1 Kronika 16 - ŊMALƐ KRƆŊKRƆŊ LƐ

¹ Akɛ Nyɔŋmɔ Kpãŋmɔ Adeka lɛ bama buu lɛ ni David eshi ehã adeka lɛ mli, ni ashã shãa afɔlei ahã Nyɔŋmɔ.

² Be ni David eshã shãa afɔlei lɛ kɛ shidaa afɔlei lɛ egbe naa lɛ, etsɛ Yehowa gbɛi ni ekɛjɔɔ maŋbii lɛ.

³ Kɛkɛ ni eja Israelbii lɛ fɛɛ nii. Ehã nuu fɛɛ nuu kɛ yoo fɛɛ yoo aboloo akwaabɔ kome kɛ loo kukuli kome kɛ wainyibii ni aka ni egbi.

⁴ David famɔ Levibii lɛ ateŋ mɛi komɛi koni amɛla kɛsɔmɔ yɛ Yehowa Kpãŋmɔ Adeka lɛ hiɛ kɛjie Yehowa, Israel Nyɔŋmɔ lɛ, yi koni amɛda lɛ shi ni amɛkɛkafo lɛ.

⁵ Asaf ji gbɔmɛi nɛɛ anukpa, ni esɛɛmɔ ji Zakaria. Yehiel kɛ Shemiramot kɛ Yehiel kɛ Matitia kɛ Eliab kɛ Benaia kɛ Obed-Edom kɛ Yehiel baatswa saŋkui kɛ obentai lɛ, ni Asaf baatswa ŋmɛlɛ kɛ egbee ŋlɛ̃ŋlɛ̃ lɛ.

⁶ Amɛteŋ osɔfoi enyɔ, ni ji Benaia kɛ Yahaziel, lɛ baakpã tɛtɛrɛmantɛrɛ daa yɛ Nyɔŋmɔ Kpãŋmɔ Adeka lɛ hiɛ.

⁷ Belɛ gbi nɛɛ ji klɛŋklɛŋ gbi ni David kɛ hegbɛ lɛ hã Asaf kɛ enyɛmimɛi Levibii nɛɛ akɛ amɛla kɛkafo Yehowa.

Yijiemɔ lala

⁸ Nyɛdaa Yehowa shi! Nyɛshiɛa egbojee; nyɛhãa maji lɛ alea nibii ni etsu lɛ!

⁹ Nyɛlaa nyɛhãa lɛ; nyɛlaa kɛkafoa lɛ; nyɛgbaa enaakpɛɛ nitsumɔi lɛ!

¹⁰ Nyɛshwãa nyɛfɔ̃a egbɛi krɔŋkrɔŋ lɛ nɔ; mɛi ni taoɔ Yehowa sɛɛgbɛ lɛ atsui anyɔ amɛmli!

¹¹ Nyɛyabia Yehowa dɛŋ wamɔ; nyɛyaa ehiɛ nyɛyajaa lɛ daa!

¹² Nyɛkaia naakpɛɛnii ni etsu lɛ; naakpɛɛnii ni efee kɛ mlai ni ewo lɛ.

¹³ Nyɛ etsulɔ Yakob shwiei, nyɛ Israel shwiei ni ji mɛi ni eŋɔ,

¹⁴ Naa, lɛ ji Yehowa, wɔNyɔŋmɔ lɛ; emlai lɛ yɛ hã jeŋ fɛɛ.

¹⁵ Nyɛhiɛ ahia enaanɔ kpãŋmɔ lɛ kɛ wiemɔi ni ekɛwo yinɔi akpe shi lɛ anɔ,

¹⁶ ni ji kpãŋmɔ ni ekɛ Abraham kpãŋ lɛ; kɛ kitã lɛ hu ni ekã Isak lɛ,

¹⁷ ni ema nɔ aduatsɔ ehã Yakob akɛ akpɔ, kɛ Israel hu akɛ naanɔ kpãŋmɔ,

¹⁸ ni ekɛɛ akɛ, “Bo maŋɔ Kanaan shikpɔŋ lɛ mahã akɛ ogbɛfaŋnɔ kɛ gboshinii.”

¹⁹ Be mli ni amɛyi faaa kwraa, ni amɛbɛ nɔ ko mli, gbɔi

²⁰ ni miitsomlo kɛjɛ maŋ nɔ kɛmiiya maŋ nɔ, kɛjɛ maŋtsɛ kome nɔyeli mli kɛmiiya nɔyeli kroko mli lɛ,

²¹ eŋmɛɛɛ mɔ ko mɔ ko gbɛ ni efee amɛ niseniianii; ebɔ maŋtsɛmɛi kɔkɔ yɛ amɛhe,

²² ni ekɛɛ akɛ, “Nyɛkataa mɛi ni mifɔ amɛ mu lɛ ahe, nyɛkafea migbalɔi lɛ ano ko.”

²³ Nyɛlaa nyɛhãa Yehowa, nyɛ shikpɔŋ muu lɛ fɛɛ! Nyɛshiɛa edɛŋ yiwalaheremɔ lɛ daa gbi.

²⁴ Nyɛgbaa enunyam lɛ yɛ majimaji lɛ ateŋ kɛ enaakpɛɛ nitsumɔi lɛ nyɛtsɔ̃a mɛi fɛɛ kwa.

²⁵ Ejaakɛ Yehowa je agbo, ni esa yijiemɔ kpeteŋkple ni esa gbeyeishemɔ fe nyɔŋmɔi srɔtoi fɛɛ.

²⁶ Ejaakɛ maji lɛ anyɔŋmɔi lɛ fɛɛ lɛ, amãgãi ni; Shi Yehowa lɛ, lɛ ebɔ ŋwɛi.

²⁷ Woo kɛ agbojee ebɔle ehe kɛkpe, ni hewalɛ kɛ miishɛɛ eyi eshihilɛhe lɛ mli.

²⁸ Nyɛkafoa Yehowa, nyɛ akutsei fɛɛ; nyɛkafoa enunyam kɛ ehewalɛ.

²⁹ Nyɛŋɔa anunyam ni sa egbɛi lɛ nyɛhãa Yehowa; nyɛkɛ afɔle abaa; ni nyɛbaa ewe lɛ mli. Nyɛkotoa Yehowa kɛ nyɛjamɔ atadei.

³⁰ Shikpɔŋ muu lɛ fɛɛ he akpokpo yɛ ehiɛ. Je lɛ ma shi shiŋŋ, ni ehiŋ lɛ tsimɔ.

³¹ Ŋwɛi anya, ni shikpɔŋ mli afili lɛ; ni agba jeŋ maji lɛ akɛ, “Yehowa miiye maŋtsɛ!”

³² Ŋshɔ kɛ emli nibii fɛɛ ahuu, ni ŋã kɛ nii fɛɛ ni yɔɔ emli abɔ oshe!

³³ Kooŋ tsei aaala kɛ nyamɔ yɛ Yehowa hiɛ, be mli ni ebaa ebaye shikpɔŋ lɛ nɔ lɛ.

³⁴ Nyɛdaa Yehowa shi ejaakɛ ehi; ejaakɛ esuɔmɔ ni tsakeee lɛ hiɔ shi kɛyaa naanɔ.

³⁵ Asaŋ nyɛkɛa akɛ, “Heremɔ wɔ, Ao wɔNyɔŋmɔ kɛ Herelɔ, ni obua wɔnaa, ni ohere wɔ yɛ jeŋ maji lɛ adɛŋ, koni wɔda bo shi ni wɔkafo ogbɛi krɔŋkrɔŋ lɛ, ni wɔshwã wɔfɔ̃ onɔ.

³⁶ Ajie Yehowa, Israel Nyɔŋmɔ lɛ, yi kɛjɛ naanɔ kɛyashi naanɔ!” Kɛkɛ ni maŋ muu lɛ fɛɛ here nɔ amɛkɛɛ, “Amen!” Ni amɛ jie Yehowa yi.

³⁷ Kɛkɛ ni David shi Asaf kɛ enyɛmimɛi Levibii lɛ yɛ he ni Yehowa Kpãŋmɔ Adeka lɛ yɔɔ lɛ ni amɛkwɛ jamɔ ni ajaa yɛ he ni Kpãŋmɔ Adeka lɛ yɔɔ lɛ nɔ daa, bɔ ni gbi fɛɛ gbi nɔ jamɔ heɔ.

³⁸ Asaŋ eshi Obed-Edom, Yedutun bi lɛ, kɛ enyɛmimɛi Gatbii nyɔŋmai ekpaa kɛ kpaanyɔ lɛ koni amɛwa sɔ̃ɔlɔi ni ji Levibii lɛ. Obed-Edom kɛ Hosa lɛ afee amɛ shinaanaakwɛlɔi.

³⁹ David fã Osɔfo Zadok kɛ enyɛmimɛi osɔfoi krokomɛi lɛ, ni ekɛ jamɔ ni ayajaa Yehowa yɛ jamɔhe ni yɔɔ Gibeon lɛ wo amɛdɛŋ,

⁴⁰ koni amɛshã shãa afɔlei yɛ afɔleshãa latɛ lɛ nɔ amɛhã Yehowa daa leebi kɛ gbɛkɛ, bɔ ni mla ni Yehowa ewo Israel lɛ kɛɔ lɛ.

⁴¹ Mɛi ni ahala afata amɛhe ji Heman kɛ Yedutun kɛ mɛi krokomɛi hu ni aje gbɛ ahala amɛ akɛ amɛla kɛda Yehowa shi yɛ esuɔmɔ ni tsakeee kɛmiiya naanɔ lɛ hewɔ.

⁴² Heman kɛ Yedutun ji mɛi ni kwɛɔ tɛtɛrɛmantɛrɛi kɛ ŋmɛji kɛ amɛgbee ŋlɛ̃ŋlɛ̃ lɛ kɛ jooshwɛmɔ nibii krokomɛi fɛɛ ni akɛshwɛɔ joo kɛji aala yijiemɔ lala krɔŋkrɔŋ lɛ. Ni Yedutun bii lɛ ji mɛi ni afee amɛ agbonaabulɔi.

⁴³ Kɛkɛ ni maŋ muu lɛ fɛɛ gbɛlɛ mli, ni mɔ fɛɛ mɔ tee eshĩa. Kɛkɛ ni David hu tee ewe eyanina eŋãmɛi kɛ ebii lɛ.