1 Korintobii 7 - ŊMALƐ KRƆŊKRƆŊ LƐ

Nɔ ni Paulo susuɔ yɛ gbãlãshihilɛ he

¹ Agbɛnɛ, yɛ nii ni nyɛŋma nyɛbahã mi lɛ ahe lɛ, ehi hã nuu akɛ ekata yoo he;

² shi ajwamãŋbɔɔ hewɔ lɛ nuu fɛɛ nuu ahi lɛ diɛŋtsɛ eŋa, ni yoo fɛɛ yoo ahi lɛ diɛŋtsɛ ewu.

³ Wu lɛ atsu eŋa lɛ gbɛnaanii ehã lɛ, ni ŋa lɛ hu afee nakai nɔŋŋ ehã ewu.

⁴ Ŋa lɛ bɛ hewalɛ yɛ lɛ diɛŋtsɛ egbɔmɔtso nɔ, shi moŋ ewu lɛ yɔɔ hewalɛ; nakai nɔŋŋ wu lɛ bɛ hewalɛ yɛ lɛ diɛŋtsɛ egbɔmɔtso nɔ, shi eŋa lɛ yɔɔ hewalɛ.

⁵ Nyɛkɛ nyɛhe akakãmaa nyɛhe, akɛ ja nyɛyi enyɔ lɛ fɛɛ nyɛkpãa gbee akɛ nyɛaafee nakai kɛyashi be ko koni nyɛna dekã nyɛsɔle; ni nyɛfee ekome ekoŋŋ, koni Satan akatsɔ̃ nyɛnaa yɛ nyɛhe nɔ ni nyɛnyɛɛɛ nyɛye hewɔ.

⁶ Enɛ ni miwieɔ nɛɛ, jeee kitã miwoɔ nyɛ, shi miiwie kɛtsɔ̃ɔ akɛ gbɛŋmɛɛ yɛ he.

⁷ Ka mihewɔŋ kulɛ gbɔmɛi fɛɛ ahi shi tamɔ bɔ ni miyɔɔ nɛɛ. Shi mɔ fɛɛ mɔ yɛ lɛ diɛŋtsɛ edromɔ keenɔ kɛjɛ Nyɔŋmɔ dɛŋ, mɔ ko nɔ nɛkɛ, ni mɔ ko hu nɔ ekroko.

⁸ Shi oshijafoi kɛ okulafoi lɛ, miikɛɛ amɛ akɛ, ehi hã amɛ kɛji amɛhi shi tamɔ bɔ ni mi hu miyɔɔ nɛɛ lɛ.

⁹ Shi kɛ amɛnyɛɛɛ amɛhe nɔ amɛye lɛ, amɛbote gbãlãshihilɛ mli; ejaakɛ gbãlãshihilɛ hi fe nɔ ni akɔnɔ aaahao bo.

¹⁰ Shi mɛi ni ebote gbãlãshihilɛ mli lɛ, mi, ni jeee mi tete, shi Nuŋtsɔ lɛ moŋ woɔ amɛ kitã akɛ; ŋa akatse ewu gbãlã;

¹¹ ni kɛji etse gbãlã lɛ tete lɛ, ehi shi akɛ mɔ ni bɛ wu, aloo ekɛ ewu lɛ ayakpãtã; ni wu hu akaŋmɛɛ eŋa he.

¹² Shi mɛi ni eshwɛ lɛ, jeee Nuŋtsɔ lɛ, shi mi miikɛɛ amɛ akɛ, kɛji nyɛmi ko yɛ ŋa ni jeee heyelɔ, ni yoo lɛ kpɛlɛ̃ akɛ ekɛ lɛ aaahi shi lɛ, ekaŋmɛɛ ehe.

¹³ Ni kɛ yoo ko hu yɛ wu ni jeee heyelɔ, ni nuu lɛ kpɛlɛ̃ akɛ ekɛ lɛ aaahi shi lɛ, ekatse lɛ gbãlã.

¹⁴ Ejaakɛ atsuɔ nuu ni jeee heyelɔ lɛ he yɛ eŋa lɛ mli, ni atsuɔ yoo ni jeee heyelɔ lɛ hu he yɛ ewu lɛ mli; ejaakɛ jeee nakai jikulɛ, nyɛbii lɛ hu ahe yɛ muji; shi amrɔ nɛɛ amɛhe tse.

¹⁵ Shi kɛ mɔ ni jeee heyelɔ lɛ miigbala ehe shi lɛ, egbala ehe shi; anyɛɛɛ nyɛmi nuu loo nyɛmi yoo nɔ tamɔ nyɔŋ yɛ nɛkɛ saji nɛɛ amli; ejaakɛ hejɔlɛ mli Nyɔŋmɔ etsɛ wɔ kɛba.

¹⁶ Shi, bo yoo, bo obaahere owu lɛ yiwala jio, ole? Aloo bo nuu, bo hu obaahere oŋa lɛ yiwala jio, ole?

Bɔ ni atsɛ mɔ ko lɛ nakai ehi shi

¹⁷ Mɔ fɛɛ mɔ lɛ, bɔ ni Nuŋtsɔ lɛ eja nikeenii ehã lɛ, kɛ bɔ ni eyɔɔ ni Nyɔŋmɔ tsɛ lɛ lɛ, ehi shi nakai. Ni nakai mito hu yɛ asafoi lɛ fɛɛ mli.

¹⁸ Kɛ afo mɔ ko ketia ni atsɛ lɛ lɛ, ekatsɔ̃ ehe foolɔ; foo mli atsɛ mɔ ko yɛ hu, ekafo ketia.

¹⁹ Ketiafoo jeee nɔ ko, ni foo hu jeee nɔ ko, shi Nyɔŋmɔ kitãi lɛ anɔyeli moŋ ji nɔ ko.

²⁰ Mɔ fɛɛ mɔ lɛ, nɔ shihilɛ mli ni eyɔɔ ni atsɛ lɛ lɛ, no mli nɔŋŋ ehi.

²¹ Ani nyɔŋ ji bo be ni atsɛ bo lɛ? Kaahã miidɔ bo; shi kɛ ooonyɛ ohe okpɔ̃ lɛ, bɔɔ he mɔdɛŋ.

²² Shi mɔ ni atsɛ lɛ yɛ Nuŋtsɔ lɛ mli ni eji nyɔŋ lɛ, Nuŋtsɔ lɛ odehe ni; nakai nɔŋŋ kɛ mɔ ni atsɛ lɛ ni eji odehe lɛ, Kristo nyɔŋ ni.

²³ Jara ni wa akɛhe nyɛ; nyɛkatsɔmɔa gbɔmɛi anyɔji.

²⁴ Anyɛmimɛi, mɔ fɛɛ mɔ lɛ, nɔ mli ni eyɔɔ ni atsɛ lɛ yɛ lɛ, no mli nɔŋŋ ehi yɛ Nyɔŋmɔ ŋɔɔ.

Oblayei kɛ oblahii kɛ okulafoi

²⁵ Shi oblayei foroi lɛ, mibɛ Nuŋtsɔ lɛ kitã ko yɛ amɛhe, shi nɔ ni misusuɔ mikɛɔ nɛɛ, tamɔ mɔ ko ni Nuŋtsɔ lɛ ena lɛ mɔbɔ koni eye anɔkwa.

²⁶ No hewɔ lɛ, nɔ ni misusuɔ akɛ ehi ji, hejaramɔ ni yɔɔ amrɔ nɛɛ hewɔ lɛ, ehi hã gbɔmɔ akɛ ehi shi bɔ ni eyɔɔ.

²⁷ Mla efi bo ekpɛtɛ yoo he? Kaatao fɛnemɔ. Afɛne bo yɛ yoo he? Kaatao ŋa.

²⁸ Shi kɛji oŋɔ yoo hu, ofeko esha; ni kɛji oblayoo foro hu bote gbãlãshihilɛ mli lɛ, efeko esha; shi gbɔmɔtso gbɛfaŋ amanehulu mɛnɛɛmɛi baana; shi mi lɛ, nyɛhe mifoɔ.

²⁹ Shi, anyɛmimɛi, nɔ ni mikɛɔ ji akɛ, be lɛ faaa dɔŋŋ; nɔ ni eshwɛ ji akɛ, mɛi ni yɔɔ ŋamɛi tete afee amɛhe tamɔ mɛi ni bɛ eko; ni mɛi ni foɔ lɛ hu afee amɛhe tamɔ mɛi ni fooo;

³⁰ ni mɛi ni nyaa afee amɛhe tamɔ mɛi ni nyaaa; ni mɛi ni heɔ nii lɛ afee amɛhe tamɔ mɛi ni jeee nɔtsɛmɛi;

³¹ ni mɛi ni tsuɔ je nɛɛ he nii lɛ afee amɛhe tamɔ mɛi ni tsuuu he nii; ejaakɛ je lɛ bɔ ni wɔnaa lɛ nɛɛ hoɔ eyaa.

³² Shi misumɔɔɔ akɛ nyɛfee yeyeeye. Mɔ ni bɛ ŋa lɛ, ekɛ ehe fɛɛ hãa Nuŋtsɔ lɛ nitsumɔ, bɔ ni eeefee ni esa Nuŋtsɔ lɛ hiɛ;

³³ shi mɔ ni yɔɔ ŋa lɛ, ekɛ ehe fɛɛ hãa yɛ je nɛɛ mli nii ahewɔ, bɔ ni eeefee ni esa eŋa lɛ hiɛ,

³⁴ ni efeɔ jwɛŋmɔ enyɔnyɔɔnyɔtsɛ. Yoo ni bɛ wu loo oblayoo foro lɛ, ekɛ ehe fɛɛ hãa Nuŋtsɔ lɛ nitsumɔ lɛ, koni efee krɔŋkrɔŋ yɛ gbɔmɔtso kɛ mumɔ fɛɛ gbɛfaŋ; shi mɔ ni yɔɔ wu lɛ, ekɛ ehe fɛɛ hãa yɛ je nɛɛ mli nii ahewɔ, bɔ ni eeefee ni esane asa ewu hiɛ.

³⁵ Shi enɛ lɛ, nyɛ ekpakpa hewɔ mikɛɔ, jeee nyɛkuɛ kpãa miwoɔ, shi moŋ bɔ ni afee ni afee fɛo, koni nyɛsɔ̃mɔ Nuŋtsɔ lɛ ni nɔ ko nɔ ko wooo nyɛ najiaŋ.

³⁶ Shi kɛji nuu ko susuɔ akɛ ebaaa ejeŋ jogbaŋŋ yɛ eblayoo foro gbɛfaŋ, ni enyɛɛɛ ehe nɔ eye dɔŋŋ, ni asaŋ enyɛɛɛ he nɔ ko efee lɛ, efee bɔ ni esumɔɔ, efeee esha; amɛkpee amɛhe.

³⁷ Shi mɔ ni ekpɛ mli yɛ etsui mli, ni nɔ ko nɔ ko efiii lɛ, shi enyɛɔ efeɔ nɔ ni lɛ esumɔɔ ni ekpɛ mli nɛkɛ yɛ lɛ diɛŋtsɛ etsui mli akɛ eeeya nɔ ehiɛ lɛ akɛ eblayoo foro lɛ, efee jogbaŋŋ.

³⁸ No hewɔ lɛ, mɔ ni kɛ eblayoo foro lɛ boteɔ gbãlãshihilɛ mli lɛ, efee jogbaŋŋ moŋ, shi mɔ ni boteee gbãlãshihilɛ mli lɛ, efee jogbaŋŋ fe no.

³⁹ Yoo lɛ, gbii abɔ ni ewu hiɛ kã nɛɛ, akɛ mla efi lɛ; shi kɛji ewu lɛ gbo lɛ, eyɛ hegbɛ akɛ egbã mɔ ni esumɔɔ; shi belɛ afee yɛ Nuŋtsɔ lɛ mli.

⁴⁰ Shi kɛji ehi shi bɔ ni eyɔɔ lɛ, eyɛ hejɔlɛ aahu. Mijwɛŋmɔ nɛ, ni efeɔ mi akɛ mi hu miyɛ Nyɔŋmɔ Mumɔ.