1 Maŋtsɛmɛi 4 - ŊMALƐ KRƆŊKRƆŊ LƐ

Maŋtsɛ Solomon tsuji lɛ

¹ Solomon ye Israel fɛɛ nɔ maŋtsɛ.

² Ni etsuji nukpai ni eyɔɔ nɛ: Zadok bi Azaria ji osɔfo.

³ Elihoref kɛ Ahia, Shisha bii lɛ, ji woloŋmalɔi; Yehoshafat, Ahilud bi lɛ, ji sajiaŋmlãlɔ.

⁴ Yehoiada bi Benaia ji tatsɛnukpa; ni Zadok kɛ Abiatar ji osɔfoi.

⁵ Natan bi Azaria lɛ ji mɔ ni kwɛɔ kpokpai anɔ tsuji lɛ anɔ; Natan bi Zabud lɛ ji Osɔfo kɛ maŋtsɛ lɛ naanyo.

⁶ Ahishar kwɛɔ maŋtsɛ we lɛ nɔ; ni Abda bi Adoniram lɛ kwɛɔ maŋtsɛ nitsulɔi lɛ anɔ.

⁷ Maŋtsɛ Solomon hala nitsulɔi nyɔŋma kɛ enyɔ yɛ Israel maŋ fɛɛ. Amɛ amɛkɛ niyenii baa maŋtsɛ we lɛ daa afi. Daa afi mli lɛ mɔ fɛɛ mɔ yɛ nyɔɔŋ nɔ ni ekɛ niyenii baa.

⁸ Amɛgbɛii nɛ: Ben-Hur yɔɔ Efraim gɔji lɛ anɔ.

⁹ Ben-Deker kwɛɔ Makaz kɛ Shaalbim kɛ Bet-Shemash kɛ Elon-Bet-Hanan.

¹⁰ Ben-Hesed kwɛɔ Arubot, ni lɛ nɔŋŋ ekwɛɔ Soko kɛ Hefer shikpɔji lɛ.

¹¹ Ben-Abinadab kwɛɔ Nafat-Dor. Eŋa ji Tafat, Solomon biyoo lɛ.

¹² Ahilud bi Baana kwɛɔ Taanak kɛ Megido kɛ Bet-Shean yɛ Zaretan masɛi yɛ Yezreel ŋshɔnaa gbɛ, kɛjɛ Bet-Shean kɛyashwie Abel-Mehola kɛ Yokmeam sɛɛ.

¹³ Ben-Geber kwɛɔ Ramot-Gilead, lɛ nɔŋŋ ekwɛɔ akrowai komɛi ni ji Manase bi Yair nɔ lɛ anɔ, nɔ ní yɔɔ Gilead lɛ. Ekwɛɔ Argob kpokpai ni yɔɔ Bashan lɛ. Maji nyɔŋmai ekpaa kɛ amɛhe gbogboi kɛ shinai ni akɔɔble adabaŋi yɔɔ he ni.

¹⁴ Ido bi Ahinadab kwɛɔ Mahanaim.

¹⁵ Ahimaaz kwɛɔ Naftali. Ekpee Basemat, Solomon biyoo lɛ.

¹⁶ Hushai bi Baana kwɛɔ Asher kɛ Bealot.

¹⁷ Parua bi Yoshafat kwɛɔ Isakar.

¹⁸ Ela bi Shimei kwɛɔ Benyamin.

¹⁹ Ur bi Geber kwɛɔ Gilead he ni Amorbii amaŋtsɛ Sihon kɛ Bashanbii amaŋtsɛ Og hi lɛ. Mɛnɛɛmɛi fɛɛ asɛɛ lɛ mɔ kome ko yɛ ni kwɛɔ shikpɔŋ muu lɛ fɛɛ nɔ.

Solomon Maŋtsɛyeli lɛ dalɛ

²⁰ Yuda kɛ Israel yi fa babaoo diɛŋtsɛ tamɔ ŋshɔnaa shia. Amɛyeyeɔ nii, ni amɛnunuɔ dãi, ni amɛmii shɛɔ amɛhe.

²¹ Solomon ye maŋtsɛyelii fɛɛ nɔ lumɔ kɛjɛ Eufrate Faa lɛ naa, kɛ Filistibii lɛ ashikpɔŋ lɛ nɔ kɛyashwie Ijipt husui lɛ anɔ. Amɛtsu onia amɛhã Solomon, ni amɛsɔmɔ lɛ ewala gbii abɔ fɛɛ.

²² Solomon gbi kome jenamɔ niyenii ji ashikishaŋ litai akpei enumɔ kɛ ŋmãa mamu litai akpei nyɔŋma.

²³ Tsinai ni ewo fɔ nyɔŋma kɛ tsinai nyɔŋmai enyɔ ni jɛ ŋa nɔ lɛɛhei, kɛ toi oha ni fata he. Enɛɛmɛi fɛɛ asɛɛ lɛ ofrotei kɛ soŋai kɛ baayelɔ kɛ loofɔji ni ewo fɔ shi nɔ.

²⁴ Solomon ye shikpɔji fɛɛ ni yɔɔ Eufrate Faa lɛ anaigbɛ, kɛjɛ Tifsa aahu kɛyashwie Gaza, lɛ nɔ. Eye maŋtsɛmɛi fɛɛ ni yɔɔ Eufrate Faa lɛ anaigbɛ lɛ nɔ. Solomon na toiŋjɔlɛ yɛ ehewɔhewɔ maji lɛ fɛɛ amli.

²⁵ Ni Solomon yinɔ fɛɛ lɛ, Yuda kɛ Israel hi shi shweshweeshwe. Mɔ fɛɛ mɔ hi shi yɛ ewain tso kɛ egbami tso shishi kɛjɛ Dan aahu kɛyashwie Beersheba.

²⁶ Solomon yɛ okpɔŋɔiatsui akpei ejwɛ kɛhã eshwiilii lɛ, kɛ okpɔŋɔiatsɛmɛi akpei nyɔŋma kɛ enyɔ.

²⁷ Mɛi nyɔŋma kɛ enyɔ ni kwɛɔ Solomon niyenii anɔ lɛ kɛ niyenii baa daa kɛhã mɛi ni bayeɔ nii yɛ maŋtsɛ we lɛ. Mɔ kome yɛ nyɔɔŋ kome nɔ. Ni amɛhãaa nɔ ko nɔ ko he ahia.

²⁸ Amɛkɛ akoko kɛ jwɛi hu ni akɛbaahã okpɔŋɔi kɛ kooloi krokomɛi lɛ fɛɛ baa, bɔ ni afo tɛ ahã amɛ lɛ.

²⁹ Ni Nyɔŋmɔ hã Solomon jwɛŋmɔ ni mli kwɔ kɛ niiashishinumɔ kpele diɛŋtsɛ.

³⁰ Solomon le nii fe nilelɔi fɛɛ ni yɔɔ Bokã kɛ Ijipt lɛ fɛɛ.

³¹ Ele nii fe jeŋ gbɔmɛi fɛɛ; ele nii fe Etan, Ezrahinyo lɛ kɛ Heman kɛ Kalkol kɛ Darda, Mahol bii lɛ. Solomon gbɛi hehee yɛ jeŋ maji lɛ fɛɛ mli kɛkpe.

³² Ni Solomon bu abɛi akpei etɛ̃; ni elalai anaa ji akpe kɛ enumɔ.

³³ Ewie tsei ahe, kɛjɛ tsenedru tso ni yɔɔ Lebanon nɔ aahu kɛyashi tsei bibii ni kwɛ̃ɔ yɛ gbogboi anɔ ahe. Ewie kooloi kɛ loofɔji kɛ waamɔ nii kɛ nuŋloi hu ahe.

³⁴ Maŋtsɛmɛi ni yɔɔ jeŋ fɛɛ nu Solomon nilee lɛ he, no hewɔ lɛ, amɛhã mɛi ba, ni amɛbabo Solomon naa wiemɔ toi.