1 Mose 12 - ŊMALƐ KRƆŊKRƆŊ LƐ

Yehowa tsɛ Abram

¹ Yehowa kɛɛ Abram akɛ, “Jee oshikpɔŋ nɛɛ nɔ kɛ ojakumɛi ateŋ kɛ otsɛ we lɛ kɛya shikpɔŋ ni matsɔ̃ɔ bo lɛ nɔ.

² Mahã otsɔ̃ maŋ kpeteŋkple, ni majɔɔ bo, ni mahã ogbɛi ahehee, ni oootsɔ̃ jɔɔmɔ!

³ Majɔɔ mɛi ni jɔɔ bo, ni mɔ ni lomɔɔ bo lɛ, malomɔ lɛ; kɛtsɔ̃ onɔ lɛ aaajɔɔ shikpɔŋ lɛ nɔ wekui fɛɛ.”

⁴ Kɛkɛ ni Abram yiŋ, tamɔ bɔ ni Yehowa ekɛɛ lɛ lɛ, ni Lot kɛ lɛ tee. Abram eye afii nyɔŋmai kpawo kɛ enumɔ, be ni eyiŋ kɛjɛ Haran lɛ.

⁵ Eŋɔ eŋa Sarai lɛ kɛ enyɛmi nuu bi Lot lɛ, kɛ amɛnibii fɛɛ, ni amɛyiŋ kɛtee Kanaan shikpɔŋ lɛ nɔ. Be ni amɛshɛ Kanaan shikpɔŋ lɛ nɔ lɛ

⁶ Abram tee ehiɛ tɛ̃ɛ kɛyashi eyashɛ Shekem; etseŋ kɛtee tso krɔŋkrɔŋ ko ni yɔɔ More ŋa lɛ mli lɛ he. Nakai be mli lɛ, Kanaanbii lɛ yɛ shikpɔŋ lɛ nɔ.

⁷ Kɛkɛ ni Yehowa jie ehe kpo etsɔ̃ɔ Abram ni ekɛɛ, “Oshwiei mikɛ nɛkɛ shikpɔŋ nɛɛ baahã.” No hewɔ lɛ, Abram mã afɔleshãa latɛ yɛ jɛi ehã Yehowa, mɔ ni jie ehe kpo etsɔ̃ɔ lɛ lɛ.

⁸ Abram fã yɛ jɛi kɛtee gɔŋ ko ni yɔɔ Betel bokãgbɛ lɛ he, ni eshi ebuu yɛ jɛi; Betel ye anaigbɛ, ni Ai ye bokãgbɛ. Jɛi hu ema afɔleshãa latɛ yɛ ehã Yehowa, ni eja Yehowa yɛ jɛi.

⁹ Abram tsa egbɛnyiɛmɔ lɛ nɔ kɛmiiya wuoyi gbɛ lolo.

Abram kɛ Sarai yɛ Ijipt

¹⁰ Shi hɔmɔ ko ba shikpɔŋ lɛ nɔ; no hewɔ lɛ, Abram yiŋ kɛtee Ijipt koni eyato gbɔ yɛ jɛi, ejaakɛ hɔmɔ lɛ naa wa yɛ shikpɔŋ lɛ nɔ.

¹¹ Be ni eshwɛ fioo ni ebaashɛ Ijipt lɛ, ekɛɛ eŋa Sarai akɛ, “Mile akɛ yoo ni he yɔɔ fɛo ji bo, ni kɛ ana bo lɛ, ohe yɛ fɛo;

¹² ni eeeba mli akɛ kɛ Ijiptbii lɛ na bo lɛ, amɛaakɛɛ akɛ, ‘Eŋa ni.’ Kɛkɛ lɛ amɛaagbe mi, shi bo lɛ amɛaahere oyiwala.

¹³ No hewɔ lɛ, kɛɛmɔ akɛ minyɛmi yoo ji bo, koni ahi ahã mi yɛ ohewɔ, ni miyi ana wala hu yɛ ohewɔ.”

¹⁴ Be ni Abram bashɛ Ijipt lɛ, Ijiptbii lɛ na yoo lɛ akɛ ehe yɛ fɛo naakpa.

¹⁵ Farao lumɛi lɛ hu na lɛ, ni amɛyajie eyi amɛhã Farao, ni abaŋɔ yoo lɛ kɛtee Farao we lɛ.

¹⁶ Sarai hewɔ lɛ Farao hiɛ Abram jogbaŋŋ. Ni no hewɔ lɛ, Abram na toi kɛ tsinai kɛ tejihii kɛ webii kɛ weyei kɛ tejiyei kɛ yoomai.

¹⁷ Shi Abram ŋa Sarai hewɔ lɛ, Yehowa hã Farao kɛ ewe lɛ na amanehulu ni naa wa.

¹⁸ No hewɔ lɛ, Farao tsɛ Abram ni ebi lɛ akɛ, “Mɛni ofee mi nɛɛ? Mɛɛba okɛɛɛ mi akɛ yoo lɛ oŋa ni lɛ?

¹⁹ Mɛɛba okɛɛ akɛ onyɛmi yoo ji lɛ, ni ohã miŋɔ lɛ mifee miŋa lɛ? Agbɛnɛ naa oŋa, ŋɔɔ lɛ ni oya!”

²⁰ Kɛkɛ ni Farao famɔ hii komɛi eto ehe akɛ amɛyajie lɛ kɛ eŋa kɛ nɔ fɛɛ nɔ ni eyɔɔ lɛ gbɛ.