1 Mose 11 - ŊMALƐ KRƆŊKRƆŊ LƐ

Babilon Mɔɔ lɛ

¹ Tsutsu lɛ, jeŋ gbɔmɛi fɛɛ wieɔ wiemɔ kome.

² Ni eba mli akɛ be ni amɛfã gbɛ kɛjɛ bokãgbɛ lɛ, amɛyana ŋa kplenee ko yɛ Babilon shikpɔŋ lɛ nɔ, ni amɛhi jɛi.

³ Amɛkɛɛkɛɛ amɛhe akɛ, “Nyɛhãa wɔfoa ntayaa ni wɔshãa ni egbĩ keketee!” Ni amɛna ntayaa ni wa yɛ tɛ najiaŋ, ni asaŋ amɛkɛ sũ tswãa tswa gbogbo lɛ.

⁴ Amɛkɛɛ akɛ, “Agbɛnɛ nyɛhãa wɔtoa maŋ wɔhãa wɔhe, ni emli mɔɔ yiteŋ ayashi ŋwɛi, ni wɔkɛhe gbɛi koni wɔkagbɛ wɔshwã shikpɔŋ muu lɛ fɛɛ nɔ.”

⁵ Kɛkɛ ni Yehowa kpeleke shi kɛba ni ebakwɛ maŋ kɛ mɔɔ ni gbɔmɛi adesai ema lɛ.

⁶ Yehowa kɛɛ akɛ, “Kwɛ, gbɔmɛi kome ni, ni amɛ fɛɛ amɛwieɔ wiemɔ kome, ni nɔ ni amɛaafee wɔsɛɛ ko lɛ, eshishijee kɛkɛ po nɛ, etsɛŋ kwraa ni amɛaafee nɔ ni amɛ diɛŋtsɛ amɛsumɔɔ.

⁷ Nyɛhãa wɔkpelekea shi ni wɔyatsakea amɛwiemɔ lɛ ni wɔfee lɛ wiemɔi srɔtoisrɔtoi, koni mɔ ko akanu enaanyo wiemɔ dɔŋŋ!”

⁸ Kɛkɛ ni Yehowa gbɛ amɛ eshwã kɛje jɛi kɛtee shikpɔŋ lɛ nɔ fɛɛ, ni amɛfɔ̃ɔ maŋ lɛ too.

⁹ No hewɔ lɛ, atsɛɔ jɛi akɛ Babilon, ejaakɛ jɛi Yehowa tsake shikpɔŋ lɛ nɔ bii fɛɛ awiemɔ yɛ, ni jɛi Yehowa jɛ egbɛ amɛ eshwã shikpɔŋ lɛ fɛɛ nɔ.

Shem Shwiei lɛ

¹⁰ Shem shwiei nɛ: Shem eye afii oha ni efɔ Arpakshad yɛ nu afua lɛ sɛɛ afii enyɔ.

¹¹ Be ni Shem fɔ Arpakshad sɛɛ lɛ, eye afii ohai enumɔ eshwie nɔ, ni efɔ bihii kɛ biyei krokomɛi.

¹² Be ni Arpakshad ye afii nyɔŋmai etɛ̃ kɛ enumɔ lɛ, efɔ Shela.

¹³ Be ni Arpakshad fɔ Shela sɛɛ lɛ, eye afii ohai ejwɛ kɛ etɛ̃ eshwie nɔ; efɔ bihii kɛ biyei krokomɛi.

¹⁴ Shela eye afii nyɔŋmai etɛ̃ ni efɔ Eber.

¹⁵ Be ni Shela fɔ Eber sɛɛ lɛ, eye afii ohai ejwɛ kɛ etɛ̃ eshwie nɔ; efɔ bihii kɛ biyei krokomɛi.

¹⁶ Eber eye afii nyɔŋmai etɛ̃ kɛ ejwɛ ni efɔ Peleg.

¹⁷ Be ni efɔ Peleg sɛɛ lɛ, eye afii ohai ejwɛ kɛ nyɔŋmai etɛ̃ eshwie nɔ, efɔ bihii kɛ biyei krokomɛi.

¹⁸ Peleg eye afii nyɔŋmai etɛ̃ ni efɔ Reu.

¹⁹ Be ni efɔ Reu sɛɛ lɛ eye afii ohai enyɔ kɛ nɛɛhu eshwie nɔ; efɔ bihii kɛ biyei krokomɛi.

²⁰ Reu eye afii nyɔŋmai etɛ̃ kɛ enyɔ ni efɔ Serug.

²¹ Be ni Reu fɔ Serug sɛɛ lɛ, eye afii ohai enyɔ kɛ kpawo eshwie nɔ; efɔ bihii kɛ biyei krokomɛi.

²² Serug eye afii nyɔŋmai etɛ̃ ni efɔ Nahor.

²³ Be ni Serug fɔ Nahor sɛɛ lɛ, eye afii ohai enyɔ eshwie nɔ; efɔ bihii kɛ biyei krokomɛi.

²⁴ Nahor eye afii nyɔŋmai enyɔ kɛ nɛɛhu ni efɔ Tera.

²⁵ Be ni Nahor fɔ Tera sɛɛ lɛ, eye afii oha kɛ nyɔŋma kɛ nɛɛhu eshwie nɔ; efɔ bihii kɛ biyei krokomɛi.

²⁶ Tera eye afii nyɔŋmai kpawo ni efɔ Abram kɛ Nahor kɛ Haran.

Tera Shwiei nɛ

²⁷ Tera shwiei nɛ. Tera fɔ Abram kɛ Nahor kɛ Haran, ni Haran fɔ Lot.

²⁸ Haran gbo yɛ etsɛ Tera hiɛ, yɛ shikpɔŋ nɔ he ni afɔ lɛ yɛ ni ji Ur yɛ Babilon lɛ.

²⁹ Abram kɛ Nahor ŋɔ yei; Abram ŋa lɛ gbɛi ji Sarai, ni Nahor ŋa lɛ gbɛi ji Milka, ni ji Iska tsɛ Haran biyoo lɛ.

³⁰ Shi Sarai fee kene, ni no hewɔ lɛ, ebɛ bi.

³¹ Tera ŋɔ ebi Abram kɛ Haran bi Lot ni ji enabi lɛ kɛ eshaayoo Sarai, ni ji ebi Abram ŋa lɛ, ni ekɛ amɛje Ur yɛ Babilon koni amɛya Kanaan shikpɔŋ lɛ nɔ; shi be ni amɛbashɛ Haran lɛ, amɛhi jɛi.

³² Tera ye afii ohai enyɔ kɛ enumɔ, ni egbo yɛ Haran.