1 Kronika 6 - ŊMALƐ KRƆŊKRƆŊ LƐ

Osɔfonukpai lɛ awekukpãa

¹ Levi fɔ bihii etɛ̃: Gershon kɛ Kohat kɛ Merari.

² Kohat fɔ bihii ejwɛ: Amram kɛ Izehar kɛ Hebron kɛ Uziel.

³ Amram fɔ bihii enyɔ, Aaron kɛ Mose, kɛ biyoo kome ni ji Miriam. Aaron fɔ bihii ejwɛ: Nadad kɛ Abihu kɛ Eleazar kɛ Itamar.

⁴ Naa bɔ ni Eleazar shwiei lɛ ayinɔi lɛ jwere shi hã kɛjɛ lɛ diɛŋtsɛ enɔ: Eleazar fɔ Finehas, ni Finehas fɔ Abishua.

⁵ Abishua fɔ Buki, Buki fɔ Uzi.

⁶ Uzi fɔ Zerahia, ni Zerahia fɔ Meraiot.

⁷ Meraiot fɔ Amaria, ni Amaria fɔ Ahitub.

⁸ Ahitub fɔ Zadok, ni Zadok fɔ Ahimaaz.

⁹ Ahimaaz fɔ Azaria, ni Azaria fɔ Yohanan,

¹⁰ ni Yohanan fɔ Azaria (mɔ ni ye osɔfo yɛ Sɔlemɔtsu ni Maŋtsɛ Solomon ma yɛ Yerusalɛm lɛ mli lɛ).

¹¹ Azaria nɛɛ fɔ Amaria, ni Amaria fɔ Ahitub.

¹² Ahitub fɔ Zadok, ni Zadok fɔ Shalum.

¹³ Shalum fɔ Hilkia, ni Hilkia fɔ Azaria,

¹⁴ ni Azaria fɔ Sheraia, ni Sheraia fɔ Yehozadak.

¹⁵ Be ni Yehowa tsɔ̃ Maŋtsɛ Nebukadnezar nine nɔ ni ehã aŋɔ Yuda kɛ Yerusalɛmbii lɛ nom lɛ, Yehozadak fata mɛi ni aŋɔ amɛ nom lɛ ahe kɛtee.

Levi shwiei krokomɛi

¹⁶ Levi fɔ bihii etɛ̃: Gershon kɛ Kohat kɛ Merari.

¹⁷ Gershon bii ji Libni kɛ Shimei:

¹⁸ Kohat bii ji Amram kɛ Izehar kɛ Hebron kɛ Uziel,

¹⁹ ni Merari bii ji Maheli kɛ Mushi. Ni bɔ ni Levibii lɛ awekui yɛ tsɛmɛi ayinɔi lɛ anaa jwere shi hã nɛ:

²⁰ Gershon nɔ mli lɛ, eshwiei ayinɔi lɛ atsɛmɛi lɛ ji Libni kɛ Yahat kɛ Zima;

²¹ kɛkɛ lɛ, Yoa kɛ Ido kɛ Zera kɛ Yeaterai.

²² Kohat nɔ mli lɛ, eshwiei lɛ ayinɔi lɛ atsɛmɛi lɛ ji Aminadab kɛ Kora kɛ Asir;

²³ kɛkɛ lɛ Elkana kɛ Ebiasaf kɛ Asir,

²⁴ kɛ Tahat kɛ Uriel kɛkɛ lɛ Uzia kɛ Shaul.

²⁵ Elkana fɔ bihii enyɔ: Amasai kɛ Ahimot.

²⁶ Yɛ Ahimot nɔ mli lɛ eshwiei lɛ ayinɔi lɛ atsɛmɛi ji Elkana kɛ Zofai, kɛ Nahat,

²⁷ kɛ Eliab kɛ Yeroham kɛ Elkana.

²⁸ Samuel fɔ bihii enyɔ: Yoel, ji kromɔbi, kɛ esɛɛho Abia.

²⁹ Merari nɔ mli lɛ, eshwiei lɛ ayinɔi lɛ atsɛmɛi lɛ ji Maheli kɛ Libni kɛ Shimei kɛ Uza,

³⁰ kɛ Shimea kɛ Hagia kɛ Asaia.

Sɔlemɔ we lɛ mli lalanɔkwɛlɔi lɛ

³¹ Mɛi yɛ ni Maŋtsɛ David to koni amɛkwɛ lala ni alaa yɛ Yehowa we lɛ mli lɛ nɔ, kɛjɛ beyinɔ ni akɛ Kpãŋmɔ Adeka lɛ bama Yehowa we lɛ mli lɛ.

³² Amɛto naa ni amɛsɔmɔ kɛ lala yɛ Yehowa Kpee Buu Krɔŋkrɔŋ lɛ mli kɛyashi beyinɔ ni Maŋtsɛ Solomon ma Yehowa We lɛ yɛ Yerusalɛm lɛ. Amɛtsu amɛnii bɔ ni ato sɔ̃ɔmɔ lɛ he gbɛjianɔ ahã lɛ pɛpɛɛpɛ.

³³ Naa hii ni tsu lala he nitsumɔ nɛɛ eko lɛ. Amɛteŋ mɔ fɛɛ mɔ kɛ eshwiei: Kohatbii anɔ mli lɛ Heman, ni ji Samuel bi Yoel bi lɛ, ji klɛŋklɛŋ lalatsɛ lɛ. Nɛkɛ ji bɔ ni wekukpãa kã shi ha kɛyashi Yakob nɔ: Heman tsɛ ji Yoel, ni Yoel tsɛ ji Samuel.

³⁴ Samuel tsɛ ji Elkana, ni Elkana tsɛ ji Yeroham; Yeroham tsɛ ji Eliel, ni Eliel tsɛ ji Toa.

³⁵ Toa tsɛ ji Zuf; Zuf tsɛ ji Elkana; Elkana tsɛ ji Mahat, ni Mahat tsɛ ji Amasai.

³⁶ Amasai tsɛ ji Elkana, ni Elkana tsɛ ji Yoel; Yoel tsɛ ji Azaria, ni Azaria tsɛ ji Zefania.

³⁷ Zefania tsɛ ji Tahat; Tahat tsɛ ji Asir; Asir tsɛ ji Ebiasaf, ni Ebiasaf tsɛ ji Kora.

³⁸ Kora tsɛ ji Izehar; Izehar tsɛ ji Kohat; Kohat tsɛ ji Levi, ni Levi tsɛ ji Yakob.

³⁹ Asaf ji lalatsɛ ni ji enyɔ ni edamɔɔ ninejurɔ gbɛ lɛ; nɛkɛ ji bɔ ni ewekukpãa kã shi hã kɛyashi Levi nɔ: Asaf tsɛ ji Berekia; ni Berekia tsɛ ji Shimea.

⁴⁰ Shimea tsɛ ji Mikael; Mikael tsɛ ji Baseia, ni Baseia tsɛ ji Malkia.

⁴¹ Malkia tsɛ ji Etni; Etni tsɛ ji Zera, ni Zera tsɛ ji Adaia.

⁴² Adaia tsɛ ji Etan; Etan tsɛ ji Zima, ni Zima tsɛ ji Shimei.

⁴³ Shimei tsɛ ji Yahat; Yahat tsɛ ji Gershon, ni Gershon tsɛ ji Levi.

⁴⁴ Etan ni jɛ Merari weku lɛ mli, ni lɛ ji mɔ ni damɔɔ Heman abɛkugbɛ lɛ, nɛkɛ ji bɔ ni ewekukpãa kã shi kɛyashi Levi nɔ: Etan tsɛ ji Kishi; Kishi tsɛ ji Abdi, ni Abdi tsɛ ji Maluk.

⁴⁵ Maluk tsɛ ji Hashabia; Hashabia tsɛ ji Amazia, ni Amazia tsɛ ji Hilkia.

⁴⁶ Hilkia tsɛ ji Amzi; Amzi tsɛ ji Bani, ni Bani tsɛ ji Shemer.

⁴⁷ Shemer tsɛ ji Mali; Mali tsɛ ji Mushi; Mushi tsɛ ji Merari, ni Merari tsɛ ji Levi.

⁴⁸ Amɛnyɛmimɛi Levibii krokomɛi lɛ, amɛ amɛdɛŋ akɛ Kpee Buu Krɔŋkrɔŋ lɛ mli nitsumɔi krokomɛi lɛ fɛɛ wo.

Aaron shwiei lɛ

⁴⁹ Aaron kɛ eshwiei lɛ ji mɛi ni kɛ tsofakɛŋma kɛ afɔlei lɛ yaa afɔleshãa latɛ lɛ nɔ amɛyashãa. Amɛnitsumɔ ji jamɔ ni ajaa yɛ He Krɔŋkrɔŋ Fe Fɛɛ lɛ mli lɛ he sɔ̃ɔmɔ; asaŋ amɛkpãtãa amɛhãa maŋ lɛ koni Nyɔŋmɔ kɛ tɔ̃mɔ ni Israelbii etɔ̃ lɛ afa amɛ. Amɛtsuɔ nitsumɔi nɛɛ bɔ ni Nyɔŋmɔ tsulɔ Mose ewo he kitã lɛ pɛpɛɛpɛ.

⁵⁰ Bɔ ni Aaron shwiei lɛ wekukpãa lɛ kã shi hã nɛ: Aaron fɔ Eleazar; Eleazar fɔ Finehas, ni Finehas fɔ Abishua.

⁵¹ Abishua fɔ Buki; Buki fɔ Uzi, ni Uzi fɔ Zerahia.

⁵² Zerahia fɔ Meraiot; Meraiot fɔ Amaria, ni Amaria fɔ Ahitub.

⁵³ Ahitub fɔ Zadok, ni Zadok fɔ Ahimaaz.

Maji amli ni Levibii lɛ hi

⁵⁴ Maji amli ni Levibii lɛ hi yɛ shikpɔŋ ni akɛha Aaron shwiei ni jɛ Kohat mli lɛ nɛ, ejaakɛ amɛ ji mɛi anɔ ni klɛŋklɛŋ oshiki ni afɔ̃ lɛ gbee.

⁵⁵ Akɛ Hebron ni yɔɔ Yuda shikpɔŋ lɛ nɔ lɛ hã amɛ kɛ maŋ lɛ he jwɛifɔ shikpɔji lɛ hu;

⁵⁶ shi maŋ lɛ he ŋmɔji kɛ ekrowai lɛ akɛhã Yefune bi Kaleb.

⁵⁷ Maji krokomɛi ni akɛhã Aaron shwiei lɛ ji Hebron, ni ji abobaa maŋ lɛ, kɛ Libna kɛ ehe jwɛifɔ shikpɔŋ lɛ hu, kɛ Yatir kɛ Eshtemoa kɛ maji nɛɛ ahe jwɛifɔ shikpɔji lɛ.

⁵⁸ Maji lɛ ekomɛi hu ji Hilen kɛ Debir,

⁵⁹ kɛ Ashan kɛ Bet-Shemesh, eko fɛɛ eko lɛ kɛ ehe jwɛifɔ shikpɔŋ.

⁶⁰ Benyaminbii lɛ shikpɔŋ lɛ nɔ maji ni akɛha Aaron shwiei lɛ ji Geba kɛ Alemet kɛ Anatot, eko fɛɛ eko lɛ kɛ ehe jwɛifɔ shikpɔŋ. Maji ni akɛhã Kohat shwiei lɛ awekui lɛ fɛɛ koni amɛhi amɛmli lɛ ayibɔ fee nyɔŋma kɛ etɛ̃.

⁶¹ Yɛ oshiki ni afɔ̃ lɛ naa lɛ, ahã Kohatbii awekui ni eshwɛ lɛ maji nyɔŋma yɛ Anaigbɛ Manasebii lɛ ashikpɔŋ lɛ nɔ.

⁶² Aŋɔ maji nyɔŋma kɛ etɛ̃ kɛjɛ Isakarbii lɛ kɛ Asherbii lɛ kɛ Naftalibii kɛ Bokãgbɛ Manasebii lɛ ni yɔɔ Bashan lɛ ashikpɔji lɛ anɔ lɛ adɛŋ, ni akɛhã Gershon shwiei lɛ yɛ amɛwekui lɛ anaa.

⁶³ Ni akɔlɔ maji nyɔŋma kɛ enyɔ kɛjɛ Rubenbii lɛ kɛ Gadbii lɛ kɛ Zebulonbii lɛ ashikpɔji lɛ fɛɛ anɔ, ni akɛhã Merari shwiei lɛ yɛ amɛwekui lɛ anaa.

⁶⁴ Nɛkɛ gbɛ nɔ Israelbii lɛ tsɔ̃ amɛhã Levibii lɛ maji koni amɛhi mli.

⁶⁵ Afɔ̃ oshiki, ni adamɔ no nɔ ni akɛ Yuda kɛ Simeon kɛ Benyamin shikpɔji lɛ anɔ maji ni atsi amɛtã nɛɛ hã Levibii lɛ.

⁶⁶ Ahã Kohatbii lɛ awekui lɛ ekomɛi maji kɛ amɛhe jwɛifɔ shikpɔji yɛ Efraimbii ashikpɔŋ lɛ nɔ.

⁶⁷ Maji lɛ ji Shekem, ni ji abobaa maŋ lɛ, ni yɔɔ Efraim gɔji lɛ anɔ lɛ kɛ Gezer,

⁶⁸ kɛ Yokmeam kɛ Bet-Horon kɛ amɛhe shikpɔji lɛ

⁶⁹ kɛ Aiyalon kɛ Gat-Rimon kɛ amɛhe shikpɔji lɛ.

⁷⁰ Ni akɛ Anaigbɛ Manasebii hu amaji ni ji Aner kɛ Bileam kɛ amɛhe jwɛifɔ shikpɔji shi nɔ hã Kohatbii lɛ.

⁷¹ Naa maji kɛ amɛhe jwɛifɔ shikpɔji ni akɛha Gershonbii awekui lɛ: Yɛ Bokãgbɛ Manasebii ashikpɔŋ lɛ nɔ lɛ akɛ Golan yɛ Bashan kɛ Ashtarot hã amɛ.

⁷² Yɛ Isakarbii ashikpɔŋ lɛ nɔ lɛ akɛ Kedesh kɛ Daberat,

⁷³ kɛ Ramot kɛ Anem hã amɛ.

⁷⁴ Yɛ Asherbii ashikpɔŋ lɛ nɔ lɛ akɛ Mashal kɛ Abdon

⁷⁵ kɛ Hukok kɛ Rehob hã amɛ.

⁷⁶ Yɛ Naftalibii lɛ ashikpɔŋ lɛ nɔ lɛ akɛ Kedesh yɛ Galilea kɛ Hamon kɛ Kiriataim hã amɛ.

⁷⁷ Merari shwiei lɛ ateŋ wekui ni eshwɛ lɛ, maji kɛ amɛhe jwɛifɔ shikpɔji ni akɛhã amɛ yɛ Zebulonbii lɛ ashikpɔŋ lɛ nɔ ji Rimono kɛ Tabor.

⁷⁸ Yɛ Rubenbii lɛ ashikpɔŋ lɛ nɔ yɛ Yordan Faa lɛ bokãgbɛ, asaŋ yɛ Yeriko sɛɛ lɛ, ahã amɛ Bezer, ni kã gɔji lɛ anɔ lɛ, kɛ Yaza,

⁷⁹ kɛ Kedemot kɛ Mefaat hu kɛ amɛhe jwɛifɔ shikpɔji lɛ.

⁸⁰ Ni yɛ Gadbii ashikpɔŋ lɛ nɔ lɛ ahã amɛ Ramot, ni yɔɔ Gilead lɛ, kɛ Mahanaim,

⁸¹ kɛ Heshbon kɛ Yazer kɛ amɛhe jwɛifɔ shikpɔji lɛ.