1 Korintobii 16 - ŊMALƐ KRƆŊKRƆŊ LƐ

Yelikɛbuamɔ onia hã hetselɔi lɛ

¹ Shi nɔ ni kɔɔ onia ni atsuɔ ayahã hetselɔi lɛ he lɛ, tamɔ bɔ ni mito mihã Galatia asafoi lɛ, nyɛ hu nyɛfea nakai.

² Daa otsi mli klɛŋklɛŋ gbi lɛ nɔ lɛ, nyɛteŋ mɔ fɛɛ mɔ kɛ nɔ ko ato yɛ bɔ ni enaa lɛ naa, koni mikaba dani atsu onia.

³ Ni kɛji miba lɛ, matsu mɛi ni nyɛbuɔ akɛ amɛsa kɛ woji ni amɛkɛ nyɛnikeenii lɛ aya Yerusalɛm.

⁴ Kɛji esa akɛ mi hu matee lɛ, mikɛ amɛ aaatee.

Paulo gbɛfai ahe gbɛjianɔtoo

⁵ Shi miyatsɔ̃ Makedonia dani maba nyɛŋɔɔ, ejaakɛ Makedonia miyatsɔ̃.

⁶ Shi ekolɛ mahi nyɛŋɔɔ fioo, ni ekolɛ maye fɛ̃ibe lɛ hu yɛ nyɛŋɔɔ, koni he fɛɛ he ni maya lɛ, nyɛyajie mi gbɛ.

⁷ Ejaakɛ misumɔ̃ɔɔ akɛ minaa nyɛ amrɔ nɛɛ kɛ minyiɛ gbɛfãa nɔ kɛkɛ, shi mihiɛ kã nɔ akɛ, kɛ Nuŋtsɔ lɛ aaaŋmɛ gbɛ lɛ, matsɛ fioo yɛ nyɛŋɔɔ.

⁸ Shi mibahi Efeso kɛyashi Pentekoste gbi lɛ.

⁹ Agbele shinaa kpeteŋkple ahã mi kɛhã nitsumɔ ni baawo yibii, shi mɛi ni kuɔ naa lɛ ayi fa.

¹⁰ Shi kɛji Timoteo ba lɛ, nyɛkwɛa ni ekɛ gbeyeishemɔ akahi shi yɛ nyɛteŋ; ejaakɛ Nuŋtsɔ lɛ nitsumɔ etsuɔ tamɔ mi nɔŋŋ.

¹¹ Hewɔ lɛ mɔ ko akabu lɛ akɛ ejeee mɔ ko shi nyɛjiea lɛ gbɛ yɛ hejɔlɛ mli koni eba miŋɔɔ; shi miikwɛ lɛ gbɛ kɛ nyɛmimɛi lɛ.

¹² Shi wɔnyɛmi Apolo lɛ, mikpa lɛ fai aahu ni ekɛ nyɛmimɛi lɛ aba nyɛŋɔɔ; shi ekpɛlɛ̃ɛɛ kwraa akɛ eeeba amrɔ nɛɛ, shi kɛ ena hegbɛ jiŋŋ, eeeba.

Naagbee wiemɔi kɛ ŋamɔi

¹³ Nyɛbua, nyɛdamɔa shi shiŋŋ yɛ hemɔkɛyeli lɛ mli, nyɛfea hii, ni nyɛhe awaa!

¹⁴ Nyɛfea nyɛnii fɛɛ yɛ suɔmɔ mli.

¹⁵ Shi miikpa nyɛ fai, anyɛmimɛi, nyɛle Stefana shĩa bii lɛ, akɛ amɛ ji Akaia klɛŋklɛŋ yibii, ni amɛkɔ mɛi krɔŋkrɔŋi lɛ asɔ̃ɔmɔ amɛfɔ̃ amɛnɔ,

¹⁶ koni nyɛ hu nyɛba nyɛhe shi nyɛhã mɛi ni tamɔ mɛnɛɛmɛi, kɛ mɔ fɛɛ mɔ ni tsuɔ nii lɛ eko ni egboɔ deŋme yɛ mli lɛ.

¹⁷ Shi mina miishɛɛ akɛ Stefana kɛ Fortunato kɛ Akaiko eba, ejaakɛ ni nyɛbɛ miŋɔɔ nɛɛ, amɛ amɛbaye nyɛnajiaŋ.

¹⁸ Ejaakɛ amɛbahã mimumɔ kɛ nyɛ hu nyɛmumɔ ena ekãa. No hewɔ lɛ, gbɔmɛi ni tamɔ nɛkɛ lɛ nyɛlea amɛ jogbaŋŋ.

¹⁹ Asia asafoi lɛ miibi nyɛ. Akwila kɛ Priskila kɛ asafo ni yɔɔ amɛwe lɛ miibi nyɛ jogbaŋŋ yɛ Nuŋtsɔ lɛ mli.

²⁰ Nyɛmimɛi lɛ fɛɛ miibi nyɛ. Nyɛŋaŋaa nyɛhe kɛ naashwɔmɔ krɔŋkrɔŋ.

²¹ Mi, Paulo diɛŋtsɛ, minine naa bimɔ nɛ.

²² Kɛ mɔ ko sumɔɔɔ Nuŋtsɔ Yesu Kristo sane lɛ, mɔ lɛ atsɔ̃ musumɔ! Maran-ata: Nuŋtsɔ, ba.

²³ Nuŋtsɔ Yesu Kristo dromɔ lɛ kɛ nyɛ ahi shi!

²⁴ Misuɔmɔ lɛ kɛ nyɛ fɛɛ ahi shi yɛ Kristo Yesu mli! Amen.