1 Korintobii 8 - ŊMALƐ KRƆŊKRƆŊ LƐ

Niyenii ni akɛhã wɔji

¹ Agbɛnɛ yɛ wɔji afɔle gbɛfaŋ lɛ, wɔle akɛ “wɔ fɛɛ wɔyɛ nilee.” Nilee hãa mɔ woɔ ehe nɔ, shi suɔmɔ hãa mɔ nane mɔɔ shi.

² Kɛ mɔ ko susuɔ akɛ ele nɔ ko lɛ, eleko bɔ ni sa akɛ ele lolo.

³ Shi kɛ mɔ ko miisumɔ Nyɔŋmɔ lɛ, Nyɔŋmɔ le lɛ.

⁴ Agbɛnɛ nɔ ni kɔɔ wɔji afɔle nii ayeli he lɛ, wɔle akɛ wɔŋ ko wɔŋ ko jeee fɛifɛi yɛ je nɛɛ mli, ni asaŋ nyɔŋmɔ ko nyɔŋmɔ ko bɛ, akɛ ja Mɔ kome kɛkɛ.

⁵ Ejaakɛ kɛji nibii komɛi yɛ ni atsɛɔ amɛ nyɔŋmɔi lɛ; ŋwɛi amɛyɔɔ jio, shikpɔŋ lɛ nɔ amɛyɔɔ jio, tamɔ bɔ ni asɛ̃ɛɛ nyɔŋmɔi ahe ni asɛ̃ɛɛ nuŋtsɔmɛi ahe lɛ,

⁶ wɔ lɛ, Nyɔŋmɔ kome pɛ wɔyɔɔ, Tsɛ lɛ, mɔ mli ni nibii fɛɛ jɛ ni wɔyɔɔ wɔhã lɛ lɛ, kɛ Nuŋtsɔ kome hu ni ji Yesu Kristo lɛ, mɔ nɔ ni nibii fɛɛ tsɔ̃ kɛba ni wɔ hu wɔtsɔ̃ enɔ lɛ.

⁷ Shi kɛ̃lɛ jeee mɛi fɛɛ le nii nɛɛ; shi mɛi komɛi yɛ kɛbashi ŋmɛnɛ ni wɔŋjamɔ efee amɛhenɔ, no hewɔ lɛ, kɛ amɛmiiye wɔji afɔle nii lɛ, amɛyeɔ lɛ akɛ wɔji afɔlenii, ni enɛ buleɔ amɛ ejaakɛ egbede amɛhenilee.

⁸ Shi jeee ŋmaa hãa wɔsaa Nyɔŋmɔ hiɛ; kɛ wɔyeee lɛ ehãaa wɔtɛ nɔ atse, ni asaŋ kɛ wɔye hu ehãaa wɔhi fe nine.

⁹ Shi nyɛkwɛa ni ahĩa koni nyɛhegbɛ nɛɛ akabatsɔ̃ pampi miihã gbedelɔi lɛ.

¹⁰ Ejaakɛ kɛji mɔ ko na bo ni “ole nii” lɛ akɛ ota wɔŋtsu mli ooye nii lɛ, ani enɛ woŋ mɔ ni egbede lɛ henilee hewalɛ koni eyaye wɔji afɔlenii lɛ?

¹¹ Ni no lɛ “onilee” lɛ hewɔ lɛ nyɛmi gbedelɔ ni Kristo bagbo yɛ lɛ hu ehewɔ lɛ hiɛ baakpãtã.

¹² Shi kɛji nyɛfee nyɛmimɛi lɛ esha nɛkɛ ni nyɛkɛpila amɛhenilee ni waaa lɛ, no lɛ Kristo nyɛfeɔ esha nyɛshiɔ lɛ.

¹³ No hewɔ lɛ, kɛji ŋmaa aaahã minyɛmi nane atɔ̃tɔ̃ lɛ, miyeŋ loo gbi ko gbi ko dɔŋŋ, koni mikahã minyɛmi lɛ nane miitɔ̃tɔ̃.