1 Korintobii 2 - ŊMALƐ KRƆŊKRƆŊ LƐ

Paulo eshiɛɛɛ nilee shi Kristo ni asɛŋ lɛ

¹ Ni mi hu, anyɛmimɛi, be ni miba nyɛŋɔɔ lɛ, jeee wiemɔ flɛmii loo nilee tuutu mikɛba, ni mibajaje Nyɔŋmɔ sane lɛ mitsɔ̃ɔ nyɛ lɛ;

² ejaakɛ mitooo miyiŋ akɛ male nɔ ko yɛ nyɛteŋ, akɛ ja Yesu Kristo, mɔ ni asɛŋ lɛ lɛ.

³ Ni mikɛ nyɛ hi shi yɛ gbɔjɔmɔ kɛ gbeyeishemɔ kɛ hekpokpomɔ pii mli;

⁴ ni miwiemɔ kɛ mishiɛmɔ lɛ hu jeee gbɔmɛi anilee wiemɔi ni hãa mɔ yiŋ tsɔ̃ɔ mikɛshiɛ, shi moŋ wiemɔi ni jieɔ Nyɔŋmɔ Mumɔ lɛ hewalɛ kpo,

⁵ bɔ ni afee ni nyɛhemɔkɛyeli lɛ akadamɔ gbɔmɛi anilee nɔ, shi moŋ edãmɔ Nyɔŋmɔ hewalɛ nɔ.

Nyɔŋmɔ nilee

⁶ Shi kɛ̃lɛ wɔwieɔ nilee wiemɔ yɛ mɛi ni edara yɛ mumɔŋ lɛ ateŋ, shi jeee je nɛɛ mli nilee loo je nɛɛ mli nɔyelɔi ni jeee fɛifɛi lɛ anilee.

⁷ Shi moŋ wɔwieɔ Nyɔŋmɔ nilee ni akɛtee yɛ teemɔ sane mli lɛ, nɔ ni Nyɔŋmɔ saa eto hã wɔnunyam dani aje jeŋ shishi,

⁸ nilee ni je nɛɛ mli nɔyelɔi lɛ ateŋ mɔ ko mɔ ko leee lɛ; ejaakɛ amɛle kulɛ amɛsɛŋ anunyam Nuŋtsɔ lɛ,

⁹ shi moŋ tamɔ bɔ ni aŋma lɛ, “Nii ni hiŋmɛi enako ni toi hu nuko ni ebako gbɔmɔ ko tsuiŋ dã ji nii ni Nyɔŋmɔ esaa eto mɛi ni sumɔɔ lɛ lɛ.”

¹⁰ Shi wɔ lɛ, Nyɔŋmɔ etsɔ eMumɔ lɛ nɔ ejie kpo etsɔ̃ɔ wɔ; ejaakɛ Mumɔ lɛ taoɔ nibii fɛɛ mli, Nyɔŋmɔ nibii ni mli kwɔlɔ tete.

¹¹ Shi gbɔmɛi ateŋ namɔ le nii ni yɔɔ gbɔmɔ mli, akɛ ja gbɔmɔ lɛ mumɔ ni yɔɔ emli lɛ? Nakai nɔŋŋ kɛ̃ nɔ ni yɔɔ Nyɔŋmɔ mli lɛ hu mɔ ko mɔ ko leee, akɛ ja Nyɔŋmɔ Mumɔ lɛ.

¹² Shi wɔ lɛ, jeee je nɛɛ mli mumɔ lɛ wɔna, shi moŋ Mumɔ ni jɛ Nyɔŋmɔ mli lɛ, koni wɔle nii ni Nyɔŋmɔ kɛduro wɔ lɛ.

¹³ Nomɛi hu wɔwieɔ, jeee wiemɔi ni gbɔmɛi anilee tsɔ̃ɔ wɔwieɔ, shi moŋ wiemɔi ni Mumɔ lɛ tsɔ̃ɔ, ni wɔkɛ mumɔŋnii toɔ mumɔŋnii ahe.

¹⁴ Shi gbɔmɔ su ni akɛfɔ lɛ lɛ heee Nyɔŋmɔ Mumɔ lɛ nii lɛ; ejaakɛ ebuɔ lɛ kwashiai asane, ni enyɛɛɛ naa ena, ejaakɛ mumɔ akɛtaoɔ naa.

¹⁵ Shi mumɔŋ gbɔmɔ lɛ kojoɔ nii fiaa, shi lɛ lɛ, mɔ ko mɔ ko ekojooo lɛ.

¹⁶ Ejaakɛ “Namɔ le Nuŋtsɔ lɛ jwɛŋmɔ, ni eeetsɔ̃ɔ lɛ nii?” Shi wɔ lɛ wɔhiɛ Kristo jwɛŋmɔ.