1 Korintobii 3 - ŊMALƐ KRƆŊKRƆŊ LƐ

Nyɔŋmɔ hefatalɔi nitsulɔi ji wɔ

¹ Shi, anyɛmimɛi, minyɛɛɛ mikɛ nyɛ awie tamɔ mumɔŋ gbɔmɛi, shi moŋ tamɔ helooŋ gbɔmɛi, tamɔ abifabii yɛ Kristo mli.

² Fufɔ mihã nyɛ, shi jeee ŋmaa ni tsii, ejaakɛ nyɛnyɛɛɛ nyɛye; ni asaŋ amrɔ nɛɛ tete nyɛnyɛɛɛ lolo,

³ ejaakɛ helooŋ gbɔmɛi ji nyɛ lolo. Shi gbii abɔ ni awuŋayeli kɛ bei yɔɔ nyɛteŋ lolo lɛ, ani jeee helooŋ gbɔmɛi ji nyɛ ni gbɔmɛi ajeŋba nyɛbaa lɛ?

⁴ Ejaakɛ kɛ mɔ ko kɛɔ akɛ, “Mi lɛ Paulo nɔ ji mi,” ni mɔ ko hu kɛɔ akɛ, “Mi lɛ Apolo nɔ ji mi,” lɛ, ani jeee helooŋ gbɔmɛi ji nyɛ?

⁵ Agbɛnɛ, Namɔ ji Apolo? Namɔ ji Paulo? Amɛ ji sɔ̃ɔlɔi ni nyɛtsɔ̃ amɛnɔ nyɛhe nyɛye, amɛteŋ mɔ fɛɛ mɔ lɛ bɔ ni Nuŋtsɔ lɛ kɛhã lɛ.

⁶ Mi lɛ, mitɛo; Apolo shwie nɔ nu; shi Nyɔŋmɔ hã eda.

⁷ Belɛ agbɛnɛ jeee mɔ ni tɛo lɛ ji nɔ ko, ni jeee mɔ ni shwie nɔ nu lɛ hu, shi moŋ mɔ ni hã eda, ni ji Nyɔŋmɔ lɛ.

⁸ Shi mɔ ni tɛoɔ lɛ kɛ mɔ ni shwieɔ nɔ nu lɛ fɛɛ lɛ ekomeŋ; shi amɛteŋ mɔ fɛɛ mɔ aaana lɛ diɛŋtsɛ enyɔmɔwoo yɛ lɛ diɛŋtsɛ edeŋmegbomɔ naa.

⁹ Ejaakɛ Nyɔŋmɔ hefatalɔi nitsulɔi ji wɔ; Nyɔŋmɔ ŋmɔ kɛ Nyɔŋmɔ tsu ji nyɛ.

¹⁰ Nyɔŋmɔ dromɔ ni ekɛduro mi lɛ naa lɛ, mito shishi tamɔ tsutswalɔ ko ni hiɛ yɔɔ ŋaa, shi mɔ kroko tswaa nɔ. Shi mɔ fɛɛ mɔ akwɛ ni ahi bɔ ni etswaa nɔ ehãa lɛ.

¹¹ Ejaakɛ mɔ ko nyɛŋ shishi kroko ato fe nɔ ni ato momo ni ji Yesu Kristo lɛ.

¹² Shi kɛ mɔ ko kɛ shika loo jwiɛtɛi loo tɛi ni jara wa loo tsei loo jwɛi loo gbetselii tswa shishitoo nɛɛ nɔ lɛ,

¹³ mɔ fɛɛ mɔ nitsumɔ baaje kpo faŋŋ; ejaakɛ Gbi lɛ aaajie lɛ kpo, ejaakɛ la mli eeeje kpo yɛ, ni bɔ ni mɔ fɛɛ mɔ nitsumɔ yɔɔ lɛ, la lɛ baajie lɛ kpo.

¹⁴ Kɛ mɔ ko nitsumɔ ni ji nɔ ni etswa ema nɔ lɛ aaahi shi lɛ, eeena nyɔmɔwoo;

¹⁵ shi kɛ mɔ ko nitsumɔ aaashã lɛ, enine baanyɛ shi; shi lɛ diɛŋtsɛ lɛ, aaahere eyiwala, shi kɛ̃lɛ tamɔ mɔ ko ni tsɔ̃ la mli.

¹⁶ Ani nyɛleee akɛ Nyɔŋmɔ Sɔlemɔtsu ji nyɛ ni Nyɔŋmɔ Mumɔ lɛ hiɔ nyɛmli?

¹⁷ Kɛ mɔ ko fite Nyɔŋmɔ Sɔlemɔtsu lɛ, fitemɔ Nyɔŋmɔ aaafite lɛ; ejaakɛ Nyɔŋmɔ Sɔlemɔtsu lɛ yɛ krɔŋkrɔŋ, ni no ji nyɛ.

Kɔkɔbɔɔ yɛ je nɛɛ mli nilee he

¹⁸ Mɔ ko akalaka lɛ diɛŋtsɛ ehe. Kɛji mɔ ko susuɔ akɛ nilelɔ ji lɛ yɛ nyɛteŋ yɛ je nɛɛ mli lɛ, efee ehe kwashia, koni etsɔ̃ nilelɔ.

¹⁹ Ejaakɛ je nɛɛ mli nilee lɛ ji kwashiai asane yɛ Nyɔŋmɔ hiɛ. Ejaakɛ aŋma akɛ, “Emɔɔ nilelɔi lɛ yɛ amɛŋaa fɔŋ lɛ mli.”

²⁰ Ni asaŋ aŋma akɛ, “Nuŋtsɔ lɛ le nilelɔi ajwɛŋmɔi lɛ akɛ yakanii ni.”

²¹ No hewɔ lɛ, mɔ ko mɔ ko akashwã kɛmiifɔ̃ gbɔmɛi anɔ. Shi nii fɛɛ lɛ, nyɛnɔ ni:

²² Paulo jio, Apolo jio, Kefa jio, je lɛ jio, wala jio, gbele jio, nii ni yɔɔ nɛɛ jio, nii ni baaba lɛ jio; fɛɛ lɛ nyɛnɔ ni,

²³ Shi nyɛ lɛ Kristo nii ji nyɛ; shi Kristo lɛ Nyɔŋmɔ nɔŋ.