1 Kronika 4 - ŊMALƐ KRƆŊKRƆŊ LƐ

Yuda shwiei lɛ

¹ Yuda shwiei lɛ ateŋ mɛi komɛi nɛ: Perez kɛ Hezron kɛ Karmi kɛ Hur kɛ Shobal.

² Shobal fɔ Reaia, ni Reaia fɔ Yahat, ni Yahat fɔ Ahumai kɛ Lahad, mɛi ashwiei ni ji Zorabii lɛ.

³ Kaleb kɛ eŋa Efrat kromɔ binuu ji Hur mɔ ni shwiei yato Betlehem maŋ lɛ. Hur fɔ bihii etɛ̃: Etam kɛ Penuel kɛ Ezer.

⁴ Etam fɔ bihii etɛ̃: Yezreel kɛ Ishma kɛ Idbash kɛ amɛnyɛmi yoo kome ni atsɛɔ lɛ Hazelelponi. Penuel ji mɔ ni to Gedor maŋ lɛ, ni Ezer hu ji mɔ ni to Husha maŋ lɛ.

⁵ Ashur mɔ ni to Tekoa maŋ lɛ yɛ ŋamɛi enyɔ, Hela kɛ Naara.

⁶ Naara kɛ Ashur fɔ bihii ejwɛ: Ahuzam kɛ Hefer kɛ Temeni kɛ Haahashtari.

⁷ Ni Hela hu kɛ Ashur fɔ bihii etɛ̃: Zeret kɛ Izohar kɛ Etnan.

⁸ Koz fɔ Anub kɛ Zobeba kɛ mɔ mli ni Harum bi Aharhel wekui lɛ jɛ lɛ.

⁹ Nuu ko ni gbɛi ji Yabez lɛ na gbɛi fe enyɛmimɛi lɛ. Tsɛbelɛ enyɛ wo lɛ gbɛi akɛ Yabez ejaakɛ enyɛ lɛ kɛɛ, “Hejaramɔ mli mifɔ lɛ yɛ,”

¹⁰ shi Yabez sɔle etsɛ Israel Nyɔŋmɔ lɛ ni ekɛɛ, “Ofainɛ, Nyɔŋmɔ, ni ojɔɔ mi ni olɛɛ mihusui lɛ amli oha mi, ni obu mihe, ni obaa miyi koni nɔ fɔŋ ko akafee mi.” Nyɔŋmɔ hã Yabez nɔ ni ebi lɛ.

Wekui krokomɛi

¹¹ Kɛlub, Shuha nyɛmi lɛ, fɔ Mehir. Mehir fɔ Eshton,

¹² ni Eshton fɔ bihii etɛ̃: Bet-Rafa kɛ Pasea kɛ Tehina. Tehina ji mɔ ni to Nahash maŋ lɛ. Gbɔmɛi nɛɛ ashwiei lɛ hi Reka maŋ lɛ mli.

¹³ Kenaz fɔ bihii enyɔ: Otniel kɛ Seraia. Otniel hu fɔ bihii enyɔ: Hatat kɛ Meonotai;

¹⁴ ni Meonotai fɔ Ofra. Seraia fɔ Yoab mɔ ni to Ge-Harashim, ni ji ŋaalɔi amaŋ lɛ. Awo jɛi gbɛi nɛɛ ejaakɛ ŋaalɔi sɔŋŋ ji mɛi ni hi jɛi.

¹⁵ Kaleb, Yefune bi lɛ, fɔ bihii etɛ̃: Iru kɛ Ela kɛ Naam. Ela fɔ Kenaz.

¹⁶ Yehalelel fɔ bihii ejwɛ: Zif kɛ Zifa kɛ Tiria kɛ Asarel.

¹⁷ Ezra fɔ bihii ejwɛ: Yeter kɛ Mered kɛ Efer kɛ Yalon. Mered yaŋɔ Bitia, Ijipt maŋtsɛ biyoo lɛ, ni ekɛ lɛ fɔ biyoo kome, Miriam, kɛ bihii enyɔ, Shamai kɛ Ishba. Ishba nɛɛ ji mɔ ni to Eshtemoa maŋ lɛ shishi.

¹⁸ Mered yaŋɔ Yudayoo hu, ni ekɛ lɛ fɔ bihii etɛ̃: Yered mɔ ni to Gedor maŋ lɛ, kɛ Heber mɔ ni to Soko maŋ lɛ, kɛ Yekutiel mɔ ni to Zanoa maŋ lɛ.

¹⁹ Hodia ŋɔ Naham nyɛmi yoo lɛ. Shwiei ni amɛwo lɛ hu ashwiei ji Garmbii awekui ni hi Keila maŋ lɛ mli lɛ, kɛ Maakatbii awekui lɛ ni hi Eshtemoa maŋ lɛ mli lɛ.

²⁰ Shimon fɔ bihii ejwɛ: Amnon kɛ Rina kɛ Ben-Hanan kɛ Tilon. Ishi fɔ bihii enyɔ: Zohet kɛ Ben-Zohet.

Shela shwiei lɛ

²¹ Shela, Yudabii lɛ ateŋ mɔ kome lɛ shwiei ji Er, mɔ ni to Leka maŋ lɛ, kɛ Laada, mɔ ni to Maresha maŋ lɛ, kɛ klala fɛɛfɛo lolɔi awekui ni hi Bet-Ashbea maŋ lɛ mli lɛ;

²² kɛ Yokim kɛ Kozeba maŋ lɛ mli bii lɛ, kɛ Yoash kɛ Saraf, mɛi ni yaye onukpa yɛ Moab shikpɔŋ lɛ nɔ, ni fee sɛɛ lɛ amɛku amɛsɛɛ amɛbahi Betlehem lɛ (Blema sane nɛɛ etsɛ jogbaŋŋ diɛŋtsɛ).

²³ Gbɔmɛi nɛɛ tsu nii akɛ maŋtsɛ gbɛshɔ̃lɔi, ni maji amli ni amɛhi ji Netaim kɛ Gedera.

Simeon shwiei lɛ

²⁴ Simeon fɔ bihii enumɔ: Nemuel kɛ Yamin kɛ Yarib kɛ Zera kɛ Shaul.

²⁵ Shaul fɔ Shalum, ni Shalum fɔ Mibsam, ni Mibsam fɔ Mishma.

²⁶ Mishma fɔ Hamuel, ni Hamuel fɔ Zakur, ni Zakur fɔ Shimei.

²⁷ Shimei fɔ bihii nyɔŋma kɛ ekpaa kɛ biyei hu ekpaa. Shi moŋ Shimei nyɛmimɛi lɛ fɔɔɔ pii, ni no hewɔ lɛ, amɛweku lɛ shwereee tamɔ Yudabii lɛ.

²⁸ Kɛyashi beyinɔ ni Maŋtsɛ David baye maŋtsɛ lɛ, maji amli ni Simeon shwiei lɛ hi ji Beersheba kɛ Molada kɛ Hazar-Shual,

²⁹ kɛ Bilha kɛ Ezem kɛ Tolad,

³⁰ kɛ Betuel kɛ Horma kɛ Ziklag,

³¹ kɛ Bet-Markabot kɛ Hazar-Susim kɛ Bet-Biri kɛ Shaaraim.

³² Amɛ nɔŋŋ amɛmaji enumɔ krokomɛi hu ji Etam kɛ Ain kɛ Rimon kɛ Token kɛ Ashan.

³³ Soro amɛkrowai fɛɛ ni yɔɔ amɛmaji nɛɛ ahe kɛyashi Baalat maŋ lɛ wuoyigbɛ anai lɛ. Simeon shwiei lɛ ŋmala heihei ni amɛhi lɛ kɛ amɛwekui lɛ hu ahe saji amɛfɔ̃ shi.

³⁴ Amɛwekui lɛ amli onukpai lɛ ji Meshobab kɛ Yamlek kɛ Yosha, Amazia bi lɛ,

³⁵ kɛ Yoel kɛ Yehu (ni ji Asiel bi Seraia bi Yoshibia bi lɛ);

³⁶ kɛ Elioenai kɛ Yaakoba kɛ Yeshohaia kɛ Asaia kɛ Adiel kɛ Yesimiel kɛ Benaia;

³⁷ kɛ Ziza, ni ji Shemaia bi Shimei bi Yedaia bi Alon bi Shifi bi lɛ.

³⁸ Akɛ ni gbɔmɛi atã ni atsi nɛɛ ji amɛwekui lɛ amli onukpai, ni amɛwekui lɛ hu ayi miifa hewɔ lɛ,

³⁹ amɛyi mli kɛtee aahu kɛyanina Gedor maŋ lɛ ni amɛyatao jwɛifɔ amɛha amɛkooloi lɛ yɛ jɔɔ lɛ bokãgbɛ.

⁴⁰ Ni amɛyana niyelihe kɛ enɔ jwɛifɔ frɔ̃frɔ̃ ni hi hu; asaŋ shikpɔŋ lɛ lɛɛ jogbaŋŋ, ni enɔ jɔ, ni toiŋjɔlɛ yɛ nɔ. Sa ko lɛ Hambii ashwiei ji mɛi ni yɔɔ shikpɔŋ nɛɛ nɔ.

⁴¹ Shi Yuda Maŋtsɛ Hezekia yinɔ lɛ, lumɛi atã ni atsi nɛɛ fã kɛtee Gedor, ni amɛyakpãtã jɛibii abuui lɛ ahiɛ, ni amɛgbe Meunimbii ni amɛyanina yɛ jɛi lɛ, ni amɛshwie amɛ yɛ jɛi kɛbashi ŋmɛnɛ. Kɛkɛ ni amɛŋɔ shikpɔŋ lɛ, ni amɛhi nɔ ejaakɛ niyelihe yɛ jɛi hã amɛkooloi lɛ.

⁴² Fee sɛɛ lɛ Simeonbii lɛ nɔŋŋ ateŋ mɛi ohai enumɔ fã kɛtee Edom bokãgbɛ. Asafoiatsɛmɛi ni nyiɛ gbɔmɛi nɛɛ ahiɛ ji Ishi bihii Pelatia kɛ Nearia kɛ Refaia kɛ Uziel.

⁴³ Amɛyatua Amalekbii ashwiei ni eshwɛ lɛ ateŋ mɛi ni na foijee hegbɛ lɛ, ni amɛgbe amɛ ni amɛŋɔ amɛshikpɔŋ lɛ, ni amɛhi jɛi kɛbashi ŋmɛnɛ.