1 Kronika 9 - ŊMALƐ KRƆŊKRƆŊ LƐ

Mɛi ni ku sɛɛ kɛjɛ nomŋɔɔ mli kɛba lɛ

¹ Akane Israelbii fɛɛ ayibɔ yɛ amɛwekui lɛ anaa. Aŋmã mɛi akanemɔ nɛɛ he saji lɛ yɛ Israel Maŋtsɛmɛi Ayinɔ Saji Awolo lɛ mli. Aŋɔ̃ Yudabii nom kɛtee Babilon; akɛgbala amɛtoi yɛ amɛtɔ̃mɔi ahewɔ.

² Nomi lɛ ateŋ mɛi tsutsu ni ku amɛsɛɛ kɛba amɛ diɛŋtsɛ amɛshikpɔŋ lɛ nɔ amɛbahi amɛmaji amli ekoŋŋ lɛ ateŋ mɛi komɛi ji Israelbii kɛ osɔfoi lɛ kɛ Levibii lɛ kɛ Sɔlemɔ we lɛ mli sɔ̃ɔlɔi lɛ.

³ Nomi lɛ ateŋ Yudabii lɛ kɛ Benyaminbii lɛ kɛ Efraimbii lɛ kɛ Manasebii lɛ ekomɛi tee Yerusalɛm ni amɛyahi jɛi.

⁴ Yɛ Yudabii ni shi nɔ lɛ agbɛfaŋ lɛ, Utai, Imri bi Omri bi Amihud bi lɛ, ji Yuda bi Perez shwiei lɛ anukpa.

⁵ Ni yɛ Yuda bi Shela shwiei lɛ agbɛfaŋ lɛ, Asaia ji amɛnukpa.

⁶ Ni yɛ Yuda bi Zera shwiei lɛ agbɛfaŋ lɛ, Yeuel ji amɛnukpa. Yudabii nɛɛ awei ohai ekpaa kɛ nyɔŋmai nɛɛhu hi Yerusalɛm.

⁷ Benyaminbii ni shi nɔ kɛyahi Yerusalɛm lɛ ateŋ mɛi komɛi ji Salu, ni ji Hasenua bi Hodavia bi Meshulam bi lɛ,

⁸ kɛ Ibneia, Yeroham bi lɛ, kɛ Ela, Mikri bi Uzi bi lɛ, kɛ Meshulam, Ibnia bi Reuel bi Shefatia bi lɛ.

⁹ Benyaminbii nɛɛ lɛ awei ohai nɛɛhu kɛ nyɔŋmai enumɔ kɛ ekpaa hi Yerusalɛm. Amɛ mɛi ni atsi amɛtã nɛɛ fɛɛ lɛ weku onukpai ni.

Osɔfoi ni hi Yerusalɛm lɛ

¹⁰ Osɔfoi lɛ ni hi Yerusalɛm lɛ ji Yedaia kɛ Yehoiarib kɛ Yakin,

¹¹ kɛ Azaria, ni etsɛ ji Hilkia Sɔlemɔ we lɛ mli sɔ̃ɔlɔi lɛ anukpa lɛ, asaŋ ni eji Ahitub bi Meraiot bi Zadok bi Meshulam bi lɛ,

¹² kɛ Adaia ni etsɛ ji Yeroham ni eji Pashur bi kɛ Malkiya seshinyo lɛ, kɛ Maasai ni etsɛ ji Adiel, ni eji Yahazera kɛ Meshulam kɛ Meshilemit kɛ Imer seshinyo lɛ.

¹³ Osɔfoi nɛɛ fɛɛ lɛ wekunukpai ni, ni amɛ kɛ amɛwekumɛi ayikulɛ fee akpe kɛ ohai kpawo kɛ nyɔŋmai ekpaa, ni amɛhe esa jogbaŋŋ diɛŋtsɛ yɛ Sɔlemɔ we lɛ mli nitsumɔi lɛ amli.

Levibii ni hi Yerusalɛm lɛ

¹⁴ Levibii ni hi Yerusalɛm lɛ ji Shemaia ni etsɛ ji Hashub, ni eji Azrikam kɛ Hashabia, ni jɛ Merari mli lɛ seshinyo lɛ,

¹⁵ kɛ Bakbakar kɛ Heresh kɛ Galal kɛ Matania ni etsɛ ji Mika ni eseshibii komɛi ji Zikri kɛ Asaf lɛ,

¹⁶ kɛ Obadia ni etsɛ ji Shemaia ni eseshibii ji Galal kɛ Yedutun lɛ, kɛ Berekia ni etsɛ ji Asa, ni eji Elkana ni hi Netofa maŋ lɛ mli lɛ shwie lɛ.

Sɔlemɔ we lɛ hebulɔi ni hi Yerusalɛm

¹⁷ Sɔlemɔ we lɛ hebulɔi ni hi Yerusalɛm ji Shalum kɛ Akub kɛ Talmon kɛ Ahiman kɛ amɛwekui lɛ amli bii. Shalum ji amɛnukpa.

¹⁸ Kɛbashi nakai be lɛ gbɔmɛi nɛɛ ji mɛi ni buɔ maŋtsɛ agbo lɛ naa yɛ bokãgbɛ. Tsutsu ko lɛ kulɛ amɛbuɔ agboi ni yɔɔ Levibii ashihilɛhei lɛ anaa.

¹⁹ Shalum, ni ji Ebiasaf bi Kore bi lɛ, kɛ enyɛmimɛi ni ji Kora shwiei lɛ amɛ amɛbuɔ Yehowa Shihilɛhe lɛ he.

²⁰ Ni Eleazar bi Finehas mɔ ni Yehowa ena lɛ mɔbɔ lɛ ji mɔ ni kwɛ amɛnɔ be ko mli.

²¹ Zakaria, Meshelemia bi lɛ, hu ji agbonaabulɔ yɛ Yehowa Shihilɛhe lɛ shinaa lɛ naa.

²² Mɛi fɛɛ ni ato akɛ agbonaabulɔi lɛ ayikulɛ ji ohai enyɔ kɛ nyɔŋma kɛ enyɔ. Ahala amɛ yɛ amɛwekui anaa yɛ amɛkrowai amli. Maŋtsɛ David kɛ Gbalɔ Samuel ji mɛi ni tu nitsumɔ nɛɛ wo gbɔmɛi nɛɛ atsɛmɛi beebe adɛŋ.

²³ No hewɔ lɛ, amɛ kɛ amɛshwiei ji mɛi ni buɔ Yehowa Shihilɛhe lɛ ni ji Buu lɛ ni ashi akɛ Yehowa We lɛ agboi lɛ anaa.

²⁴ Agbo yɛ Shihilɛhe lɛ koŋ fɛɛ koŋ, ekooyigbɛ kɛ ewuoyigbɛ kɛ ebokãgbɛ kɛ enaigbɛ; ni agbo fɛɛ agbo yɛ agbonaabulɔnukpa.

²⁵ Daa gbii kpawo lɛ agbonaabulɔi nɛɛ awekumɛi ni yɔɔ amɛkrowai lɛ amli lɛ baa, ni amɛbatsakeɔ mɛi ni buɔ lɛ.

²⁶ Agbonaabulɔinukpai ejwɛ lɛ, amɛ lɛ Levibii ji amɛ, ni amɛ amɛkwɛɔ nitsumɔ lɛ fɛɛ nɔ. Amɛ amɛbuɔ Nyɔŋmɔ We lɛ mli nitoohei lɛ kɛ amɛmli nibii fɛɛ ahe akɔntaa.

²⁷ No hewɔ lɛ, Nyɔŋmɔ We lɛ masɛi amɛshihilɛhei yɔɔ, ejaakɛ amɛnitsumɔ ji akɛ amɛbu Nyɔŋmɔ We lɛ he, asaŋ ni amɛ gbele enaa agboi lɛ daa leebi.

Levibii krokomɛi lɛ

²⁸ Levibii lɛ ekomɛi hu kwɛɔ tsɛnsii ni akɛjaa lɛ anɔ. Amɛnitsumɔ ji amɛkpa naa kɛ abahole kɛ kɛji akɛmiiba akɛbaato lɛ.

²⁹ Mɛi komɛi hu kwɛɔ okpɔlɔi kɛ adekai kɛ tsɛnsii krɔŋkrɔŋi krokomɛi lɛ fɛɛ anɔ. Amɛkwɛɔ mamu kɛ wain kɛ mu kɛ tsofakɛŋma kɛ krɔbɔo hu anɔ.

³⁰ Shi osɔfoi abii lɛ ji mɛi ni futuɔ nibii srɔtoi ni akɛfeɔ tsofakɛŋma lɛ.

³¹ Levinyo ko ni gbɛi ji Matitia, Koranyo Shalum lɛ kromɔbi lɛ, lɛ ji mɔ ni kwɛɔ akpiti tɛtɛrɛbii lɛ ashãa nɔ.

³² Levibii lɛ anyɛmimɛi ni ji Kohatbii lɛ hu ji mɛi ni kwɛɔ aboloo ni akɛmaa Yehowa hiɛ daa hejɔɔmɔ gbi lɛ shãa nɔ.

³³ Levibii wekui lɛ ateŋ ekomɛi anitsumɔ ji lamɔ yɛ Sɔlemɔ we lɛ. Wekui nɛɛ amli wekunukpai lɛ hi Sɔlemɔ we lɛ piai amli. Akɛ nitsumɔ ko kwraa ejɛɛɛ sɛɛ gbaaa amɛnaa ejaakɛ shwane kɛ nyɔɔŋ fɛɛ lɛ amɛhiɛ lamɔ mli.

³⁴ Mɛi atã ni atsi kɛtsɔ̃ hiɛ lɛ ji Levibii lɛ ashikwɛ̃ɛbii lɛ kɛ amɛshwiei lɛ ayinɔi lɛ amli wekunukpai lɛ, ni amɛhi Yerusalɛm lɛ.

Maŋtsɛ Saul seshi kɛ eshwiei

³⁵ Yeiel ji mɔ ni yato Gibeon maŋ lɛ, ni jɛi ehi. Eŋã gbɛi ji Maaka.

³⁶ Ekromɔbi lɛ gbɛi ji Abdon, ni ebihii krokomɛi ji Zur kɛ Kish kɛ Baal kɛ Ner kɛ Nadab,

³⁷ kɛ Gedor kɛ Ahio kɛ Zakaria kɛ Miklot.

³⁸ Miklot fɔ Shimeam. Gbɔmɛi nɛɛ kɛ amɛ hu amɛshwiei hi Yerusalɛm yɛ amɛnyɛmimɛi Benyaminbii lɛ amasɛi.

³⁹ Ner fɔ Kish, ni Kish fɔ Saul, ni Saul fɔ Yonatan kɛ Malkishua kɛ Abinadab kɛ Esh-Baal.

⁴⁰ Yonatan fɔ Merib-Baal, ni Merib-Baal fɔ Mika.

⁴¹ Mika fɔ bihii ejwɛ: Piton kɛ Melek kɛ Tarea kɛ Ahaz.

⁴² Ahaz fɔ Yara, ni Yara fɔ bihii etɛ̃; Alemet kɛ Azmavet kɛ Zimri. Zimri fɔ Moza.

⁴³ Moza fɔ Binea, ni Binea fɔ Refaia, ni Refaia fɔ Eleasa, ni Eleasa fɔ Azel.

⁴⁴ Azel fɔ bihii ekpaa: Azrikam kɛ Bokeru kɛ Ishmael kɛ Shearia kɛ Obadia kɛ Hanan.