛ wain ba. Ŋwɛi Flooflo Nyɔŋmɔ lɛ osɔfo ji lɛ.

¹⁹ Ejɔɔ Abram ni ekɛɛ, “Ŋwɛi Flooflo Nyɔŋmɔ, ŋwɛi kɛ shikpɔŋ bɔlɔ lɛ ajɔɔ Abram;

²⁰ ni ajie Ŋwɛi Flooflo Nyɔŋmɔ lɛ ni hã oye ohenyɛlɔi lɛ anɔ kunim lɛ yi.” Ni Abram hã Melkizedek nii lɛ fɛɛ mlijai nyɔŋma mli ekome.

²¹ Kɛkɛ lɛ Sodom maŋtsɛ lɛ kɛɛ Abram akɛ, “Ŋɔɔ migbɔmɛi lɛ ohã mi, shi haa nibii lɛ ŋɔɔ ohã ohe.”

²² Shi Abram kɛɛ Sodom maŋtsɛ lɛ akɛ, “Mina Ŋwɛi Flooflo Nyɔŋmɔ ni ji ŋwɛi kɛ shikpɔŋ bɔlɔ lɛ

²³ akɛ kɛjɛ kpãa nɔ aahu kɛyashi tokota naa kpãa nɔ, nɔ fɛɛ nɔ ni ji onɔ lɛ, kɛji mikɔ eko fii! Koni okakɛɛ akɛ, ‘Mi, mifee Abram niiatsɛ.’

²⁴ Miŋɔɔɔ nɔ ko nɔ ko akɛ ja nɔ ni oblahii lɛ eye kɛkɛ, kɛ hii ni kɛ mi tee lɛ, Aner kɛ Eshkol kɛ Mamre; amɛ lɛ hã ni amɛŋɔ amɛgbɛfaŋnɔ lɛ.”