1 Korintobii 4 - ŊMALƐ KRƆŊKRƆŊ LƐ

Kristo bɔfoi lɛ

¹ Bɔ pɛ ni gbɔmɛi abu wɔ nɛ, akɛ Kristo sɔ̃ɔlɔi kɛ Nyɔŋmɔ teemɔ saji lɛ anɔ tsuji nukpai.

² Shi nɔ ni eshwɛ ni ataoɔ yɛ tsuji nukpai adɛŋ ji akɛ ana amɛ akɛ anɔkwafoi.

³ Shi mi lɛ, ejeee nɔ ko titri ko hã mi akɛ nyɛkojoɔ mi aloo akɛ akɛ gbɔmɛi akojomɔ aaakojo mi; mi diɛŋtsɛ tete mikojooo mihe.

⁴ Ejaakɛ mileee nɔ ko fɔŋ ko yɛ mi diɛŋtsɛ mihe moŋ, shi kɛ̃lɛ jeee no hewɔ aaabu mi bem; shi mɔ ni kojoɔ mi ji Nuŋtsɔ lɛ.

⁵ No hewɔ lɛ, nyɛkakojoa nɔ ko dani shɛ be lɛ, kɛyashi beyinɔ ni Nuŋtsɔ lɛ aaaba, mɔ ni kɛ dujiaŋ nibii ni akɛtee lɛ tete aaaba la hiɛ, ni eeejie tsuiiaŋ ajinai lɛ ashi lɛ. Ni no mli lɛ mɔ fɛɛ mɔ aaana eyijiemɔ kɛaajɛ Nyɔŋmɔ dɛŋ.

⁶ Shi, anyɛmimɛi, nyɛhewɔ mikɛ nɛkɛ nibii nɛɛ toɔ mi kɛ Apolo he lɛ, koni nyɛkwɛ wɔ ni nyɛkase nɔ ni kɛɔ akɛ “mɔ ko akajwɛŋ fe nɔ ni aŋma lɛ” koni nyɛteŋ mɔ ko kɛ henɔwomɔ akabu mɔ ko fe mɔ kroko.

⁷ Shi namɔ buɔ bo akɛ esoro bo? Ni asaŋ, mɛni oyɔɔ ni jeee hã ahã bo? Shi kɛji hã ahã bo lɛ, mɛɛba oshwãa tamɔ nɔ ni jeee hã ahã bo lɛ?

⁸ Nyɛtɔrɔ momo! Nyɛna nii momo! Nyɛshi wɔsɛɛ ni nyɛmiiye maŋtsɛ! Ni mina ni kulɛ nyɛmiiye maŋtsɛ lɛɛlɛŋ, koni wɔ hu wɔkɛ nyɛ aye!

Bɔ ni wɔsane tamɔ yɛ mɛi ahiɛ

⁹ Ejaakɛ efeɔ mi akɛ Nyɔŋmɔ eŋɔ wɔ ni ji bɔfoi lɛ moŋ efee sɛɛkpelɔi, tamɔ mɛi ni ajɔɔ amɛnɔ ahã gbele; ejaakɛ akɛ wɔ efee kwɛmɔnii ahã je lɛ kɛ ŋwɛi bɔfoi kɛ gbɔmɛi.

¹⁰ Wɔ lɛ, kwashiai ji wɔ yɛ Kristo hewɔ, shi nyɛ lɛ, nilelɔi ji nyɛ yɛ Kristo mli; wɔ lɛ, gbɔjɔlɔi ji wɔ, shi nyɛ lɛ hewalɔi ji nyɛ; nyɛ nyɛhiɛ yɔɔ nyam, shi wɔ lɛ, wɔhiɛ bɛ nyam.

¹¹ Kɛbashi be nɛ fɛɛ lɛ, hɔmɔ kɛ kumai yeɔ wɔ, ni wɔnyiɛɔ yayai, ni agbalagbalaa wɔ mãi, ni wɔbɛ hilɛhe krɛdɛɛ ko.

¹² Ni wɔgboɔ deŋme wɔkɛ wɔ diɛŋtsɛ wɔniji tsuɔ nii; be ni ajɛɔ wɔ lɛ, wɔmiijɔɔ; be ni awaa wɔ yi lɛ, wɔmiɔ ŋɔɔ;

¹³ be ni afiteɔ wɔgbɛi lɛ, wɔɔwie naajɔlɛ wiemɔ; afee wɔ tamɔ je lɛ tumonɔnii, mɛi fɛɛ ajwɛi kɛbashi be nɛ.

Paulo wie tsɔ̃ɔ Korintobii lɛ akɛ tsɛ

¹⁴ Miŋmaaa enɛɛmɛi ni mikɛwo nyɛ hiɛgbele, shi moŋ miiwie miitsɔ̃ɔ nyɛ tamɔ mibii ni misumɔɔ.

¹⁵ Ejaakɛ kɛji nyɛyɛ kwɛlɔi akpei nyɔŋma tete yɛ Kristo mli lɛ, jeee tsɛmɛi pii nyɛyɔɔ; ejaakɛ mi mitsɔ̃ Sanekpakpa lɛ nɔ mifɔ nyɛ yɛ Kristo Yesu mli.

¹⁶ No hewɔ lɛ, miikpa nyɛ fai ni nyɛkase mi.

¹⁷ No hewɔ hu ni mitsu Timoteo, ni ji misuɔmɔ bi kɛ anɔkwafo yɛ Nuŋtsɔ lɛ mli lɛ nyɛŋɔɔ, ni ebakai nyɛ bɔ ni mibaa mijeŋ mihãa yɛ Kristo mli, tamɔ bɔ ni mitsɔ̃ɔ yɛ asafo fɛɛ asafo mli yɛ he fɛɛ he lɛ.

¹⁸ Shi akɛni mɛi komɛi susuɔ akɛ mibaŋ nyɛŋɔɔ hewɔ lɛ, amɛwo amɛhe nɔ.

¹⁹ Shi kɛ Nuŋtsɔ lɛ miisumɔ lɛ, etsɛŋ ni maba ni mabana mɛi ni woɔ amɛhe nɔ lɛ ahewalɛ, shi jeee amɛwiemɔ.

²⁰ Ejaakɛ jeee wiemɔ mli Nyɔŋmɔ maŋtsɛyeli lɛ yɔɔ, shi moŋ hewalɛ mli.

²¹ Te nyɛtaoɔ lɛ tɛŋŋ? Mihiɛ kpãa kɛba nyɛŋɔɔ, aloo miba yɛ suɔmɔ kɛ mlijɔlɛ mumɔ mli?