1 Kronika 26 - ŊMALƐ KRƆŊKRƆŊ LƐ

Sɔlemɔ we lɛ he Bulɔi

¹ Naa Levibii lɛ ateŋ mɛi ni ajara Sɔlemɔ we lɛ hebuu nitsumɔi lɛ ahã lɛ: Meshelemia, Koranyo ni ji Kore bi ni jɛ Asafbii lɛ ateŋ lɛ.

² Meshelemia fɔ bihii kpawo, ni amɛgbɛii nɛ yɛ fɔmɔ naa: Zakaria kɛ Yediael kɛ Zebadia kɛ Yatniel,

³ kɛ Elam kɛ Yehohanan kɛ Eliehoenai.

⁴ Mɔ ko hu ji Obed-Edom ni Nyɔŋmɔ jɔɔ lɛ, ni eduro lɛ bihii kpaanyɔ lɛ. Ebihii nɛɛ agbɛii yɛ fɔmɔ naa baa nɛɛ: Shemaia kɛ Yehozabad kɛ Yoa kɛ Sakar kɛ Netanel,

⁵ kɛ Amiel kɛ Isakar kɛ Peuletai.

⁶ Obed-Edom bi Shimei fɔ bihii ekpaa ni tsɔ̃mɔ amɛtsɛwe lɛ shĩai amli onukpai ejaakɛ hiɛwalɔi ji amɛ lɛ.

⁷ Shimei bii nɛɛ agbɛii yɛ fɔmɔ naa ji Otni kɛ Refael kɛ Obed kɛ Elzabad ni enyɛmimɛi ji Elihu kɛ Semakia kãkãlɔi lɛ.

⁸ Mɛnɛɛmɛi fɛɛ kɛ amɛbii kɛ amɛnyɛmimɛi, ni ji Obed-Edom bii krokomɛi lɛ fɛɛ ayibɔ fee hii kãkãlɔi nyɔŋmai ekpaa kɛ enyɔ ni eshɛ kɛhã bulɔi anitsumɔ.

⁹ Ana hii hiɛwalɔi nyɔŋma kɛ kpaanyɔ kɛhã buu nitsumɔ lɛ yɛ Meshelemia shwiei lɛ ateŋ.

¹⁰ Hosa ni jɛ Meraribii ateŋ lɛ hu yɛ bihii ejwɛ; Shimri, ni ji onukpa lɛ. Jeee lɛ ji kromɔbi moŋ, shi etsɛ wo lɛ onukpa;

¹¹ kɛ Hilkia kɛ Tebalaia kɛ Zakaria. Hosa shwiei fɛɛ ni aŋɔ awo buu nitsumɔ lɛ mli ayibɔ fee nyɔŋma kɛ etɛ̃.

¹² Ajara bulɔi nɛɛ amli kuikui, ku fɛɛ ku kɛ enukpa; ni ahã amɛ amɛgbɛnaa nitsumɔ yɛ Sɔlemɔ we lɛ mli tamɔ ahã amɛnyɛmimɛi Levibii krokomɛi lɛ nitsumɔ lɛ nɔŋŋ.

¹³ Tsɛmɛi ashĩaishĩai lɛ fɔ̃ oshiki koni akɛna nɔ agbonaa ni shĩa fɛɛ shĩa baabu; ayakwɛɛɛ mɛi ni ayi fa kɛ mɛi ni ayi faaa.

¹⁴ Oshiki ni afɔ̃ yɛ bokãgbɛ agbo lɛ hewɔ lɛ gbee Shelemia nɔ; ni nɔ ni afɔ̃ yɛ kooyigbɛ agbo lɛ hewɔ lɛ gbee Shelemia bi Zakaria, nuu nilelɔ lɛ nɔ.

¹⁵ Nɔ ni afɔ̃ wuoyigbɛ agbo lɛ, hewɔ lɛ gbee Obed-Edom nɔ; ni nitoohe lɛ nɔkwɛmɔ gbee ebihii lɛ anɔ.

¹⁶ Anaigbɛ agbo lɛ kɛ Shaleket agbo lɛ, nɔ ni kã gbɛjegbɛ ni yaa gɔŋ nɔ gbɛ lɛ he lɛ, anaibulɛ lɛ gbee Shupim kɛ Hosa nɔ. Aja buube lɛ pɛpɛɛpɛ bɔ ni eko faaa fe eko.

¹⁷ Mɛi ekpaa buɔ bokãgbɛ lɛ daa gbi; mɛi ejwɛ buɔ kooyigbɛ lɛ, ni mɛi ejwɛ hu buɔ wuoyigbɛ lɛ; shi mɛi enyɔnyɔɔnyɔ buɔ nitoohe lɛ daa gbi.

¹⁸ Mɛi ejwɛ buɔ he ni anaigbɛ agbo lɛ yɔɔ lɛ yɛ gbɛjegbɛ lɛ he lɛ, ni mɛi enyɔ buɔ agba lɛ diɛŋtsɛ he.

¹⁹ Nɛkɛ ji bɔ ni ajara agbonaabulɔi ni jɛ Korabii lɛ kɛ Meraribii lɛ ateŋ lɛ amli kuikui ahã.

²⁰ Levibii lɛ fɛɛ ateŋ lɛ, Ahia ji mɔ ni kwɛɔ Nyɔŋmɔ We lɛ nitoohei lɛ kɛ nibii ni akɛbake Nyɔŋmɔ We lɛ hu atoohe lɛ fɛɛ anɔ.

²¹ Gershon bi Ladan shwiei na shĩai babaoo ni eko ji ebinuu Yehiel shĩa lɛ.

²² Yehiel bihii enyɔ ni ji Zetam kɛ enyɛmi Yoel ji mɛi ni kwɛɔ Yehowa we lɛ nitoohei lɛ anɔ.

²³ Ni Amrambii lɛ kɛ Izeharbii lɛ kɛ Hebronbii lɛ kɛ Uzielbii lɛ hu, ahã amɛ amɛ hu amɛgbɛfaŋ nitsumɔi.

²⁴ Shebuel ni ji Mose bi Gershom shwie lɛ ji lumɔnukpa fe fɛɛ ni kwɛɔ nitoohei lɛ anɔ.

²⁵ Shebuel wekunyo Eliezer bi ji Rehabia, ni Rehabia bi ji Yeshaia, ni Yeshaia bi ji Yoram, ni Yoram bi ji Zikri, ni Zikri bi ji Shelomit.

²⁶ Nɛkɛ Shelomit nɛɛ kɛ enyɛmimɛi ji mɛi ni buɔ nibii krɔŋkrɔŋi lɛ atoohe lɛ he, ni ji nibii ni Maŋtsɛ David kɛ tsɛmɛiawei amli weku nukpai, kɛ asafoiatsɛmɛi ni kwɛɔ mɛi akpe akui kɛ mɛi ni kwɛɔ mɛi oha akui anɔ lɛ kɛ tatsɛmɛi lɛ ejɔɔ nɔ eke Nyɔŋmɔ lɛ.

²⁷ Amɛjɔɔ tai amli nibii ni amɛha lɛ mli eko nɔ amɛkɛke koni akɛtsu Yehowa we lɛ he nii.

²⁸ Shelomit kɛ enyɛmimɛi lɛ adɛŋ nɔ fɛɛ nɔ ni ake koni akɛtsu Sɔlemɔ we lɛ he nii lɛ yɔɔ. Nibii lɛ ekomɛi ji nibii ni Samuel, gbalɔ lɛ, kɛ Saul, Kish bi lɛ, kɛ Abner, Ner bi lɛ, kɛ Yoab, Zeruia bi lɛ, jɔɔ nɔ ke lɛ.

Nitsumɔi ni ahã Levibii krokomɛi

²⁹ Akɔ Kenania kɛ ebihii lɛ yɛ Izhar shwiei lɛ ateŋ koni amɛtsu maŋbii ashihilɛ he akɔntaabuu woji lɛ ahe nii, koni amɛkwɛ maŋbii ateŋ saji hu amɛkojo.

³⁰ Akɔ Hashabia yɛ Hebronbii lɛ ateŋ, ni akɛ Israel shikpɔŋ ni yɔɔ Yordan anaigbɛ lɛ nɔkwɛmɔ wo lɛ kɛ enyɛmimɛi Hebronbii lɛ ateŋ hii hemɔdɛŋbɔlɔi akpe dɛŋ. Akɛɛ amɛkwɛ Yehowa jamɔ saji kɛ maŋtsɛ lɛ hu sɔɔmɔ saji fɛɛ anɔ.

³¹ Yeria ji Hebronbii lɛ atsɛmɛi awei srɔtoi lɛ fɛɛ amli onukpa. Maŋtsɛ David maŋtsɛyeli afi ni ji nyɔŋmai ejwɛ lɛ nɔ lɛ, atao Hebron shwiei lɛ amli ekãalɔi lɛ ayibɔ, kɛkɛ ni ayana Hebronbii kãkãlɔi yɛ Yazer ni yɔɔ Gilead lɛ.

³² Maŋtsɛ David hala Yeria shwiei nɛɛ ashĩaishĩai lɛ kɛ enyɛmimɛi Hebronbii nɛɛ ateŋ hii kãkãlɔi kɛ tsɛmɛi awei amli onukpai akpei enyɔ kɛ ohai kpawo, ni ekɛ Israel shikpɔŋ ni yɔɔ Yordan bokãgbɛ lɛ, ni ji Rubenbii kɛ Gadbii kɛ Bokãgbɛ Manasebii ashikpɔŋ lɛ, nɔkwɛmɔ wo amɛdɛŋ akɛ amɛkwɛ Yehowajamɔ saji kɛ maŋtsɛ lɛ hu sɔɔmɔ saji fɛɛ anɔ yɛ jɛi.