Biblia Todo Logo
Bìoball air-loidhne

- Sanasan -

1 Kronika 11 - ŊMALƐ KRƆŊKRƆŊ LƐ


David tsɔ̃ Israel kɛ Yuda fɛɛ Maŋtsɛ
( 2 Samuel 5.1-10 )

1 Israel muu fɛɛ tee Maŋtsɛ David ŋɔɔ yɛ Hebron, ni amɛyakɛɛ lɛ akɛ, “Naa, wɔ kɛ bo jɛ lá kome.

2 Nyɛsɛɛ ko be ni Maŋtsɛ Saul yeɔ wɔnɔ lɛ, bo ji tatsɛ ni nyiɛ Israelbii ahiɛ kɛtee kɛba, asaŋ Yehowa oNyɔŋmɔ lɛ wo bo shi akɛ, ‘Bo oootsɔ̃ mimaŋ Israelbii lɛ hiɛnyiɛlɔ kɛ amɛlumɔ.’ ”

3 Israel onukpai lɛ fɛɛ ba Maŋtsɛ David ŋɔɔ yɛ Hebron, ni ekɛ amɛ kpãŋ; kɛkɛ ni amɛfɔ David mu, ni amɛwo lɛ Israel maŋtsɛ bɔ ni Yehowa tsɔ̃ Samuel nɔ ewo shi eto lɛ.

4 Kɛkɛ ni David kɛ Israel muu fɛɛ fã ta kɛtee kɛyanina Yerusalɛm. Nakai be mli lɛ atsɛɔ Yerusalɛm akɛ Yebus. Shikpɔŋ lɛ nɔ shikwɛ̃ɛbii lɛ ni yɔɔ jɛi lɛ atsɛɔ amɛ Yebusbii.

5 Yebusbii lɛ tswa David mpoa akɛ, “Onyɛŋ biɛ oshɛ!” Shi David na eshɔ̃ Zion mɔɔ ni ji Yerusalɛm maŋ lɛ kɛ̃; ni fee sɛɛ lɛ maŋ lɛ gbɛi batsɔ David Maŋ.

6 David kɛɛ etabilɔi lɛ akɛ, “Mɔ tsuutsu ni aaayatswia Yebusbii lɛ nii lɛ, eeetsɔ̃ asafoiatsɛnukpa kɛ lumɔ fɛɛ.” Kɛkɛ ni Yoab, ni atsɛɔ enyɛ akɛ Zeruia lɛ, tsuutsu fã kɛtee eyatua Yebusbii lɛ, ni no hewɔ lɛ, etsɔ̃ asafoiatsɛnukpa.

7 Ni akɛni Maŋtsɛ David etee eyahi Zion Mɔɔ lɛ mli hewɔ lɛ, mɔɔ lɛ gbɛi batsɔ David Maŋ.

8 David saa etswa maŋ lɛ kɛjɛ he ni atsɛɔ akɛ Milo lɛ kpula kɛkpe, ni Yoab hu saa etswa he ni shwɛ lɛ.

9 Agbɛnɛ kɛjɛ nakai be lɛ kɛyaa lɛ, da kɛkɛ David hewalɛ lɛ daa, ejaakɛ Yehowa Ofe lɛ kɛ lɛ yɛ.


David tabilɔi kãkãlɔi lɛ
( 2 Samuel 23.8-39 )

10 Hii kakabãi ni Maŋtsɛ David yɔɔ lɛ ateiaŋ onukpai, mɛi ni fi esɛɛ kpɛŋŋ yɛ emaŋtsɛyeli lɛ mli, ni asaŋ Israel fɛɛ hu fata amɛhe ni awo David maŋtsɛ tamɔ bɔ ni Yehowa ewo shi eto yɛ Israel he lɛ agbɛii kɛ amɛhe saji baa nɛɛ.

11 Klɛŋklɛŋ mɔ lɛ ji Yashobeam, Hakemonnyo lɛ, mɔ hu ni ji hii kãkãlɔi etɛ̃ fe fɛɛ lɛ ateŋ onukpa lɛ. Ewo ekpɔlɔ nɔ lɛ, ekɛgbe mɛi ohai kpaanyɔ yɛ ta kome mli.

12 Esɛɛmɔ yɛ hii kãkãlɔi etɛ̃ lɛ ateŋ ji Eleazar, Ahohinyo, Dodo bi lɛ.

13 Lɛ ekɛ Maŋtsɛ David wu Pas-Damim ta lɛ be ni Filistibii lɛ babua amɛhe naa yɛ jɛi koni amɛ kɛ Israelbii lɛ awu lɛ. Be ni akɛ ta lɛ shɛ shikpɔŋ kuku ko ni yɔɔ jɛi ni akoko eyi nɔ obɔ lɛ nɔ lɛ, Israelbii lɛ bɔ̃i foijee yɛ Filistibii lɛ ahiɛ.

14 Shi Eleazar nɛɛ ho edamɔ shi akɛ nuu, ni ekpee ta lɛ naa yɛ shikpɔŋ kuku lɛ teŋ tuuŋtu efã shikpɔŋ lɛ he, ni ekɛ esɛɛnyiɛlɔi lɛ gbe Filistibii lɛ. Yehowa hã eye kunim kpeteŋkple.

15 Gbi ko lɛ hii kãkãlɔi nyɔŋmai etɛ̃ lɛ ateŋ mɛi etɛ̃ tee Maŋtsɛ David ŋɔɔ yɛ Adullam Tɛkplo lɛ mli yɛ tɛsaa lɛ nɔ. No mli lɛ Filistibii lɛ ebagba ta yɛ Refaim Jɔɔ lɛ mli,

16 ni amɛfã ko eŋɔ Betlehem, ni amɛyɛ jɛi; David hu yɛ tɛkplo lɛ mli.

17 David hiɛ tsɔ̃ shĩa ni ekɛɛ akɛ, “Namɔ po mana ni eya Betlehem eyayɛ nubu lɛ ni yɔɔ maŋ agbo lɛ masɛi lɛ mli nu ebaha mi manu?”

18 Kɛkɛ ni hii kãkãlɔi etɛ̃ nɛɛ gba sa kɛtsɔ̃ Filistibii tabilɔi lɛ ateŋ yɛ ekãa naa kɛho, ni amɛtee amɛyayɛ nubu lɛ ni yɔɔ Betlehem maŋ agbo lɛ masɛi lɛ mli nu, ni amɛkɛbahã David. Shi David emiii nu lɛ numɔ; shi moŋ efɔse eshwie shikpɔŋ akɛ nɔ ko ni ekɛmiishã afɔle eha Yehowa,

19 ni ekɛɛ akɛ, “MiNyɔŋmɔ, enɛ akagbale mi fɔ̃ŋfɔ̃ akɛ manu nɛkɛ nu nɛɛ. Kɛji minu lɛ, hii nɛɛ alá minu lɛ ejaakɛ amɛshã amɛhe afɔle, ni amɛtee amɛyayɛ nu lɛ kɛba.” No hewɔ lɛ, David enuuu nu lɛ.

20 Abishai, Yoab nyɛmi lɛ, ji hii Kakabãi Nyɔŋmai Etɛ̃ lɛ fɛɛ anukpa. Ekɛ hii ohai etɛ̃ nɔ, ni ekɛ edɛŋ akplɔ gbe fɛɛ, ni ekɛna gbɛi yɛ hii Kakabãi Nyɔŋmai etɛ̃ lɛ ateŋ.

21 Egbɛi hehe fe mɔ fɛɛ mɔ yɛ hii Kakabãi Nyɔŋmai Etɛ̃ lɛ ateŋ, ni etsɔ amɛnukpa; shi moŋ ekɛ Kakabãi Etɛ̃ lɛ yeee egbɔ.

22 Benaia, Yehoiada bi lɛ, ni jɛ Kabzeel lɛ, hu hii kãkãlɔi lɛ eko ni; ni efee ekãa naa nibii wuji srɔtoi babaoo. Eko ji akɛ egbe Moabbii tabilɔi kpanakpanai enyɔ komɛi be ko. Be ko hu lɛ ekpeleke shi kɛtee ni eyagbe jata yɛ bu ko mli yɛ snoo be mli.

23 Lɛ nɔŋŋ eku sɛɛ egbe Ijiptnyo nyɛnyereŋŋ ko ni ekwɔlɛ fe mitai enyɔ. Gbɔmɔ nɛɛ hiɛ akplɔ ni etilɛ tamɔ mamaloo agba tso tilɛ, ni eba koni ekɛ Benaia nɛɛ abanɔ. Benaia hiɛ tso folo ni ekɛyatua Ijiptnyo lɛ; eshɔ̃ akplɔ lɛ ni gbɔmɔ nɛɛ hiɛ lɛ yɛ edɛŋ, ni ekɛ Ijiptnyo lɛ nɔŋŋ akplɔ lɛ gbe lɛ.

24 Enɛɛmɛi ji nii ni Yehoiada bi Benaia fee, ni ekɛna gbɛi yɛ hii kãkãlɔi nyɔŋmai etɛ̃ lɛ ateŋ lɛ.

25 Egbɛi hehe jogbaŋŋ yɛ hii kãkãlɔi nyɔŋmai etɛ̃ lɛ ateŋ; shi moŋ ekɛ Kakabãi Etɛ̃ lɛ yeee egbɔ.

26 Hii Kakabãi Nyɔŋmai Etɛ̃ lɛ ateŋ fãbii ni shwɛɔ lɛ ji Asahel, ni ji Yoab nyɛmi lɛ, kɛ Elhanan, Dodo bi lɛ ni jɛ Betlehem lɛ,

27 kɛ Shamot, Harornyo lɛ kɛ Helez, Peletnyo lɛ.

28 Mɛi komɛi hu ji Ira, Tekoanyo, Ikesh bi lɛ, kɛ Abiezer, Anatotnyo lɛ,

29 kɛ Sibekai, Hushatnyo lɛ, kɛ Ilai, Ahohinyo lɛ,

30 kɛ Maharai, Netofatnyo lɛ, kɛ Heled, Netofatnyo Baana lɛ bi lɛ

31 kɛ Itai, Ribai ni jɛ Benyaminbii amaŋ Gibea lɛ bi lɛ kɛ Benaia, Piratonnyo lɛ.

32 Hii kakabãi lɛ fãbii komɛi hu ji Hurai, ni jɛ Gaash fai lɛ anaa lɛ, kɛ Abiel, Arbatnyo lɛ,

33 kɛ Azmavet, Baharumnyo lɛ, kɛ Eliaba, Shaalbonnyo lɛ,

34 kɛ Hashem, Gizonnyo lɛ, kɛ Yonatan, Hararnyo Shage bi lɛ

35 Ahiam, Hararnyo Sakar bi lɛ kɛ Elifal, Ur bi lɛ;

36 kɛ Hefer, Mekerathnyo lɛ kɛ Ahia, Pelonnyo lɛ,

37 kɛ Hezro, Karmelnyo lɛ kɛ Naarai, Ezbai bi lɛ.

38 Mɛi krokomɛi ji Yoel, Natan nyɛmi lɛ, kɛ Mibhar, Hagri bi lɛ;

39 kɛ Zelek, Amonnyo lɛ, kɛ Naharai, Berotnyo lɛ ni hiɛɔ Zeruia bi Yoab tawuu nii lɛ;

40 kɛ Ira, Itrinyo lɛ kɛ Gareb, Itrinyo lɛ;

41 kɛ Uria, Hitnyo lɛ, kɛ Zabad, Ahlai bi lɛ;

42 kɛ Adina, Shiza, Rubennyo lɛ bi lɛ ni eji Rubenbii asafoiatsɛ ni ehiɛ tabilɔi nyɔŋmai etɛ̃ lɛ.

43 Hii kakabãi lɛ ekrokomɛi hu ji Hanan, Maaka bi lɛ, kɛ Yoshafat, Mitannyo lɛ,

44 kɛ Uzia, Ashteratnyo lɛ kɛ Shama kɛ enyɛmi Yeiel, ni ji Aroernyo Hotam bihii lɛ;

45 kɛ Yediael kɛ enyɛmi Yoha, Tizinyo Shimri bihii lɛ;

46 kɛ Eliel, Mahavinyo lɛ, kɛ Yeribai kɛ enyɛmi Yoshavia ni ji Elnaam bihii lɛ kɛ Itma, Moabnyo lɛ,

47 kɛ Eliel kɛ Obed kɛ Yaasiel, Mezobanyo lɛ.

Bible in Ga Language © Bible Society of Ghana, 2020.

Bible Society of Ghana
Lean sinn:



Sanasan