1 Korintobii 6 - ŊMALƐ KRƆŊKRƆŊ LƐ

Heyelɔi kɛ amɛsaji akahã mɛi ni heee yeee

¹ Te kɛ nyɛteŋ mɔ ko kɛ enaanyo na sane ko lɛ, eshiɔ etsitsi ekɛ lɛ yayeɔ sane lɛ yɛ jeŋbii akojomɔhe, shi ekɛ lɛ eyaaa mɛi krɔŋkrɔŋi lɛ aŋɔɔ?

² Ani nyɛleee akɛ mɛi krɔŋkrɔŋi lɛ baakojo je lɛ?

³ Ani nyɛleee akɛ wɔbaakojo ŋwɛi bɔfoi tete, ni mbasroo walashihilɛ nɛɛ mli saji?

⁴ No hewɔ lɛ, kɛji nyɛyɛ walashihilɛ nɛɛ mli saji komɛi ayeli lɛ, mɛɛba nyɛhãa mɛi ni asafo lɛ ebuuu amɛ lɛ kojoɔ mɔ?

⁵ Miikɛɛ enɛ ni mikɛwo nyɛ hiɛgbele. Aso nilelɔ kome flo bɛ nyɛteŋ, mɔ ni aaanyɛ enyɛmimɛi ateŋ ekojo?

⁶ Shi moŋ mɔ kɛ enyɛmi yayeɔ sane yɛ mɛi ni heee yeee lɛ aŋɔɔ po?

⁷ Enɛ lɛ aye nyɛnɔ kunim momo, akɛni nyɛkɛ nyɛhe yeyeɔ saji lɛ. Mɛɛba nyɛhãaa mɛi afee nyɛ nɔ ni ejaaa gbɛ moŋ? Mɛɛba nyɛhãaa mɛi aye nyɛ amim moŋ?

⁸ Shi nyɛ moŋ nyɛfeɔ nyɛmimɛi tete nɔ ni ejaaa gbɛ, ni nyɛyeɔ amɛ amim.

⁹ Ani nyɛleee akɛ efɔŋfeelɔi anine shɛŋ Nyɔŋmɔ maŋtsɛyeli lɛ nɔ? Nyɛkahãa alakaa nyɛ! Ajwamãŋbɔlɔi loo wɔŋjalɔi loo gbãlãŋkulɔi loo hii ni tsɔ̃mɔɔ amɛhe yei hãa hii krokomɛi loo hii ni kɛ hii feɔ yakayakanii,

¹⁰ loo julɔi loo hiɛjoolɔi loo dãatɔlɔi loo mɛi ajɛlɔi loo ojotswalɔi anine shɛŋ Nyɔŋmɔ maŋtsɛyeli lɛ nɔ.

¹¹ Ni nɛkɛ nyɛteŋ mɛi komɛi yɔɔ sa; shi agbɛnɛ aju nyɛhe, ni asaŋ atsuu nyɛhe, ni abu nyɛ bem hu yɛ Nuŋtsɔ Yesu Kristo gbɛi kɛ wɔNyɔŋmɔ lɛ Mumɔ lɛ mli.

Nyɛkɛ nyɛgbɔmɔtsei lɛ awoa Nyɔŋmɔ hiɛ nyam

¹² Miyɛ nibii fɛɛ hegbɛ moŋ, shi kɛ̃lɛ jeee nibii fɛɛ hi; miyɛ nibii fɛɛ hegbɛ moŋ, shi mihãŋ nɔ ko aye minɔ.

¹³ Ŋmaa yɛ hã musu, ni musu hu yɛ hã ŋmaa; shi Nyɔŋmɔ baahã enyɔ lɛ fɛɛ sɛɛ afo. Shi gbɔmɔtso lɛ, jeee ajwamãŋbɔɔ hewɔ eyɔɔ, shi moŋ Nuŋtsɔ lɛ hewɔ eyɔɔ; ni Nuŋtsɔ lɛ hu yɛ hã gbɔmɔtso lɛ.

¹⁴ Nyɔŋmɔ tee Nuŋtsɔ lɛ shi kɛjɛ gbohii ateŋ; ni ebaatee wɔ hu shi yɛ ehewalɛ naa.

¹⁵ Ani nyɛleee akɛ nyɛgbɔmɔtsei lɛ Kristo henii ni? Belɛ miŋɔ Kristo henii lɛ mifee ajwamãŋ henii lo? Dabida!

¹⁶ Aloo nyɛleee akɛ mɔ ni kɛ ehe yabɔɔ ajwamãŋ he lɛ, ekɛ lɛ feɔ gbɔmɔtso kome? Ejaakɛ Nyɔŋmɔ kɛɛ akɛ, “Amɛyi enyɔ lɛ fɛɛ amɛaatsɔ̃ heloo kome.”

¹⁷ Shi mɔ ni kɛ ehe bɔɔ Nuŋtsɔ lɛ he lɛ, ekɛ lɛ feɔ mumɔ kome.

¹⁸ Nyɛjoa ajwamãŋbɔɔ naa foi! Esha fɛɛ esha ni gbɔmɔ feɔ lɛ, jeee egbɔmɔtso lɛ mli eyɔɔ; shi mɔ ni bɔɔ ajwamãŋ lɛ, efeɔ esha eshiɔ lɛ diɛŋtsɛ egbɔmɔtso lɛ.

¹⁹ Ani nyɛleee akɛ nyɛgbɔmɔtso lɛ Mumɔ Krɔŋkrɔŋ ni yɔɔ nyɛmli ni nyɛna kɛjɛ Nyɔŋmɔ ŋɔɔ lɛ Sɔlemɔtsu ni, ni nyɛjeee nyɛ diɛŋtsɛ nyɛnɔ lo?

²⁰ Ejaakɛ ahe nyɛ kɛ jara ni wa. No hewɔ lɛ, nyɛkɛ nyɛgbɔmɔtsei lɛ awoa Nyɔŋmɔ hiɛ nyam.